ಉರ್ವದಲ್ಲಿ ವಿದ್ಯುತ್ ಸಬ್ಸ್ಟೇಶನ್ ನಿರ್ಮಾಣಕ್ಕೆ ಭೂಮಿ: ಲೋಬೊ

ಮಂಗಳೂರು, ಸೆ.11:ವಿದ್ಯುತ್ ವಿತರಣೆಗೆ ನೆರವಾಗುವ ನಿಟ್ಟಿನಲ್ಲಿ ಉರ್ವದಲ್ಲಿ ಸಬ್ಸ್ಟೇಶನ್ ನಿರ್ಮಾಣಕ್ಕೆ ಅಗತ್ಯವಾದ ಭೂಮಿಯನ್ನು ಒದಗಿಸಲಾಗಿದೆ ಎಂದು ಶಾಸಕ ಜೆ.ಆರ್.ಲೋಬೊ ತಿಳಿಸಿದರು.

ಅವರು ಇತ್ತೀಚೆಗೆ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಮೆಸ್ಕಾಂ ಸಲಹಾ ಸಮಿತಿ ಸಭೆಯನ್ನುದ್ದೇಶಿಸಿ ಮಾತನಾಡುತಿದ್ದರು. ಎ.ಬಿ.ಶೆಟ್ಟಿ ಸರ್ಕಲ್‌ನಿಂದ ಕರಾವಳಿ ವೃತ್ತದವರೆಗೆ ಭೂಗತಕೇಬಲ್ ಅಳವಡಿಸಲಾಗುವುದು ಮತ್ತು ಸ್ವಿಚ್‌ಆನ್ ಮತ್ತು ಸ್ವಿಚ್‌ಆಫ್ ಅಳಡಿಸಲಾಗುವುದು ಎಂದು ತಿಳಿಸಿದ ಅವರು ರಸ್ತೆ ಪಕ್ಕದಲ್ಲಿ ನಿರುಪಯುಕ್ತವಾದ ಕಂಬಗಳನ್ನು ತ್ವರಿತವಾಗಿ ತೆರವುಗೊಳಿಸುವಂತೆ ಸೂಚಿಸಿದರು.

ಬೆಂಗರೆ ಪ್ರದೇಶದಲ್ಲಿ ವಿದ್ಯುತ್ ಸಮಸ್ಯೆಯಿದ್ದು ತ್ವರಿತವಾಗಿ ಪರಿಹಾರ ನೀಡಬೇಕು. ಈಗಾಗಲೇ ಸಾಕಷ್ಟು ಕ್ರಮಗಳನ್ನು ಕೈಗೊಳ್ಳಲಾಗಿದೆ, ಆದರೂ ಇನ್ನೂ ಸಮಸ್ಯೆ ಇದೆ. ಜನರು ಪದೇ ಪದೇ ಸಮಸ್ಯೆ ಪರಿಹರಿಸುವಂತೆ ಬೇಡಿಕೆ ಸಲ್ಲಿಸುವುದನ್ನು ತಪ್ಪಿಸುವಂತೆ ಅಧಿಕಾರಿಗಳಿಗೆ ಹೇಳಿದರು.

ಮರಗಳನ್ನು ಕಡಿದು ಸಾಗಿಸಲು ನಗರಪಾಲಿಕೆ ಲಾರಿಯನ್ನು ಕಾಯುವುದನ್ನು ತಪ್ಪಿಸಬೇಕು. ಇಲಾಖೆಯಲ್ಲಿ ಇರುವ ಲಾರಿಯನ್ನು ಮುಂಗಡವಾಗಿ ಗೊತ್ತುಪಡಿಸಿ ಕಾಮಗಾರಿಯಾಗುವ ಕಾಲದಲ್ಲಿ ಮರಸಾಗಿಸಲು ಬಳಕೆ ಮಾಡಬೇಕು ಎಂದು ಸೂಚಿಸಿದರು. ಜೆಪ್ಪಿನಮೊಗರು, ಬಜಾಲ್, ಬಿಕರ್ನಕಟ್ಟೆ, ಬಜ್ಜೋಡಿ ಪರಿಸರದ ಬಗ್ಗೆಯೂ ಸಭೆಯಲ್ಲಿ ಚರ್ಚಿಸಲಾಯಿತು.

ಭವಂತಿ ಸ್ಟ್ರೀಟ್ ನಿಂದ ರೂಪವಾಣಿವರೆಗೆ ವಿದ್ಯುತ್ ಕಂಬದ ಸಮಸ್ಯೆಯನ್ನು ಪರಿಶೀಲಿಸಿ ಅಗತ್ಯ ಕ್ರಮಕೈಗೊಳ್ಳುವಂತೆ ಶಾಸಕ ಲೋಬೊ ಕೊಟ್ಟಸೂಚನೆಯನ್ನು ಅಧಿಕಾರಿಗಳು ತ್ವರಿತವಾಗಿ ಮಾಡುವ ಭರವಸೆ ನೀಡಿದರು.

ಸಭೆಯಲ್ಲಿ ಮೆಸ್ಕಾಂ ಎಕ್ಸಿಕ್ಯುಟಿವ್ ಇಂಜಿನಿಯರ್ ಮಂಜಪ್ಪ ಹಾಗೂ ದೀಪಕ್ ಉಪಸ್ಥಿತರಿದ್ದರು.