ಎಳನೀರು ಪ್ರದೇಶದ ಜನರಿಗೆ ಮೂಲಭೂತ ಸೌಲಭ್ಯಗಳನ್ನು ಒದಗಿಸಲು ಜಿಪಂ ಕಾರ್ಯನಿರ್ವಹಣಾಧಿಕಾರಿ ರವಿ ಆಶ್ವಾಸನೆ

ಬೆಳ್ತಂಗಡಿ, ಫೆ.28: ಕುದುರೆಮುಖ ರಾಷ್ಟ್ರೀಯ ಉಧ್ಯಾನವನದೊಳಗಿರುವ ಎಳನೀರು ಪ್ರದೇಶದ ಜನರಿಗೆ ಮೂಲಭೂತ ಸೌಲಭ್ಯಗಳನ್ನು ಒದಗಿಸಲು ಅರಣ್ಯ ಇಲಾಖೆಯಿಂದ ತೊಡಕಾಗುತ್ತಿದ್ದು ಅದನ್ನು ಪರಿಹರಿಸಲು ಬೆಳ್ತಂಗಡಿಯಲ್ಲಿ ಎಲ್ಲ ಇಲಾಖೆಗಳ ಹಿರಿಯ ಅಧಿಕಾರಿಗಳ ಸಭೆಯನ್ನು ಮಾರ್ಚ್ ತಿಂಗಳಿನಲ್ಲಿ ನಡೆಸಲಾಗುವುದು. ಈ ಪ್ರದೇಶದ ಸಮಸ್ಯೆಗಳಿಗೆ ಪರಿಹಾರ ಕಾಣುವ ಪ್ರಾಮಾಣಿಕ ಪ್ರಯತ್ನ ನಡೆಸಲಾಗುವುದು ಎಂದು ಜಿಲ್ಲಾ ಪಂಚಾಯತು ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಎಂ.ಆರ್ ರವಿ ಹೇಳಿದರು.

ಅವರು ಮಂಗಳವಾರ ಮಲವಂತಿಗೆ ಗ್ರಾ.ಪಂ ವ್ಯಾಪ್ತಿಯ ದುರ್ಗಮ ಪ್ರದೇಶವಾದ ಎಳನೀರು ಎಂಬಲ್ಲಿನ ಸಮುದಾಯಭವನದಲ್ಲಿ ಏರ್ಪಡಿಸಲಾಗಿದ್ದ ಸ್ಥಳೀಯರೊಂದಿಗಿನ ಸಮಾಲೋಚನಾಸಭೆಯಲ್ಲಿ ಜನರ ಸಮಸ್ಯೆಗಳನ್ನು ಆಲಿಸಿ ಬಳಿಕ ಮಾತನಾಡುತ್ತಾ ಈ ವಿಚಾರ ತಿಳಿಸಿದರು.

ಸಭೆಯಲ್ಲಿ ವಿವಿಧ ಇಲಾಖೆಗಳು ಕಾಮಗಾರಿ ನಡೆಸಲು ಅರಣ್ಯ ಇಲಾಖೆಯಿಂದ ಇರುವ ಆಕ್ಷೇಪದ ಬಗ್ಗೆ ತಿಳಿಸಿದಾಗ ಚಿಕ್ಕಮಗಳೂರು ಜಿಲ್ಲೆಯಲ್ಲಿರುವ ನೆರೆಯ ಗ್ರಾಮಗಳಲ್ಲಿ ರಾಷ್ಟ್ರೀಯ ಉಧ್ಯಾನವನದೊಳಗೆ ಕಾಮಗಾರಿಗಳು ನಡೆದಿದೆ ಆದರೆ ಇಲ್ಲಿ ಮಾತ್ರ ಯಾಕೆ ನಡೆಯುತ್ತಿಲ್ಲ ಎಂದು ಜನರು ಪ್ರಶ್ನಿಸಿದರು.

ಇದಕ್ಕೆ ಅರಣ್ಯ ಇಲಾಖೆಯ ಅಧಿಕಾರಿಗಳು ಕಾನೂನು ಪ್ರಕಾರ ಅರ್ಜಿನೀಡಿದರೆ ಅದನ್ನು ಹಿರಿಯ ಅಧಿಕಾರಿಗಳು ಪರಿಶೀಲಿಸಿ ಅನುಮತಿ ನೀಡುವ ಅಧಿಕಾರ ಹೊಂದಿರುತ್ತಾರೆ ಎಂದು ತಿಳಿಸಿದರು. ಇಲಾಖೆಗಳ ನಡುವೆ ಇರುವ ಗೊಂದಲಗಳನ್ನು ಪರಿಹರಿಸಲು ಸಂಬಂಧಿಸಿದ ಎಲ್ಲ ಇಲಾಖೆಗಳ ಹಿರಿಯ ಅಧಿಕಾರಿಗಳ ಸಭೆಯನ್ನು ಬೆಳ್ತಂಗಡಿಯಲ್ಲಿ ನಡೆಸಿ ಪರಿಹಾರ ಕಂಡುಕೊಳ್ಳಲಾಗುವುದು ಎಂದು ಜಿ.ಪಂ ಕಾರ್ಯನಿರ್ವಹಣಾಧಿಕಾರಿಯವರು ತಿಳಿಸಿದರು.

ಎಳನೀರಿನಲ್ಲಿ ನಿರ್ಮಾಣವಾಗಿರುವ ಸಮಾಜಮಂದಿರ, ಅಂಗನವಾಡಿಕೇಂದ್ರ ಹಾಗೂ ಆರೋಗ್ಯ ಉಪಕೇಂದ್ರಕ್ಕೆ ನೀರಿನ ವ್ಯವಸ್ತೆಯನ್ನು ಒದಗಿಸಲಾಗಿಲ್ಲ ಅದರಿಂದಾಗಿ ಕಾಮಗಾರಿ ಮುಗಿದಿದ್ದರೂ ಅದು ಯಾವುದೂ ಪ್ರಯೋಜನವಾಗುತ್ತಿಲ್ಲ ಎಂದು ಜನರು ತಿಳಿಸಿದಾಗ ಇಲ್ಲಿಗೆ ನೀರೊದಗಿಸಲು ಅಗತ್ಯಕ್ರಮ ಕೈಗೊಳ್ಳುವಂತೆ ಅಧಿಕಾರಿಗಳಿಗೆ ಸೂಚಿಸಿದರು. ಕೊಳವೆ ಬಾವಿಕೊರೆಯುವ ಬದಲು ನೈಸರ್ಗಿಕ ನೀರಿನ ಮೂಲವನ್ನು ಉಪಯೋಗಿಸುವ ಕಾರ್ಯ ಮಾಡುವಂತೆ ಅವರು ಸೂಚಿಸಿದರು.

ಗುತ್ಯಡ್ಕಕ್ಕೆ ಅಂಗನವಾಡಿ ಕೇಂದ್ರ ಮಂಜೂರಾಗಿದ್ದು ಇದಕ್ಕೆ 9.17 ಲಕ್ಷ ಅನುದಾನ ಮಂಜೂರಾಗಿದೆ. ಉಧ್ಯೋಗಖಾತರಿ ಯೋಜನೆಯಲ್ಲಿ ಐದುಲಕ್ಷ ಅನುದಾನವನ್ನು ಒದಗಿಸಲಾಗುತ್ತಿದ್ದು ಮಾದರಿರೀತಿಯಲ್ಲಿ ಅಂಗನವಾಡಿ ಕೇಂದ್ರವನ್ನು ನಿರ್ಮಿಸಲಾಗುವುದು ಮೂರು ತಂಗಳಿನಲ್ಲಿ ಕಾಮಗಾರಿಯನ್ನು ಪೂರ್ಣಗೊಳಿಸಲಾಗುವುದು ಎಂದು ತಿಳಿಸಿದರು.

ಎಳೆನೀರು ಪರಿಸರದ ವಿವಿಧ ರಸ್ತೆಗಳ ಕಾಂಕ್ರೀಟೀಕರಣಕ್ಕಾಗಿ ಐಟಿಡಿಪಿ ಇಲಾಖೆಯಿಂದ ಸುಮಾರು ಒಂಬತ್ತುಕೋಟಿಯ ಪ್ರಸ್ತಾವನೆಗಳನ್ನು ಸಲ್ಲಿಸಲಾಗಿದೆ ಆದರೆ ಯಾವುದು ಮಂಜೂರಾಗಿಲ್ಲ ಎಂದು ಸಭೆಗೆ ತಿಳಿಸಲಾಯಿತು.

ಸಭೆಯ ಉದ್ಘಾಟನೆಯನ್ನು ಜಿಲ್ಲಾ ಪಂಚಾಯತು ಸಾಮಾಜಿಕ ನ್ಯಾಯಸಮಿತಿಯ ಅಧ್ಯಕ್ಷೆ ಆಶಾ ತಿಮ್ಮಪ್ಪಗೌಡ ಅವರು ನೆರವೇರಿಸಿ ಮಾತನಾಡುತ್ತಾ ಇಂತಹ ಗುಡ್ಡಗಾಡು ಪ್ರದೇಶದಲ್ಲಿ ವಾಸಿಸುವ ಜನರಲ್ಲಿ ಧೈರ್ಯತುಂಬಲು ಈ ಕಾರ್ಯಕ್ರಮವನ್ನು ಆಯೋಜುಸಲಾಗಿದೆ. ಇಲ್ಲಿನ ಜನರ ಸಮಸ್ಯೆಗಳಿಗೆ ಪರಿಹಾರ ಕಾಣಲು ಎಲ್ಲ ರೀತಿಯ ಪ್ರಯತ್ನಗಳನ್ನೂ ನಡೆಸುವುದಾಗಿ ತಿಳಿಸಿದರು.

ಸಭೆಯಲ್ಲಿ ಸ್ಥಳೀಯ ಜಿ.ಪಂ ಸದಸ್ಯೆ ಸೌಮ್ಯಲತ, ತಾ. ಪಂ ಉಪಾಧ್ಯಕ್ಷೆ ವೇದಾವತಿ, ತಾ. ಪಂ ಸದಸ್ಯ ಜಯರಾಮಗೌಡ, ಬೆಳ್ತಂಗಡಿ ತಹಶೀಲ್ದಾರ್ ತಿಪ್ಪೆಸ್ವಾಮಿ, ಜಿ.ಪಂ ಉಪಕಾರ್ಯದರ್ಶಿ ಎನ್ ಆರ್ ಉಮೇಶ್, ಗ್ರಾ. ಪಂ ಅಧ್ಯಕ್ಷ ಭಾಸ್ಕರ ಪೂಜಾರಿ, ತಾ.ಪಂ ಕಾರ್ಯನಿರ್ವಹಣಾಧಿಕಾರಿ ಸಿ ಆರ್ ನರೇಂದ್ರ ಹಾಗೂ ಇತರ ಅಧಿಕಾರಿಗಳು ಉಪಸ್ಥಿತರಿದ್ದರು. ಸ್ಥಳೀಯ ಗಾ. ಪಂ ಸದಸ್ಯ ಪ್ರಕಾಶ್ ಜನರ ಸಮಸ್ಯೆಗಳನ್ನು ಮುಂದಿಟ್ಟರು. ಜಯಾನಂದ ಲಾಯಿಲ ಕಾರ್ಯಕ್ರಮ ನಿರೂಪಸಿದರು.

ಕಟ್ಟೆಯೊಡೆದ ಆಕ್ರೋಶ: 
 ಸಭೆಯಲ್ಲಿ ಆರಂಭದಲ್ಲಿ ಇಲಾಖೆಗಳ ಮಾಹಿತಿ ನೀಡಲು ಮುಂದಾದಾಗ ಸೇರಿದ್ದ ಜನರು ನಮಗೆ ಮಾಹಿತಿ ಕೇಳಿ ಸಾಕಾಗಿದೆ ನಮ್ಮ ಸಮಸ್ಯೆಗಳ ಬಗ್ಗೆ ಮಾತನಾಡಿ ಎಂದು ಒತ್ತಾಯಿಸಿದರು. ಬಳಿಕ ತಮ್ಮ ಅಹವಾಲುಗಳನ್ನು ಮುಂದಿಟ್ಟ ಸಾರ್ವಜನಿಕರು ಈ ಹಿಂದೆ ಇಂತಹ ಹಲವು ಸಭೆಗಳು ನಡೆದಿದೆ ಆದರೆ ಫಲಿತಾಂಶ ಮಾತ್ರ ಏನೂ ಕಾಣಿಸಲಿಲ್ಲ ಈ ಸಭೆಯೂ ಹಾಗಾದಿರಲಿ ಇಲ್ಲಿ ರಸ್ತೆಗಳು ಇಲ್ಲ, ವಿಧ್ಯುತ್ ಸಂಪರ್ಕ ಇಲ್ಲ ಕನಿಷ್ಟ ಒಂದು ದೂರವಾಣಿ ಸಂಪರ್ಕವೂ ಇಲ್ಲದಂತಹ ಸ್ಥಿತಿಯಲ್ಲಿ ಬದುಕನ್ನು ನಡೆಸಬೇಕಾದ ಅನಿವಾರ್ಯತೆ ನಮ್ಮದಾಗಿದೆ ನಾವು ಬದುಕಿರುವಾಗ ಎಲ್ಲ ಊರುಗಳಂತೆ ನಮ್ಮೂರೂ ಅಭಿವೃದ್ದಿಯಾಗುವುದನ್ನು ಕಾಣಲು ಸಾಧ್ಯವಾಗಲಾರದು ಎಂದು ನೋವನ್ನು ವ್ಯಕ್ತಪಡಿಸಿದರು.

ದಿಡುಪೆಯಿಂದ ಎಳನೀರುವರೆಗೆ ರಸ್ತೆ ನಿರ್ಮಿಸಿಕೊಡುವಂತೆ ಬೇಡಿಕೆಯಿಟ್ಟು ಹೋರಾಟ ನಡೆಸಿ ಸಾಕಾಗಿದೆ ಅಧಿಕಾರಿಗಳು ಭರವಸೆ ನೀಡಿ ವಂಚಿಸುವ ಕಾರ್ಯವನ್ನು ಮಾತ್ರ ಮಾಡುತ್ತಿದ್ದಾರೆ ಎಂದು ದೂರಿದ ಅರುಣ್ ಕುಮಾರ್ ಅವರು ಅದು ಸಾಧ್ಯವಾಗದಿದ್ದರೆ ಎಳನೀರಿನಿಂದ ಬಂಗಾರಪಲ್ಕೆ, ಕುಡಿಚಾರು, ಬಡಮನೆ, ಪ್ರದೇಶಗಳಿಗೆ ಹೋಗುವ ರಸ್ತೆಗಳನ್ನಾದರೂ ಸರಿಪಡಿಸುವಂತೆ ಮನವಿ ಮಾಡಿದರು.

ಕುದುರೇಮುಖ ರಾಷ್ಟ್ರೀಯ ಉಧ್ಯಾನವನದೊಳಗಿನ ನಿವಾಸಿಗಳ ಪುನರ್ವಸತಿ ಪ್ಯಾಕೇಜ್ ಅನ್ನು ಸರಿಯಾಗಿ ಅನುಷ್ಟಾನಗೊಳಿಸುವಂತೆ ಹಾಗೂ ಪರಿಹಾರ ನೀಡುವಂತೆ ಒತ್ತಾಯಿಸಲಾಯಿತು. ನಕ್ಸಲ್ ಪ್ಯಾಕೇಜ್‌ನಲ್ಲಿ ಈ ಹಿಂದೆ ಹಲವು ಕಾಮಗಾರಿಗಳಿಗೆ ಅನುದಾನ ಮಂಜೂರಾಗಿದ್ದರೂ ಅರಣ್ಯ ಇಲಾಖೆಯ ಅಡ್ಡಿಯಿಂದಾಗಿ ಸಾಧ್ಯವಾಗಲಿಲ್ಲ ಎಂದು ಸೇರಿದ್ದ ಜನರು ವಿವರಿಸಿದರು.

 ವಿದ್ಯುತ್ ಸಮಸ್ಯೆಗೆ ಪರಿಹಾರ ಭರವಸೆ:

ಎಳೆ ನೀರು ಪ್ರದೇಶದಲ್ಲಿ ಸುಮಾರು 150 ರಷ್ಟು ಮನೆಗಳಿದ್ದು ಹೆಚ್ಚಿನ ಮನೆಗಳಿಗೆ ವಿಧ್ಯುತ್ ಸಂಪರ್ಕ ಇನ್ನೂ ಲಭಿಸಿಲ್ಲ ಇರುವಲ್ಲಿಯೂ ವೋಲ್ಟೇಜ್ ಇಲ್ಲದೆ ಸಮಸ್ಯೆಯಿದೆ ಎಂದು ತಿಳಿಸಿದಾಗ ಹೆಚ್ಚುವರಿ ಪರವರ್ತಕಗಳನ್ನು ಅಳಡಿಸುವ ಭರವಸೆಯನ್ನು ಮೆಸ್ಕಾಂ ಸಹಾಯಕ ಇಂಜಿನಿಯರ್ ಶಿವಶಂಕರ್ ನೀಡಿದರು. ಎಲ್ಲ ಮನೆಗಳಿಗೂ ವಧ್ಯುತ್ ಸಂಪರ್ಕ ಒದಗಿಸಲು ಸರಕಾರ ಮುಂದಾಗುತ್ತಿದೆ ಆದರೆ ಅರಣ್ಯ ಇಲಾಖೆಯ ಅಡ್ಡಿಯಿಂದಾಗಿ ಇಲ್ಲಿ ಅದು ಸಾಧ್ಯವಾಗುತ್ತಿಲ್ಲ ಎಂದು ತಿಳಿಸಿದರು.

ಇಂತಹ ಪ್ರದೇಶಗಳಿಗಾಗಿ ಸೋಲಾರ್ ಅಳವಡಿಸುವ ಯೋಜನೆಯನ್ನು ಹೊಂದಿರುವುದಾಗಿ ತಿಳಿಸಿದಾಗ ತಮಗೆ ಸೋಲಾರ್ ಬೇಡ ಎಂದು ಜನರು ತಿಳಿಸಿದರು, ಜಿ.ಪಂ ಕಾರ್ಯನಿರ್ವಹಣಾಧಿಕಾರಿಯವರು ಸ್ಥಳೀಯವಾಗಿ ಹರಿಯುವ ನೀರಿನಿಂದ ವಿಧ್ಯುತ್ ಉತ್ಪಾದಿಸುವ ಕಿರು ಘಟಕಗಳನ್ನು ಸ್ಥಾಪಿಸುವ ಬಗ್ಗೆ ಪರಿಶೀಲಿಸಿ ಐಟಿಡಿಪಿ ಯ ಸಹಕಾರದೊಂದಿಗೆ ಅಗತ್ಯ ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದರು.

 ದಿಡುಪೆಯಿಂದ ಎಳೆನೀರಿನ ವರೆಗಿರುವ ಒಂಬತ್ತು ಕಿ.ಮೀ ದಟ್ಟ ಅಡವಿಯ ನಡುವೆಯೇ ಅತ್ಯಂತ ಅಪಾಯಕಾರಿಯಾದ ಕಚ್ಚಾ ರಸ್ತೆಯಲ್ಲಿಯೇ ಜೀಪಿನಲ್ಲಿ ಜಿ.ಪಂ ಕಾರ್ಯನಿರ್ವಹಣಾಧಿಕಾರಿಯವರು ಮತ್ತು ಅಧಿಕಾರಿಗಳು ಪ್ರಯಾಣಿಸಿ ಎಳೆನೀರಿಗೆ ತಲುಪಿದರು ಇಲ್ಲಿ ಜನರ ಸಮಸ್ಯೆಗಳನ್ನು ಅರಿತುಕೊಂಡರು. ಸಭೆಯ ಬಳಿಕ ಗುತ್ಯಡ್ಕ ಶಾಲೆಗೆ ಭೇಟಿ ನೀಡಿದ ಅಧಿಕಾರಿಗಳು ನೂತನ ಅಂಗನವಾಡಿ ಕೇಂದ್ರಕ್ಕೆ ಮೀಸಲಿರಿಸಿರುವ ಜಾಗವನ್ನು ಪರಿಶೀಲಿಸಿದರು.