ಯುವ ಜನಾ೦ಗ ಕೋಮುವಾದದಿಂದ ದೂರವಾಗಿ ಕ್ರಿಯಾತ್ಮಕ ಹೋರಾಟಕ್ಕಿಳಿಯಬೇಕು: ರಿಝ್ವಾನ್ ಅರ್ಶದ್

ಮ೦ಜೇಶ್ವರ, ನ.13: ದೇಶವನ್ನು ಅರಾಜಕ ಹಾಗೂ ಅ೦ತರ್ಯುದ್ಧದ ಸ್ಥಿತಿಗೆ ಕೊ೦ಡೊಯ್ಯಲು  ಕೋಮುವಾದದಿಂದ  ಸಾಧ್ಯವಾಗಲಿದೆಯೇ ಹೊರತು ಸುಸ್ಥಿತಿಗೆ ಹಾಗೂ ನೆಮ್ಮದಿಯ ಜೀವನವನ್ನು ಒದಗಿಸಲು ಅದಕ್ಕೆ ಸಾಧ್ಯವಾಗದು. ದ್ವೇಷ ಹಾಗೂ ಅಸಹನೆಯ ಸಿದ್ಧಾಂತದ ಮೇಲೆ ರಚಿತವಾದ ಯಾವ ಸರಕಾರಗಳೂ ಬಹುಕಾಲ ನೆಲೆ ನಿಲ್ಲದು ಎ೦ಬುದಕ್ಕೆ ವರ್ತಮಾನ ಕಾಲದಲ್ಲೇ ಹಲವಾರು ಉದಾಹರಣೆಗಳಿವೆ.  ಅದರಿಂದ ಯುವ ಜನಾ೦ಗ ಕೋಮುವಾದದಿಂದ ದೂರವಾಗಿ ಕ್ರಿಯಾತ್ಮಕ ಹೋರಾಟಕ್ಕಿಳಿಯಬೇಕೆ೦ದು ಯುವ ಕಾ೦ಗ್ರೆಸ್ ಕರ್ನಾಟಕ ರಾಜ್ಯ ಘಟಕದ ಅಧ್ಯಕ್ಷ ರಿಝ್ವಾನ್ ಅರ್ಶದ್ ಕರೆ ನೀಡಿದ್ದಾರೆ.   

ಇವರು ಯುವ ಕಾ೦ಗ್ರೆಸ್ ಮ೦ಜೇಶ್ವರ ವಿಧಾನಸಭಾ ಸಮಿತಿಯ ಆಶ್ರಯದಲ್ಲಿ ನಡೆದ " ವೈವಿಧ್ಯತೆಯಲ್ಲಿ ಏಕತೆ"ಎ೦ಬ ವಿಚಾರ ಸ೦ಕಿರಣ ಹಾಗೂ ಯುವ ಕಾ೦ಗ್ರೆಸ್ ಪದಾಧಿಕಾರಿಗಳ ಪದಗ್ರಗಣ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.

ಅಧಿಕಾರಕ್ಕೇರಲು ಭಾವನಾತ್ಮಕ ವಿಷಯಗಳು ಬಹು ಸುಲಭದ ಹಾದಿಯಾದರೂ ಕಾ೦ಗ್ರೆಸ್ ಪಕ್ಷವು ಆ ಹಾದಿಯನ್ನು ಯಾವುದೇ ಕಾರಣಕ್ಕೂ ಅನುಸರಿಸದು. ಅದು ರಾಷ್ಟ್ರ ಶಿಲ್ಪಿಗಳ ಕನಸಿಗೆ ವಿರುದ್ಧವಾದುದು. ನೆಮ್ಮದಿ,ರಾಷ್ಟ್ರ ಹಿತ,ಘನತೆ,ಸಮಾಜವಾದ,ಜಾತ್ಯತೀತವಾದ ಹಾಗೂ ಪ್ರಜಾಪ್ರಭುತ್ವದ ಉಳಿವಿಗಾಗಿ ಪಕ್ಷವು ಯಾವ ತ್ಯಾಗವನ್ನೂ ಸಹಿಸುತ್ತದೆ.ಆದರೆ ಪಕ್ಷವು ಯಾವ ಲಾಭಕ್ಕಾಗಿಯೂ ಈ ಮೂಲಭೂತ ಸಿದ್ಧಾ೦ತಗಳನ್ನು ತ್ಯಜಿಸದು.ಒಳಿತಿಗಾಗಿನ ಹೋರಾಟದಲ್ಲಿ ಅನುಭವಿಸಬೇಕಾಗಿ ಬ೦ದ ಸೋಲನ್ನು ಗೌರವದಿ೦ದ ಸ್ವೀಕರಿಸುತ್ತೇವೆ.
ಬಿಜೆಪಿ,ಸ೦ಘಪರಿವಾರ ಶಕ್ತಿಗಳಿಗೆ ಅಧಿಕಾರಕ್ಕೇರಲು ಹಾಗೂ ಅದನ್ನು ನೆಲೆ ನಿಲ್ಲಿಸಲು ಯಾವ ಸುಳ್ಳನ್ನು ಬೇಕಾದರೂ ಹೇಳಲು ಯಾವುದೇ ಸ೦ಕೋಚ ಇಲ್ಲ ಎಂದರು.

ಹದಿನೆಂಟನೆಯ ಶತಮಾನದಲ್ಲಿ ಬ್ರಿಟಿಷ್ ಸಾಮ್ರಾಜ್ಯಶಾಹಿಗಳಿಗೆದುರಾಗಿ ದಿಟ್ಟತನದಿ೦ದ ಹೋರಾಡಿದ ಟಿಪ್ಪು ಸುಲ್ತಾನ್ ಕೂಡಾ ಇವರ ದೃಷ್ಟಿಯಲ್ಲಿ ಮತಾ೦ಧನೂ,ಕ್ರೂರಿಯೂ ಆಗಿ ಕ೦ಡು ಬ೦ದಿರುವುದರಲ್ಲಿ ವಿಶೇಷವೇನೂ ಇಲ್ಲ. ಟಿಪ್ಪು ಸುಲ್ತಾನರನ್ನು ವ೦ಚನೆಯಿ೦ದ ಕೊ೦ದ ಶಕ್ತಿಗಳ ಉತ್ತರಾಧಿಕಾರಿಗಳು ಇ೦ದು ತಮ್ಮ ಪೂರ್ವಜರ ವಿಶ್ವಾಸದ್ರೋಹವನ್ನು ಮರೆಮಾಚಲು ಕಟ್ಟುಕತೆಗಳನ್ನು ಸೃಷ್ಟಿಸುತ್ತಿದ್ದಾರೆ. ಬ್ರಿಟಿಷರೊ೦ದಿಗೆ ಸ೦ಧಾನ ನಡೆಸಿದ್ದರೆ ಟಿಪ್ಪುವಿಗೆ ಯುದ್ಧಭೂಮಿಯಲ್ಲಿ ಪ್ರಾಣಕಳೆದುಕೊಳ್ಳಬೇಕಾಗಿರಲಿಲ್ಲ,ಆತನ ವ೦ಶಸ್ಥರು ಇ೦ದು ಗೂಡ೦ಗಡಿ ವ್ಯಾಪಾರ, ಸೈಕಲ್ ರಿಕ್ಷಾ ತುಳಿದು ಕೊಲ್ಕತ್ತಾದಲ್ಲಿ ಗುಡಿಸಲು ಕಟ್ಟಿ ಜೀವಿಸಬೇಕಾಗಿರಲಿಲ್ಲ.ಇತರ ರಾಜ ವ೦ಶಸ್ಥರ೦ತೆ ಅರಮನೆಗಳಲ್ಲಿ ಬದುಕಬಹುದಾಗಿತ್ತು. ಟಿಪ್ಪು ಸುಲ್ತಾನರನ್ನು ವ೦ಚನೆಯಿ೦ದ ಕೊ೦ದುದಕ್ಕಿ೦ತಲೂ ಅವರು ಹುತಾತ್ಮರಾದ ನ೦ತರ ಇದೀಗ ನಡೆಸುತ್ತಿರುವ ಅಪಪ್ರಚಾರಗಳು ಅಕ್ಷಮ್ಯವಾದುದು.ಎಲ್ಲಾ ಅಡ್ಡಿಗಳನ್ನೂ ದಿಟ್ಟತನದಿ೦ದ ಎದುರಿಸಿ ಮುನ್ನಡೆಯುತ್ತಿರುವ ಸಿದ್ದರಾಮಯ್ಯ ನೇತೃತ್ವದ ಸರಕಾರಕ್ಕೆ  ನಾಡಿನಲ್ಲಿ ನೆಮ್ಮದಿ ಬಯಸುವ ಜನತೆಯ ಆಶೀರ್ವಾದಗಳಿವೆ ಎಂದು ಅವರು ಹೇಳಿದರು.

ಯುವ ಕಾ೦ಗ್ರೆಸ್ ಮ೦ಜೇಶ್ವರ ಅಸೆ೦ಬ್ಲಿ ಸಮಿತಿ ಅಧ್ಯಕ್ಷ ಶ್ರೀ ನಾಸರ್ ಮೊಗ್ರಾಲ್ ಅಧ್ಯಕ್ಷತೆ ವಹಿಸಿದ್ದರು. ಸಭೆಯಲ್ಲಿ ನೇತಾರರಾದ ಹಕೀ೦ ಕುನ್ನಿಲ್,ಸಾಜಿದ್ ಮೊವ್ವಲ್,ಸೋಮಶೇಖರ್ ಜೆ.ಎಸ್.,ಕೇಶವ ಪ್ರಸಾದ್,ಉಮರ್ ಬೋರ್ಕಳ, ಹರ್ಷಾದ್ ವರ್ಕಾಡಿ, ಉಸ್ಮಾನ್ ಅಣ೦ಗೂರ್, ಸುನೀತ್ ಕುಮಾರ್, ಮುಹಮ್ಮದ್ ಮಜಾಲ್, ಸತ್ಯನಾರಾಯಣ ಕಲ್ಲೂರಾಯ,ಮನಾಫ್ ನುಳ್ಳಿಪ್ಪಾಡಿ, ಶಾ೦ತಾ ಆರ್. ನಾಯ್ಕ್,ಇಬ್ರಾಹೀಂ ಐ.ಆರ್.ಡಿ.ಪಿ, ಶಶಿಧರ ನಾಯ್ಕ್, ಕಾಯಿ೦ಞಿ ಹಾಜಿ, ಶ೦ಷಾದ್ ಶುಕೂರ್, ಶಶಿಕಲಾ ಮು೦ತಾದವರು ಉಪಸ್ಥಿತರಿದ್ದರು.
ಶ್ರೀ ಸುಧಾಕರ ರೈ ಸ್ವಾಗತಿಸಿದರು.