ಮಣಿಪಾಲ: ನರೇಗಾ ಪ್ರಗತಿ ಸಾಧಿಸಲು ಸಚಿವ ಪ್ರಮೋದ್ ಸೂಚನೆ

ಮಣಿಪಾಲ, ಫೆ.20: ಉದ್ಯೋಗ ಖಾತರಿ ಯೋಜನೆಯಡಿ ಕುಡಿಯುವ ನೀರಿಗಾಗಿ ಬಾವಿಯ ಬೇಡಿಕೆ ಜಿಲ್ಲೆಯಲ್ಲಿ ಜನರಿಂದ ವ್ಯಕ್ತವಾಗಿದ್ದು, ಜನರ ಬೇಡಿಕೆಗೆ ಸ್ಪಂದಿಸಿ ಎಂದು ರಾಜ್ಯ ಮೀನುಗಾರಿಕೆ, ಯುವಜನ ಸಬಲೀಕರಣ ಮತ್ತು ಕ್ರೀಡಾ ಸಚಿವ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಪ್ರಮೋದ್ ಮಧ್ವರಾಜ್ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಜಿಪಂ ಸಭಾಂಗಣದಲ್ಲಿ ಸೋಮವಾರ ನಡೆದ ತ್ರೈಮಾಸಿಕ ಕೆಡಿಪಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡುತ್ತಿದ್ದರು. ನರೇಗಾ ಯೋಜನೆಯಡಿ ಸಾಕಷ್ಟು ಅನುದಾನ ಲಭ್ಯವಿದ್ದು, ಮುಂದಿನ ತ್ರೈಮಾಸಿಕ ಸಭೆಯಲ್ಲಿ ಪ್ರಥಮವಾಗಿ ಜಿಲ್ಲೆಯ ನರೇಗಾ ಪ್ರಗತಿ ಪರಿಶೀಲನೆಯನ್ನು ನಡೆಸಿ ಬಳಿಕ ಕಾರ್ಯಸೂಚಿ ಪ್ರಕಾರ ಪ್ರಗತಿ ಪರಿಶೀಲನೆ ನಡೆಸಲಾಗುವುದು ಎಂದು ಪ್ರಮೋದ್ ಹೇಳಿದರು.

ಹಣವನ್ನು ಸದ್ಬಳಕೆ ಮಾಡಿ. ಕೃಷಿ ಹಾಗೂ ತೋಟಗಾರಿಕಾ ಸೇರಿದಂತೆ ಎಲ್ಲಾ ಇಲಾಖೆಗಳು ಪಿಡಿಒ ಮತ್ತು ಅಧಿಕಾರಿಗಳಿಗೆ ವಿಶೇಷ ಸಭೆ ಕರೆದು ನರೇಗಾದ ಗುರಿ ನಿಗದಿಪಡಿಸಿ ಎಂದರು. ಕ್ರಿಯಾಯೋಜನೆಯನ್ನು ಅತ್ಯಂತ ಸರಳೀಕರಿ ಸಲಾಗಿದೆ ಎಂದು ಸಿಇಒ ಪ್ರಿಯಾಂಕ ಹೇಳಿದರು.
ಯೋಜನೆಯಡಿ ಸಾಕಷ್ಟು ಹಣವಿದ್ದು, ಫಲಾನುಭವಿಗಳು ಅನುಷ್ಠಾನಕ್ಕೆ ಮುಂದಾಗಿದ್ದಾರೆ. ಅಧಿಕಾರಿಗಳು ಮನಸ್ಸು ಮಾಡುವ ಅಗತ್ಯವಿದೆ. ಬಹು ಮಾಧ್ಯಮ ಪ್ರಚಾರ ಈ ನಿಟ್ಟನಲ್ಲಿ ಆಗಬೇಕು ಎಂದರು. ಕೃಷಿ ಇಲಾಖೆಯಿಂದ ಅಲ್ಪ ಆಳದ ಬಾವಿ ನಿರ್ಮಾಣವಾಗಿದೆ. ನರೇಗಾದ ಬಗ್ಗೆ ಜನರಿಗೆ ಕರಪತ್ರ ಮೂಲಕ ಮಾಹಿತಿ ನೀಡಿ. ಹಟ್ಟಿ ಮನೆಗಳನ್ನು ಸೇರಿಸಿ.ಮಾಡಿದ ಕೆಲಸಕ್ಕೆ ಪ್ರಚಾರ ನೀಡಿ ಎಂದೂ ಅವರು ಸಲಹೆ ನೀಡಿದರು.

ಜಿಪಂ ಇಂಜಿನಿಯರಿಂಗ್ ವಿಭಾಗ ನರೇಗಾದಡಿ ನಡೆಸಿದ ಕಾಮಗಾರಿ ಬಗ್ಗೆ ಸಚಿವರು ಮಾಹಿತಿ ಕೇಳಿದರು. ಅಂಗನವಾಡಿ ಕಟ್ಟಡ, ಸಾಮೂಹಿಕ ಕಾಮಗಾರಿ ಗಳು ಇಲಾಖೆಯ ಮೂಲಕ ಆಗಿದೆ ಎಂದು ಅಧಿಕಾರಿಗಳು ಸಭೆಗೆ ಮಾಹಿತಿ ನೀಡಿದರು. ಹಣ ಖರ್ಚು ಮಾಡುವುದರಿಂದ ಹೆಚ್ಚಿನ ಅನುದಾನ ಪಡೆಯಲು ಸಾಧ್ಯವಿದೆ ಎಂದರು.

ವಸತಿ ಯೋಜನೆ:

ವಸತಿ ಯೋಜನೆಯಡಿ ಜಿಲ್ಲೆ ಉತ್ತಮ ಸಾಧನೆ ಮಾಡಿದ್ದು, ಹುಡ್ಕೊ ಸಾಲ ಮನ್ನಾ ಆಗಿದೆ ಎಂಬುದನ್ನು ಪ್ರತಾಪ್‌ಚಂದ್ರ ಶೆಟ್ಟಿ ಸಭೆಯ ಗಮನಸೆಳೆದರು. ಪಂಚಾಯಿತಿಗಳಿಂದ ಮಾಹಿತಿ ಸಂಗ್ರಹಿಸಲಾಗಿದ್ದು, ನಿಗಮಕ್ಕೆ ತಂತ್ರಾಂಶದಲ್ಲಿ ಅಳವಡಿಸಲು ಕೋರಿ ಪತ್ರ ಬರೆಯಲಾಗುವುದು ಎಂದು ವಸತಿ ಯೋಜನೆಯ ಅಧಿಕಾರಿಗಳು ಮಾಹಿತಿ ನೀಡಿದರು. ಹುಡ್ಕೊ ಸಾಲ ಮನ್ನಾ ಆಗಿದೆ. ಮನ್ನಾ ಆಗದಿದ್ದರೆ ನಿಗಮದ ಗಮನಕ್ಕೆ ತನ್ನಿ ಎಂದು ಇಒ ಹಾಗೂ ತಹಶೀಲ್ದಾರ್‌ಗಳಿಗೆ ಸಚಿವರು ಸೂಚನೆ ನೀಡಿದರು.

ಆಲೂರು ಸೌರ್ಪಣಿಕಾ ಯೋಜನೆಯ ಅಣೆಕಟ್ಟಿನ ನಿರ್ವಹಣೆ ಹಾಗೂ ಸೋರಿಕೆಯನ್ನು ನಿಲ್ಲಿಸುವ ಬಗ್ಗೆ ಪ್ರತಾಪ್‌ಚಂದ್ರ ಶೆಟ್ಟ ಹಾಗೂ ಸ್ಥಾಯಿ ಸಮಿತಿ ಅಧ್ಯಕ್ಷ ಬಾಬು ಶೆಟ್ಟಿ ಸಚಿವರ ಗಮನ ಸೆಳೆದರು. ಎಪ್ರಿಲ್ ತಿಂಗಳಲ್ಲಿ ಸಮಸ್ಯೆ ನಿವಾರಿಸುವ ಬಗ್ಗೆ, ಮೂರು ಗ್ರಾಪಂಗಳ ರೈತರ ಸೊಸೈಟಿಗೆ ಹಸ್ತಾಂತರ ಮಾಡಲಾಗುವುದು ಎಂದು ವಾರಾಹಿ ಯೋಜನೆ ಇಂಜಿನಿಯರ್ ತಿಳಿಸಿದರು.

ಜಿಲ್ಲೆಯಲ್ಲಿರುವ 157 ಕಿಂಡಿ ಅಣೆಕಟ್ಟುಗಳ ನಿರ್ವಹಣೆಗೆ 3.22 ಕೋಟಿ ರೂ. ಅಗತ್ಯವಿದ್ದು, ನಮ್ಮ ಜಿಲ್ಲೆಗೆ ಬರುವ ಕೆರೆ ಸಂಜೀವಿನಿ ದುಡ್ಡನ್ನು ಕಿಂಡಿ ಅಣೆಕಟ್ಟು ನಿರ್ವಹಣೆಗೆ ನೀಡಲು ಇಲಾಖಾ ಕಾರ್ಯದರ್ಶಿಗಳಿಗೆ ವಿನಂತಿಸಿರುವುದಾಗಿ ಪ್ರಮೋದ್ ತಿಳಿಸಿದರು. ಕುಡಿಯುವ ನೀರು: ಗ್ರಾಮೀಣ ಪ್ರದೇಶದ ಜನರಿಗೆ ಕುಡಿಯುವ ನೀರು ಕೊರತೆಯಾಗದಂತೆ ನೋಡಿಕೊಳ್ಳಬೇಕು. ಜನರಿಗೆ ಕುಡಿಯಲು ನೀರು ಕೊಡದಿದ್ದರೆ ಕಠಿಣ ಕ್ರಮದ ಎಚ್ಚರಿಕೆಯನ್ನು ಸಚಿವರು ನೀಡಿದರು. ಗ್ರಾಪಂಗೆ ಈಗಾಗಲೇ ನೀರಿಗೆ ಬೇಡಿಕೆ ಬರುತ್ತಿದ್ದು, ಅವರು ಅದನ್ನು ಗಂಭೀರವಾಗಿ ಪರಿಗಣಿಸುತ್ತಿಲ್ಲ. ಇಒಗಳು ಈ ನಿಟ್ಟಿನಲ್ಲಿ ಹೆಚ್ಚಿನ ಗಮನಹರಿಸಲು ಸಚಿವರು ಸೂಚನೆ ನೀಡಿದರು.

ಈಗಾಗಲೇ ಕುಡಿಯುವ ನೀರು ಸಂಬಂಧ ಹೆಲ್ಪ್‌ಲೈನ್‌ಗಳನ್ನು ಆರಂಭಿಸ ಲಾಗಿದೆ ಎಂದು ಸಿಇಒ ಹೇಳಿದರು. ತಾಪಂಗಳ ಇಒಗಳೇ ಕುಡಿಯುವ ನೀರು ಪೂರೈಸಲು ಹೊಣೆಗಾರರಾಗಿರುತ್ತಾರೆ ಎಂದು ಸಚಿವರು ಸ್ಪಷ್ಟ ಪಡಿಸಿದರು.

ಕೂರಾಡಿ ಸೇತುವೆ ಕಾಮಗಾರಿ ಮಾರ್ಚ್ ಅಂತ್ಯದೊಳಗೆ ಪೂರ್ಣಗೊಳ್ಳಲಿದೆ ಎಂದು ಇಂಜಿನಿಯರ್ ಭರವಸೆ ನೀಡಿದರು. ಸಾರ್ವಜನಿಕ ಶಿಕ್ಷಣ ಇಲಾಖೆ ಯಲ್ಲಿ ಆರ್‌ಟಿಇ ಸೀಟುಗಳನ್ನು ನೀಡುವ ಬಗ್ಗೆ ಸಚಿವರು ವಿದ್ಯಾಂಗ ಉಪನಿರ್ದೇಶಕರಿಂದ ಮಾಹಿತಿ ಪಡೆದರು.

ಕಳೆದ ಸಲದಂತೆ ಈ ಬಾರಿ ಲಾಟರಿ ಮುಖಾಂತರವೇ ಸೀಟು ನೀಡುವುದಾಗಿ ಡಿಡಿಪಿಐ ಹೇಳಿದರು.

ರಾಜ್ಯಕ್ಕೆ ಪ್ರಥಮ: ದಡಾರ-ರುಬೆಲ್ಲಾ (ಎಂಆರ್) ಲಸಿಕೆ ಕಾರ್ಯಕ್ರಮ ದಲ್ಲಿ ಉಡುಪಿ ಜಿಲ್ಲೆ ರಾಜ್ಯಕ್ಕೆ ಪ್ರಥಮ ಸ್ಥಾನದಲ್ಲಿದೆ. ಜಿಲ್ಲೆಯಲ್ಲಿ ಶೇ.74 ಸಾಧನೆ ಮಾಡಲಾಗಿದೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ರೋಹಿಣಿ ಸಭೆಗೆ ತಿಳಿಸಿದರು.

ಜಿಲ್ಲೆಯಲ್ಲಿ 75 ಟಿಬಿ ಪ್ರಕರಣಗಳನ್ನು ಪತ್ತೆ ಹಚ್ಚಲಾಗಿದ್ದು, ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಜಿಲ್ಲೆಯಲ್ಲಿ 30 ಎಚ್1ಎನ್1 ಪ್ರಕರಣ ದಾಖಲಾಗಿವೆ. ಇಬ್ಬರು ಮೃತಪಟ್ಟಿದ್ದಾರೆ ಎಂದವರು ಮಾಹಿತಿ ನೀಡಿದರು. ಸಭೆಯಲ್ಲಿ ಜಿಪಂ ಸಾಮಾಜಿಕ ನ್ಯಾಯ ಸ್ಥಾಯಿ ಸಮಿತಿ ಅಧ್ಯಕ್ಷ ಕೆ.ಬಾಬು ಶೆಟ್ಟಿ, ನಾಮ ನಿರ್ದೇಶಿತ ಸದಸ್ಯರಾದ ಉಮೇಶ್‌ಎ. ನಾಯ್ಕಿ, ರಾಜು ಪೂಜಾರಿ, ಇಗ್ನೇಶಿಯಸ್ ಡಿಸೋಜ,ದೇವಾನಂದ ಶೆಟ್ಟಿ, ಕವಿತಾ ಉಪಸ್ಥಿತ ರಿದ್ದರು.