ಪ್ರಧಾನಿ ಮೋದಿ ಟೈಮ್ ವರ್ಷದ ವ್ಯಕ್ತಿ
Update: 2016-12-05 12:39 IST
ಹೊಸದಿಲ್ಲಿ,ಡಿ.5 : ಪ್ರಧಾನಿ ನರೇಂದ್ರ ಮೋದಿಯನ್ನು ಟೈಮ್ ಮ್ಯಾಗಝಿನ್ ಇದರ 2016 ನೇ ಸಾಲಿನ ಪರ್ಸನ್ ಆಫ್ ದಿ ಇಯರ್- ರೀಡರ್ಸ್ ಪೋಲ್( ವರ್ಷದ ವ್ಯಕ್ತಿ) ಆಗಿ ಸೋಮವಾರ ಘೋಷಿಸಲಾಗಿದೆ. ಓದುಗರ ಮತಗಳ ಆಧಾರದಲ್ಲಿ ಪ್ರಧಾನಿಯನ್ನು ವಿಜೇತರನ್ನಾಗಿ ಘೋಷಿಸಲಾಗಿದೆ.
ಟೈಮ್ ಮ್ಯಾಗಝೀನ್ ನೀಡಿದ ಮಾಹಿತಿಯಂತೆ ಮೋದಿ ಶೇ.18 ರಷ್ಟು ಮತಗಳನ್ನು ರವಿವಾರ ಮಧ್ಯ ರಾತ್ರಿಯ ತನಕ ಪಡೆದಿದ್ದರು.ಟೈಮ್ ಮ್ಯಾಗಝೀನ್ ಇದರ ವರ್ಷದ ವ್ಯಕ್ತಿಯನ್ನು ಈ ವರ್ಷದ ಡಿಸೆಂಬರ್ ಏಳರಂದು ಘೋಷಿಸಲಾಗುವುದು ಹಾಗೂ ಈ ಆಯ್ಕೆಯನ್ನು ಮ್ಯಾಗಝೀನ್ ಸಂಪಾದಕರುಗಳು ಮಾಡಲಿದ್ದಾರೆ.
ಓದುಗರ ಮತದಾನದಲ್ಲಿ ಮೋದಿ ತಮ್ಮ ಪ್ರತಿಸ್ಪರ್ಧಿಗಳಾದ ಬರಾಕ್ ಒಬಾಮ, ಡೊನಾಲ್ಡ್ ಟ್ರಂಪ್ ಮತ್ತು ಜೂಲಿಯನ್ ಅಸ್ಸಾಂ ಅವರಿಗಿಂತ ಬಹಳ ಮುಂದಿದ್ದರು. ಇಲ್ಲಿ ತಿಳಿಸಲಾದ ಮೂವರು ನಾಯಕರಿಗೆ 7 ಶೇಕಡಾ ಮತಗಳು ದೊರೆತಿದ್ದವು.ಅಂತೆಯೇ ಈ ಮತದಾನದಲ್ಲಿ ಮಾರ್ಕ್ ಝುಕರ್ ಬರ್ಗ್ (2%) ಹಾಗೂ ಹಿಲರಿ ಕ್ಲಿಂಟನ್ (4%) ಕ್ಕಿಂತಲೂ ಮೋದಿ ಬಹಳಷ್ಟು ಮುಂದಿದ್ದರು.
ಟೈಮ್ ವರ್ಷದ ವ್ಯಕ್ತಿಗಾಗಿ ನಡೆಯುವ ಆನ್ ಲೈನ್ ರೀಡರ್ಸ್ ಪೋಲ್ ನಲ್ಲಿ ಮೋದಿ ವಿಜೇತರಾಗುತ್ತಿರುವುದು ಇದು ಎರಡನೇ ಬಾರಿಯಾಗಿದೆ. ಈ ಹಿಂದೆ ಅವರು 2014 ರಲ್ಲಿ ಗೆದ್ದಿದ್ದು ಶೇ 16 ಮತಗಳನ್ನು ಪಡೆದಿದ್ದರು.
ಕಳೆದ ನಾಲ್ಕುವರ್ಷಗಳಿಂದ ಸತತವಾಗಿ ಮೋದಿ ಟೈಮ್ ವರ್ಷದ ವ್ಯಕ್ತಿಬಿರುದಿಗಾಗಿ ಸ್ಪರ್ಧೆಯಲ್ಲಿದ್ದಾರೆ. ಕಳೆದ ವರ್ಷ ಈ ಬಿರುದು ಜರ್ಮನ್ ಚಾನ್ಸಲರ್ ಏಂಜಲಾ ಮರ್ಕೆಲ್ ಅವರ ಪಾಲಿಗೆ ಹೋಗಿತ್ತು.