ಅಜೇಯ ಶತಕ ಬಾರಿಸಿದ "ಎಂ.ಎಸ್.ಧೋನಿ"

ಮುಂಬೈ, ಅ.10: "ಎಂ.ಎಸ್.ಧೋನಿ" ವಿಶಿಷ್ಟ ಶತಕ ಬಾರಿಸಿದ್ದಾರೆ. ಸುಶಾಂತ್ ಸಿಂಗ್ ರಜಪೂತ್ ನಾಯಕನಟರಾಗಿರುವ "ಎಂ.ಎಸ್.ಧೋನಿ- ದ ಅನ್‌ಟೋಲ್ಡ್ ಸ್ಟೋರಿ" ಚಿತ್ರದ ಒಂಬತ್ತು ದಿನಗಳ ಬಾಕ್ಸ್ ಆಫೀಸ್ ಗಳಿಕೆ ನೂರು ಕೋಟಿ ರೂಪಾಯಿಯನ್ನು ದಾಟಿದೆ. ಸೆಪ್ಟೆಂಬರ್ 30ರಂದು ಬಿಡುಗಡೆಯಾಗಿದ್ದ ಈ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಸುಶಾಂತ್ ಸಿಂಗ್ ಅವರ ಗರಿಷ್ಠ ಗಳಿಕೆಯ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಬಾಲಿವುಡ್ ವಹಿವಾಟು ವಿಶ್ಲೇಷಕ ತರುಣ್ ಆದರ್ಶ್ ಈ ವಿಷಯವನ್ನು ಸಾಮಾಜಿಕ ಜಾಲತಾಣದಲ್ಲಿ ಬಹಿರಂಗಪಡಿಸಿದ್ದಾರೆ. ಇದು ಹಿಂದಿ, ತಮಿಳು ಹಾಗೂ ತೆಲುಗು ಅವತರಣಿಕೆಗಳ ಒಟ್ಟು ಮೊತ್ತವಾಗಿದೆ. ಈ ವರ್ಷ 100 ಕೋಟಿ ಗಳಿಕೆಯ ಗೆರೆ ದಾಟಿದ ಹಿಂದಿ ಚಿತ್ರಗಳನ್ನೂ ಅವರು ಪಟ್ಟಿ ಮಾಡಿದ್ದಾರೆ. ಇದರಲ್ಲಿ ಅಕ್ಷಯ್ ಕುಮಾರ್ ಅವರ ಏರ್‌ಲಿಫ್ಟ್, ರುಸ್ತುಂ ಮತ್ತು ಹೌಸ್‌ಫುಲ್-3, ಸಲ್ಮಾನ್ ಖಾನ್ ಅವರ ಸುಲ್ತಾನ್ ಮತ್ತು ಎಂ.ಎಸ್.ಧೋನಿ ಬಯೋಪಿಕ್ ಸೇರಿದೆ. 100 ಕೋಟಿ ಗಳಿಕೆ ಕ್ಲಬ್ ಸೇರಲು ತೆಗೆದುಕೊಂಡ ದಿನಗಳನ್ನು ಕೂಡಾ ತರುಣ್ ಉಲ್ಲೇಖಿಸಿದ್ದಾರೆ.
ಎಂ.ಎಸ್.ಧೋನಿ ಚಿತ್ರ ಕೇವಲ ಒಂದೇ ವಾರದಲ್ಲಿ ಎಲ್ಲ ವೆಚ್ಚವನ್ನು ಭರಿಸಿಕೊಂಡಿದೆ. 5,000 ತೆರೆಗಳಲ್ಲಿ ಇದು ಬಿಡುಗಡೆಯಾಗಿತ್ತು.