ಸಿಆರ್‌ಝಡ್ ವ್ಯಾಪ್ತಿಯಲ್ಲಿ ಮರಳು ಗಣಿಗಾರಿಕೆಗೆ ಅವಕಾಶವಿಲ್ಲ: ಚೆನ್ನೈ ಹಸಿರು ಪೀಠದ ತೀರ್ಪು

ಉಡುಪಿ, ಫೆ.27: ಉಡುಪಿ ಜಿಲ್ಲೆಯ ಕರಾವಳಿ ನಿಯಂತ್ರಣ ವಲಯ (ಸಿಆರ್‌ಝಡ್) ವ್ಯಾಪ್ತಿಯಲ್ಲಿ ಮರಳುಗಾರಿಕೆಗೆ ವಿಧಿಸಿರುವ ತಡೆಯಾಜ್ಞೆಗೆ ಸಂಬಂಧಿಸಿದಂತೆ ಚೆನ್ನೈನ ಹಸಿರುಪೀಠದ ತೀರ್ಪು ಇಂದು ಹೊರಬಂದಿದ್ದು, ಮರಳು ದಿಬ್ಬಗಳ ತೆರವಿನ ನೆಪದಲ್ಲಿ ಮರಳು ಗಣಿಗಾರಿಕೆಗೆ ಅವಕಾಶ ನೀಡಲು ಸಾಧ್ಯವಿಲ್ಲ ಎಂದು ಹೇಳಿದೆ.

ಸಿಆರ್‌ಝಡ್ ವ್ಯಾಪ್ತಿಯಲ್ಲಿ ಮರಳುಗಾರಿಕೆಯಿಂದ ಉಡುಪಿ ತಾಲೂಕಿನ ಬೈಕಾಡಿ, ಹಾರಾಡಿ ಗ್ರಾಮಗಳ ವ್ಯಾಪ್ತಿಯಲ್ಲಿ ಜನತೆಗೆ ಉಂಟಾದ ಅನೇಕ ಬಗೆಯ ಸಮಸ್ಯೆಗಳಿಂದ ಬೇಸತ್ತು ಬೇರೆ ಉಪಾಯ ಕಾಣದೇ ಬೈಕಾಡಿಯ ಉದಯ ಸುವರ್ಣ ಸೇರಿದಂತೆ ಹಲವು ಗ್ರಾಮಸ್ಥರು ಹಸಿರು ಪೀಠಕ್ಕೆ ಸಾರ್ವಜನಿಕ ಹಿತಾಸಕ್ತಿಯ ಅರ್ಜಿ ಸಲ್ಲಿಸಿದ್ದು, ಕಳೆದ ಮೇ 17ರಂದು ಹಸಿರು ಪೀಠ ಮರಳುಗಾರಿಕೆಗೆ ತಡೆಯಾಜ್ಞೆ ವಿಧಿಸಿತ್ತು.

 ಅರ್ಜಿಯ ವಿಚಾರಣೆ ಮುಗಿಸಿದ ಹಸಿರು ಪೀಠ ಕಳೆದ ಜ.6ರಂದು ವಿಚಾರಣೆ ಮುಗಿಸಿ ತನ್ನ ತೀರ್ಪನ್ನು ಕಾದಿರಿಸಿತ್ತು. ಇಂದು ನೀಡಿದ ತೀರ್ಪು ಅರ್ಜಿದಾರರಾದ ಉದಯ ಸುವರ್ಣ ಹಾಗೂ ಇತರ ಗ್ರಾಮಸ್ಥರ ಪರವಾಗಿ ಬಂದಂತಾಗಿದೆ ಎಂದು ಅರ್ಜಿದಾರರ ಪರ ವಕೀಲ ರಂಜನ್ ಶೆಟ್ಟಿ ತಿಳಿಸಿದ್ದಾರೆ.
 ಸಿಆರ್‌ಝಡ್ ವ್ಯಾಪ್ತಿಯ ಮರಳು ದಿಬ್ಬಗಳ ತೆರವಿಗೆ ಕೇಂದ್ರ ಪರಿಸರ ಮತ್ತು ಅರಣ್ಯ ಸಚಿವಾಲಯದ ಮಾರ್ಗದರ್ಶಿ ಸೂತ್ರಗಳಲ್ಲಿ ಹೆಚ್ಚಿನದನ್ನು ಇಲ್ಲಿ ಅನುಸರಿಸಲಾಗಿಲ್ಲ ಎಂದು ಪೀಠ ತೀರ್ಪಿನಲ್ಲಿ ಹೇಳಿದೆ.

ಮರಳು ದಿಬ್ಬಗಳನ್ನು ಗುರುತಿಸಿದ ಕ್ರಮವೇ ತಪ್ಪಾಗಿದೆ. ಇದರಲ್ಲಿ ಉಡುಪಿ ಜಿಲ್ಲಾಡಳಿತ ಸ್ಥಳೀಯ ನಾಗರಿಕರನ್ನು ವಿಶ್ವಾಸಕ್ಕೆ ತೆಗೆದುಕೊಂಡಿಲ್ಲ. ಮರಳು ದಿಬ್ಬಗಳ ಗುರುತಿಸುವಿಕೆ ಯಲ್ಲಿ ಸ್ಥಳೀಯರ ಒಳಗೊಳ್ಳುವಿಕೆ ಕಡ್ಡಾಯ ಎಂದು ಸಚಿವಾಲಯದ ಆದೇಶ ಸ್ಪಷ್ಟವಾಗಿ ಹೇಳಿತ್ತು ಎಂದು ಪೀಠ ತಿಳಿಸಿದೆ.

ಜಿಲ್ಲಾಡಳಿತ ಮರಳು ಗುತ್ತಿಗೆಯನ್ನು ನೀಡುವಾಗ ಸುರತ್ಕಲ್ ಎನ್‌ಐಟಿಕೆಯ ತಜ್ಞರ ತಾಂತ್ರಿಕ ವರದಿಯನ್ನು ಪಡೆಯುವ ಬದಲು ಅದರ ನಿವೃತ್ತ ಪ್ರಾಧ್ಯಾಪಕರಾದ ಡಾ.ಮಯ್ಯರಿಂದ ಪಡೆದ ತಾಂತ್ರಿಕ ವರದಿಯನ್ನು ಪರಿಗಣಿಸಿತ್ತು. ಇದು ಜಿಲ್ಲಾಡಳಿತದ ಇನ್ನೊಂದು ನಿಯಮ ಉಲ್ಲಂಘನೆ ಯಾಗಿದೆ ಎಂದು ಹಸಿರು ಪೀಠ ಹೇಳಿದೆ.

ಆದುದರಿಂದ ಮರುಳುಗಾರಿಕೆಗೆ ಈಗ ನೀಡಿರುವ ಎಲ್ಲಾ ಗುತ್ತಿಗೆಗಳನ್ನು ರದ್ದುಪಡಿಸಲಾಗಿದೆ ಎಂದು ಪೀಠ ತೀರ್ಪಿನಲ್ಲಿ ತಿಳಿಸಿದೆ. ಜಿಲ್ಲಾಡಳಿತ ಮಾಡಿದ ಮತ್ತೊಂದು ಗುರುತರ ಲೋಪವೆಂದರೆ, ಮರಳು ದಿಬ್ಬಗಳ ಗುರುತಿಸುವಿಕೆಗಾಗಿ ಸ್ಥಳ ಪರಿಶೀಲನೆಗೆ ನಿಗದಿ ಪಡಿಸಿದ ದಿನಕ್ಕಿಂತ ಮೊದಲೇ ಜಿಲ್ಲಾಡಳಿತ ಮರಳು ದಿಬ್ಬ ಗುರುತಿಸಿದ ದಾಖಲೆಗಳನ್ನು ತಾಂತ್ರಿಕ ವರದಿಗಾಗಿ ಪ್ರೊ.ಮಯ್ಯ ಅವರಿಗೆ ಸಲ್ಲಿಸಿತ್ತು ಎಂದು ಹೇಳಲಾಗಿದೆ.

ಸಚಿವಾಲಯದ ಮಾರ್ಗದರ್ಶಿ ಸೂತ್ರದಂತೆ ಮೀನುಗಾರಿಕಾ ದೋಣಿಗಳ ಸಂಚಾರಕ್ಕೆ ತೊಂದರೆ ಉಂಟು ಮಾಡುವ ಮರಳು ದಿಬ್ಬಗಳನ್ನು ಮಾತ್ರ ತೆರವು ಗೊಳಿಸಲು ಅವಕಾಶವಿದೆ. ಅಲ್ಲದೇ ಮರಳು ದಿಬ್ಬ ತೆರಳಿಗೆ ರಚಿಸಬೇಕಾದ ಏಳು ಮಂದಿ ಸದಸ್ಯರ ಸಮಿತಿಯನ್ನು ಎಂಓಇಎಫ್‌ನ ನೋಟಿಫಿಕೇಶನ್‌ನಂತೆ ರಚಿಸಿಲ್ಲ ಎಂದು ಪೀಠ ಅಭಿಪ್ರಾಯ ಪಟ್ಟಿದೆ ಎಂದು ರಂಜನ್ ಶೆಟ್ಟಿ ತೀರ್ಪಿನ ಬಗ್ಗೆ ವಿವರಿಸುತ್ತಾ ತಿಳಿಸಿದರು.

ಸಂಪೂರ್ಣ ತೃಪ್ತಿ ಇಲ್ಲ:

ಚೆನ್ನೈನ ಹಸಿರು ಪೀಠ ಸಿಆರ್‌ಝಡ್ ವಲಯದಲ್ಲಿ ಮರಳುಗಾರಿಕೆ ಕುರಿತಂತೆ ನೀಡಿದ ತೀರ್ಪು ತಮ್ಮ ಪರವಾಗಿ ಬಂದಿದ್ದರೂ, ಅದು ಸಂಪೂರ್ಣ ತೃಪ್ತಿಯನ್ನು ನೀಡಿಲ್ಲ ಎಂದು ಅರ್ಜಿದಾರರಲ್ಲಿ ಒಬ್ಬರಾದ ಉದಯ ಸುವರ್ಣ ತಿಳಿಸಿದರು.

  ತೀರ್ಪು ನಮ್ಮ ಪರವಾಗಿ ಬಂದಿದೆ. ಆದರೆ ಪರಿಸರ ನಾಶ ಮಾಡಿದವರಿಗೆಲ್ಲಾ ದಂಡವನ್ನು ವಿಧಿಸಿ, ಮುಂದೆ ಇಂಥ ಕೆಲಸಕ್ಕೆ ಮುಂದಾಗುವವರಿಗೆ ಎಚ್ಚರಿಕೆ ನೀಡಬೇಕಿತ್ತು ಎಂದುಹೇಳಿದ ಅವರು, ಇದೀಗ ಹಿಂದಿನ ಗುತ್ತಿಗೆಗಳೆಲ್ಲವೂ ರದ್ದಾಗಿರುವುದರಿಂದ, ಮರಳು ದಿಬ್ಬಗಳನ್ನು ಮತ್ತೆ ಗುರುತಿಸಬೇಕಾಗಿದೆ ಎಂದರು.

ಮೀನುಗಾರಿಕೆಗೆ ತಡೆಯೊಡ್ಡುವ ಮರಳು ದಿಬ್ಬಗಳೇ ಜಿಲ್ಲೆಯಲ್ಲಿ ಇಲ್ಲದಿರುವುದರಿಂದ, ಯಾವ ರೀತಿ ಮರು ಸರ್ವೆ ಮಾಡಿ, ಮಾರ್ಗದರ್ಶಿ ಸೂತ್ರದಂತೆ ಮರಳುದಿಬ್ಬಗಳ ತೆರವಿಗೆ ಜಿಲ್ಲಾಡಳಿತ ಅವಕಾಶ ನೀಡಲಿದೆ ಎಂಬುದು ಕುತೂಹಲಕ್ಕೆಡೆ ಮಾಡಿದೆ.