ಕೇಂದ್ರ ಬಜೆಟ್ 2017-18: ಪ್ರತಿಕ್ರಿಯೆಗಳು
Update: 2017-02-01 23:46 IST
ನಿರೀಕ್ಷೆ ಹುಸಿಗೊಳಿಸಿದ ನೀರಸ ಬಜೆಟ್: ದಿನೇಶ್ ಗುಂಡೂರಾವ್
ಅರುಣ್ ಜೇಟ್ಲಿಯವರ ಈ ಬಾರಿಯ ಬಜೆಟ್ ಬಗ್ಗೆ ದೇಶದ ಜನತೆಯಲ್ಲಿ ಭಾರೀ ನಿರೀಕ್ಷೆಗಳಿದ್ದವು. ಆದರೆ ಬಜೆಟ್ ಭಾರೀ ನಿರಾಶೆ ಮೂಡಿಸಿದೆ ಎಂದು ಕೆಪಿಸಿಸಿ ಕಾರ್ಯಾಧ್ಯಕ್ಷ ದಿನೇಶ್ ಗುಂಡೂರಾವ್ ಉಡುಪಿಯಲ್ಲಿಂದು ಪ್ರತಿಕ್ರಿಯಿಸಿದ್ದಾರೆ.
ಆದಾಯ ತೆರಿಗೆ ಮಿತಿಯಲ್ಲಿ ಸ್ವಲ್ಪ ಸುಧಾರಣೆಯಾಗಿದೆ. ಉದ್ಯೋಗ ಸೃಷ್ಟಿಯಲ್ಲೂ ಬಜೆಟ್ ವಿಫಲವಾಗಿದೆ. ರೈತರಿಗೆ ವಿಶೇಷ ಯೋಜನೆಗಳ ಘೋಷಣೆಯೂ ಬಜೆಟ್ನಲ್ಲಿಲ್ಲ. ಒಟ್ಟಿನಲ್ಲಿ ಬಜೆಟ್ನಲ್ಲಿ ಖುಷಿ ಪಡುವ ಯಾವುದೇ ವಿಚಾರಗಳಿಲ್ಲ ಎಂದರು.
ಬಜೆಟ್ನಲ್ಲಿ ಕರ್ನಾಟಕಕ್ಕೆ ವಿಶೇಷ ಘೋಷಣೆಗಳಿಲ್ಲ. ಆದರೆ ರಾಜಕೀಯ ಪಕ್ಷಗಳ ದೇಣಿಗೆ ಕಡಿತದ ಆದೇಶವನ್ನು ಸ್ವಾಗತಿಸುತ್ತೇನೆ. ಇದು ಕೇಂದ್ರದ ಉತ್ತಮ ಹೆಜ್ಜೆಯಾಗಿದೆ ಎಂದರು.
ಎಂಎಸ್ಎಂಇ -ಪ್ಲಾಸ್ಟಿಕ್ ಉದ್ಯಮ ಕ್ಷೇತ್ರಕ್ಕೆ ಪೂರಕ ಬಜೆಟ್: ನಝೀರ್
ಸಣ್ಣ , ಮಧ್ಯಮ ಮತ್ತು ಅತೀ ಸಣ್ಣ ಉದ್ಯಮ ಕ್ಷೇತ್ರಗಳಿಗೆ ಸಂಬಂಧಿಸಿದಂತೆ (50 ಕೋ.ರೂ.ಗಿಂತ ಕಡಿಮೆ ಆರ್ಥಿಕ ವ್ಯವಹಾರ ನಡೆಸುವ ಉದ್ಯಮಗಳಿಗೆ) ಶೇ.5 ತೆರಿಗೆ ಕಡಿತಗೊಳಿಸಿರುವ ನಿರ್ಧಾರ ಉತ್ತಮವಾಗಿದೆ. ಸರಕಾರದ ದೊಡ್ಡ ಮೊತ್ತ ಗ್ರಾಮೀಣ ಪ್ರದೇಶದ ಮೂಲಭೂತ ಸೌಕರ್ಯಗಳ ಅಭಿವೃದ್ಧಿಗೆ ಬಳಕೆ ಮಾಡುತ್ತಿರುವುದು ನೋಟು ನಿಷೇಧದಿಂದ ತೊಂದರೆಗೊಳಗಾಗಿರುವ ಕ್ಷೇತ್ರಕ್ಕೆ ಸಹಕಾರಿಯಾಗಿದೆ. ಭಾರತದ ಆರ್ಥಿಕತೆಯನ್ನು ಸ್ವಚ್ಛಗೊಳಿಸುವ ನಿಟ್ಟಿನಲ್ಲಿ ನಗದು ರಹಿತ ಆರ್ಥಿಕತೆಗೆ ಒತ್ತು ನೀಡಿರುವುದು ಸರಿಯಾದ ನಿರ್ಧಾರ.ಆದಾಯ ತೆರಿಗೆ ಮಿತಿಯನ್ನು ಹೆಚ್ಚಿಸಿರುವುದು ಮತ್ತು ಎಂಎಸ್ಎಂಇ ಆರ್ಥಿಕ ವ್ಯವಹಾರಕ್ಕೆ ತೆರಿಗೆ ವಿನಾಯಿತಿ ನೀಡಿರುವುದು ಉತ್ತಮ ನಿರ್ಧಾರವಾಗಿದೆ ಎಂದು ಕೆನರಾ ಪ್ಲಾಸ್ಟಿಕ್ ತಯಾರಕರು ಮತ್ತು ಉದ್ಯಮಿಗಳ ಅಸೋಸಿಯೇಶನ್ ಸಂಘದ ಅಧ್ಯಕ್ಷ ಬಿ.ಎ.ನಝೀರ್ ತಿಳಿಸಿದ್ದಾರೆ.
‘ರೈತ ವಿರೋಧಿ ಕೇಂದ್ರ ಬಜೆಟ್’
ಉಡುಪಿ: ಬಜೆಟ್ ರೈತ ವಿರೋಧಿಯಾಗಿದ್ದು ಜನ ಸಾಮಾನ್ಯರಿಗೆ ಯಾವುದೇ ಲಾಭವಿಲ್ಲ ಎಂದು ಸಿಪಿಎಂ ಉಡುಪಿ ಜಿಲ್ಲಾ ಸಮಿತಿ ಹೇಳಿದೆ.
ಬರ ಹಾಗೂ ನೋಟು ಅವೌಲ್ಯೀಕರಣದಿಂದ ದೇಶ ಹಾಗೂ ಕರ್ನಾಟಕದ ರೈತರು ತತ್ತರಿಸಿದ್ದಾರೆ. ಇಂತಹ ಸಂದರ್ಭದಲ್ಲಿ ರೈತರ ಸಾಲ ಮನ್ನಾ ಮಾಡುವುದು ಅಗತ್ಯವಾಗಿತ್ತು. ಆದರೆ ಬಜೆಟ್ನಲ್ಲಿ ಅಂತಹ ಯಾವುದೇ ಪ್ರಸ್ತಾವ ಇಲ್ಲ. ಒಟ್ಟಾರೆಯಾಗಿ ಉದ್ದಿಮೆದಾರರಿಗೆ ತೆರಿಗೆ ವಿನಾಯಿತಿ ನೀಡುವ ಸರಕಾರ ರೈತರನ್ನು ಕಡೆಗಣಿಸಿದೆ. ಆದ್ದರಿಂದ ಇದು ರೈತ ವಿರೋಧಿ ಬಜೆಟ್ ಎಂದು ಟೀಕಿಸಿದೆ.
ಅಚ್ಛೇ ದಿನ್ ನೆಲಕಚ್ಚಿದೆ: ಪ್ರಮೋದ್
ಉಡುಪಿ: 500/1000 ರೂ. ಮುಖಬೆಲೆಯ ನೋಟು ರದ್ದಾದ ನಂತರದ ಬಜೆಟ್ ಇದಾಗಿರುವುದರಿಂದ ದೇಶದ ಜನರ ನಿರೀಕ್ಷೆ ಹುಸಿಯಾಗಿದೆ. ಅಚ್ಛೇದಿನ್ನ ನಿರೀಕ್ಷೆ ನೆಲಕಚ್ಚಿದೆ ಎಂದು ಮೀನುಗಾರಿಕೆ, ಸಚಿವ ಕೇಂದ್ರ ಬಜೆಟ್ಗೆ ಪ್ರತಿಕ್ರಿಯಿಸಿದ್ದಾರೆ.
ನೀರಾವರಿ ಯೋಜನೆಗೆ 20 ಸಾವಿರ ಕೋ.ರೂ. ಇಟ್ಟಿದೆ. ಇಡೀ ದೇಶಕ್ಕೆ ಈ ಮೊತ್ತ ಸಾಕಾಗದು. ನರೇಗಾ ಯುಪಿಎ ಯೋಜನೆ. ಇದಕ್ಕೆ ಬಿಜೆಪಿ ಈ ಬಾರಿ ಒತ್ತು ನೀಡಿದೆ. ಬಿಜೆಪಿಗೆ ಈಗ ಜ್ಞಾನೋದಯವಾದಂತಿದೆ ಎಂದರು.
ಉತ್ತಮ ಬಜೆಟ್
ಇದು ಉತ್ತಮ ಬಜೆಟ್. ನಗದು ರಹಿತ ಆರ್ಥಿಕ ವ್ಯವಸ್ಥೆಗೆ ಹೆಚ್ಚು ಒತ್ತು ನೀಡುವ ಪ್ರಯತ್ನ ನಡೆಸಲಾಗಿದೆ. ನಗದು ಮಿತಿ ವಹಿವಾಟನ್ನು 3 ಲಕ್ಷ ರೂ.ಗೆ ಏರಿಸಲಾಗಿದೆ. ಸಣ್ಣಪುಟ್ಟ ವಸ್ತುಗಳ ಮೇಲಿನ ತೆರಿಗೆ ಕುರಿತು ಉಲ್ಲೇಖಿಸದಿರುವ ಮೂಲಕ ಬಜೆಟ್ನ ಸ್ವರೂಪವನ್ನೇ ಬದಲಿಸುವ ಪ್ರಯತ್ನ ನಡೆಸಲಾಗಿದೆ. ಜೀವನ್ ಸಲ್ದಾನ, ಅಧ್ಯಕ್ಷರು, ಕೆಸಿಸಿಐ ಮಂಗಳೂರು
ನಿರಾಶದಾಯಕ ಬಜೆಟ್
ಕೇಂದ್ರ ಬಜೆಟ್ ಅತ್ಯಂತ ನಿರಾಶದಾಯಕ. ನೋಟು ಅಪವೌಲ್ಯದ ಬಳಿಕ ದೇಶದ ಆರ್ಥಿಕ ಸ್ಥಿತಿ ತೀವ್ರ ಕುಸಿತಗೊಂಡಿದೆ. ಅದಕ್ಕೆ ಯಾವುದೇ ಪರಿಹಾರ ಸೂಚಿಸಿಲ್ಲ. ಕೃಷಿಕರು, ಬಡಜನರು ಮಾಡಿದ ಬ್ಯಾಂಕ್ ಸಾಲದ ಸಮಸ್ಯೆಗೂ ಉತ್ತರ ಸಿಕ್ಕಿಲ್ಲ. ಕೈಗಾರಿಕೆಗಳ ಪುನಶ್ಚೇತನಕ್ಕೂ ಆದ್ಯತೆ ನೀಡಿಲ್ಲ.
<ವಸಂತ ಆಚಾರಿ, ಕಾರ್ಯದರ್ಶಿ ದ.ಕ. ಜಿಲ್ಲಾ ಸಿಪಿಎಂ.
ಅಭಿವೃದ್ಧಿಪರ ಬಜೆಟ್: ಹಾಜಿ ಎಸ್.ಎಂ.ರಶೀದ್
ಬಜೆಟ್ ಅಭಿವೃದ್ಧಿ ಪರವಾಗಿದೆ. ಆದಾಯ ತೆರಿಗೆ ಮಿತಿಯನ್ನು 3 ಲಕ್ಷ ರೂ.ಗೆ ಏರಿಸಿರುವುದು ಒಳ್ಳೆಯ ಬೆಳವಣಿಗೆ. ಇದರಿಂದ ಬಡ ಮತ್ತು ಮಧ್ಯಮ ವರ್ಗದ ಹಿತ ಕಾಪಾಡಿದಂತಾಗಿದೆ.
ಕಪ್ಪುಹಣದ ಮೇಲೆ ನಿಯಂತ್ರಣ: ನಳಿನ್ ಕುಮಾರ್
ಕೃಷಿ ಕ್ಷೇತ್ರಕ್ಕೆ ವಿಶೇಷ ಆದ್ಯತೆ ನೀಡಿರುವ ಕೇಂದ್ರದ ಬಜೆಟ್ ರೈತರು ಹಾಗೂ ಹಳ್ಳಿಯ ಜನತೆಗೆ ಹೊಸ ಅನುಕೂಲಗಳನ್ನು ಕಲ್ಪಿಸಿದೆ. ಭ್ರಷ್ಟಾಚಾರ ಹಾಗೂ ಕಪ್ಪುಹಣದ ಮೇಲೆ ನಿಯಂತ್ರಣ ಸಾಧಿಸುವಲ್ಲೂ ಬಜೆಟ್ ಪ್ರಮುಖ ಅಸ್ತ್ರವಾಗಿದೆ. ಕರಾವಳಿ ಭಾಗದ ರಾಷ್ಟ್ರೀಯ ಹೆದ್ದಾರಿಗಳ ಅಭಿವೃದ್ಧಿಗೆ ಗಮನ ಹರಿಸಲಾಗಿದೆ. ಎಲ್ಲ ಗ್ರಾಮಗಳಿಗೆ ವಿದ್ಯುತ್ ಪೂರೈಕೆ, 1.5 ಲಕ್ಷಕ್ಕೂ ಹೆಚ್ಚು ಗ್ರಾಮಗಳಿಗೆ ವೇಗದ ಇಂಟರ್ನೆಟ್ ವ್ಯವಸ್ಥೆ ಪ್ರಮುಖ ಘೋಷಣೆಗಳಾಗಿವೆ. ರೈಲ್ವೆ ಬಜೆಟ್ನಲ್ಲಿ ಇ-ಟಿಕೆಟ್ ಮೇಲಿನ ಸೇವಾ ಶುಲ್ಕ ತೆರಿಗೆ ರದ್ದು, ಎಲ್ಲ ರೈಲುಗಳಲ್ಲಿ ಯೋ ಟಾಯ್ಲೆಟ್ ಅಳವಡಿಕೆ, ತೀರ್ಥಯಾತ್ರೆ ಮತ್ತು ಪ್ರವಾಸಗಳಿಗಾಗಿ ವಿಶೇಷ ರೈಲಿನ ವ್ಯವಸ್ಥೆ ಸ್ವಾಗತಾರ್ಹ.
ಪ್ರಗತಿಪರ-ಜನಪರ ಬಜೆಟ್: ಉದಯ ಕುಮಾರ್ ಶೆಟ್ಟಿ
ಉಡುಪಿ: ಈ ಬಾರಿಯ ಬಜೆಟ್ ದೂರದೃಷ್ಟಿ ಹೊಂದಿದ ಜನಪರ -ಪ್ರಗತಿಪರ ಎಂದು ಬಿಜೆಪಿ ಮಂಗಳೂರು ವಿಭಾಗದ ಉಸ್ತುವಾರಿ ಕೆ. ಉದಯ ಕುಮಾರ್ ಶೆಟ್ಟಿ ಹೇಳಿದ್ದಾರೆ. ಆದಾಯ ತೆರಿಗೆಯ ಮಿತಿಯಲ್ಲಿ ಯಾವುದೇ ಏರಿಕೆ ಮಾಡಿಲ್ಲ. 3 ಲಕ್ಷಕ್ಕಿಂತ ಹೆಚ್ಚು 5ಲಕ್ಷದವರೆಗೆ ಶೇ.10ರಷ್ಟಿದ್ದ ತೆರಿಗೆ ಶೇ.5ಕ್ಕೆ ಇಳಿಕೆಯಾಗಿರುವುದು ಸ್ವಾಗತಾರ್ಹ. ಗ್ರಾಮೀಣ ಭಾಗದ ಮನೆ ನಿರ್ಮಾಣಕ್ಕೆ ಕಡಿಮೆ ಬಡ್ಡಿದರದಲ್ಲಿ ಸಾಲ, ಮಧ್ಯಮವರ್ಗದವರಿಗೆ ಕಡಿಮೆ ವೆಚ್ಚದಲ್ಲಿ ಮನೆ ನಿರ್ಮಾಣ, ಇದಕ್ಕಾಗಿ ಹೊಸ ಹೌಸಿಂಗ್ ಯೋಜನೆ ಘೋಷಣೆ. ಇದರಿಂದಾಗಿ ಕುಸಿತವನ್ನು ಕಂಡಿದ್ದ ರಿಯಲ್ ಎಸ್ಟೇಟ್ ಕ್ಷೇತ್ರ ಚೇತರಿಸಿಕೊಳ್ಳಲಿದೆ. ಪ್ರವಾಸೋದ್ಯಮಕ್ಕೆ ಉತ್ತೇಜನ, ಸ್ತ್ರೀ ಸಬಲೀಕರಣಕ್ಕೆ 500ಕೋ.ರೂ. ಮೀಸಲು, ಮಹಿಳಾ ಶಕ್ತಿ ಕೇಂದ್ರ ಸ್ಥಾಪನೆ, 14 ಲಕ್ಷ ಅಂಗನವಾಡಿಗಳ ಸ್ಥಾಪನೆ. ಇದರಿಂದ ಮಹಿಳಾ ಉದ್ಯೋಗ ಮತ್ತು ಸಬಲೀಕರಣಕ್ಕೆ ಒತ್ತು ನೀಡಿದಂತಾಗಿದೆ ಎಂದು ಹೇಳಿದ್ದಾರೆ.
ದೂರದೃಷ್ಟಿಯ ಸಮಗ್ರ ಬಜೆಟ್: ಗಣೇಶ್ ಕಾರ್ಣಿಕ್
ಇದು ಸಮಗ್ರ ಬದಲಾವಣೆಯ ಶಿಸ್ತುಬದ್ಧ ದೂರದೃಷ್ಟಿಯ ಬಜೆಟ್. ವಿಜ್ಞಾನ ತಂತ್ರಜ್ಞಾನ, ಸಂಶೋಧನೆಗೆ ಪ್ರೋತ್ಸಾಹ ನೀಡುವುದರೊಂದಿಗೆ ದೇಶದ ರಕ್ಷಣಾ ಪಡೆಗಳ ಅಧುನೀಕರಣದ ನಿಟ್ಟಿನಲ್ಲಿ ಬಜೆಟ್ನಲ್ಲಿ ವಿಶೇಷ ಒತ್ತು ನೀಡಲಾಗಿದೆ. ರೈತರಿಗೆ ಹಾಗೂ ದುರ್ಬಲ ವರ್ಗದವರ ಏಳಿಗೆಗಾಗಿ ಅನೇಕ ಕಾರ್ಯಕ್ರಮಗಳನ್ನು ಘೋಷಿಸಲಾಗಿದೆ.
ಸಮತೋಲಿತ ಬಜೆಟ್
ಇದು ಸಮತೋಲಿತ ಬಜೆಟ್. ಎಲ್ಲ ಕ್ಷೇತ್ರ ಮತ್ತು ಜನರ ಹಿತವನ್ನು ಗಮನದಲ್ಲಿಟ್ಟುಕೊಂಡು ಮಂಡಿಸಲಾಗಿದೆ. ಗ್ರಾಮೀಣ ಕ್ಷೇತ್ರದ ಬೆಳವಣಿಗೆ ಸಹಿತ ಆರ್ಥಿಕ ಅಭಿವೃದ್ಧಿಗೆ ಆದ್ಯತೆ ನೀಡಲಾಗಿದೆ. ಗೃಹ ಯೋಜನೆ ಆಶಾದಾಯಕವಾಗಿದೆ. ಕಪ್ಪುಹಣ ನಿಯಂತ್ರಣದೊಂದಿಗೆ ರಿಯಲ್ ಎಸ್ಟೇಟ್ ಪುನಶ್ಚೇತನಕ್ಕೆ ಕ್ರಮ ಕೈಗೊಳ್ಳಲಾಗಿದೆ.
< ಡಿ.ಬಿ.ಮೆಹ್ತಾ, ಅಧ್ಯಕ್ಷರು, ಕ್ರೆಡೈ ಮಂಗಳೂರು
ಬಡವರು, ಮಧ್ಯಮ ವರ್ಗದ ಬಜೆಟ್: ಶಂಕರ ಪೂಜಾರಿ
ಉಡುಪಿ: ಯಾವುದೇ ಹೊಸ ತೆರಿಗೆಯನ್ನು ವಿಧಿಸದ ಈ ಬಾರಿಯ ಕೇಂದ್ರ ಬಜೆಟ್ ಬಡವರ, ರೈತರ, ಸಣ್ಣ ಉದ್ದಿಮೆದಾರರ, ದುಡಿಯುವ ಮತ್ತು ವಧ್ಯಮ ವರ್ಗದವರ ಪರವಾದ ಬಜೆಟ್ ಎಂದು ಉಡುಪಿ ಜಿಲ್ಲಾ ಬಿಜೆಪಿ ವಕ್ತಾರ ಕಟಪಾಡಿ ಶಂಕರ ಪೂಜಾರಿ ತಿಳಿಸಿದ್ದಾರೆ.