ಸಂಸದ ನಳಿನ್ ರ ವಿರುದ್ಧ ಎಫ್ ಐ ಆರ್ ದಾಖಲು

ಕೊಣಾಜೆ, ಜ.3 :  ಪ್ರಚೋದನಾತ್ಮಕ ಭಾಷಣ ಮಾಡಿದ  ಮಂಗಳೂರು ಸಂಸದ ನಳಿನ್ ಕುಮಾರ್  ವಿರುದ್ಧ ಕೋರ್ಟ್ ಸೂಚನೆ ಮೇರೆಗೆ  ಎಫ್ ಐ ಆರ್  ದಾಖಲಾಗಿದೆ ಎಂದು ತಿಳಿದು ಬಂದಿದೆ.

ಸಂಸದರ ವಿರುದ್ಧ  ಕೊಣಾಜೆ ಠಾಣೆಯಲ್ಲಿ  2 ಪ್ರತ್ಯೇಕ ದೂರು ದಾಖಲಾಗಿತ್ತು.

ಈ ಬಗ್ಗೆ ನ್ಯಾಯಾಲಯಕ್ಕೆ ಮಾಹಿತಿ ನೀಡಿದ್ದು , ನ್ಯಾಯಾಲಯದ ಸೂಚನೆಯ ಪ್ರಕಾರ ನಡೆದುಕೊಳ್ಳುವುದಾಗಿ ಕಮೀಷನರ್ ಹೇಳಿದ್ದರು.

ಇದೀಗ ನ್ಯಾಯಾಲಯದ ಸೂಚನೆ ಮೇರೆಗೆ ಕೊಣಾಜೆ ಠಾಣೆಯಲ್ಲಿ ಎಫ್ಐಆರ್ ದಾಖಲಾಗಿದೆ ಎಂದು ತಿಳಿದು ಬಂದಿದೆ.

ಜ. 1 ರಂದು ಕಾರ್ತಿಕ್ ರಾಜ್ ಕೊಲೆ ಪ್ರಕರಣದ ತ್ವರಿತ ತನಿಖೆಗೆ ಆಗ್ರಹಿಸಿ  ಕೊಣಾಜೆಯಲ್ಲಿ ನಡೆಸಿದ  ಪ್ರತಿಭಟನಾ ಸಭೆಯಲ್ಲಿ ಸಂಸದ ನಳಿನ್ ಕುಮಾರ್ ಕಟೀಲ್ ‘ ಕೊಲೆಗಾರರನ್ನು 10 ದಿನಗಳೊಳಗೆ  ಬಂಧಿಸದಿದ್ದರೆ ಜಿಲ್ಲೆಗೆ ಬೆಂಕಿ ಬೀಳುವ ಸಾಧ್ಯತೆ ಇದೆ  ‘ ಎಂಬ ಪ್ರಚೋದನಾತ್ಮಕ ಹೇಳಿಕೆ ನೀಡಿದ್ದರು.

ಈ  ಹೇಳಿಕೆಯ ವಿರುದ್ಧ ನಾನಾ ಕಡೆಯಿಂದಲೂ ಪ್ರತಿಭಟನೆ , ದೂರುಗಳು  ದಾಖಲಾದ ನಂತರ ಎಚ್ಚೆತ್ತ ಸಂಸದರು ಬಳಿಕ ತನ್ನ ಹೇಳಿಕೆಯ ಬಗ್ಗೆ ವಿಷಾದ ವ್ಯಕ್ತಪಡಿಸಿದ್ದರು .