ದ್ವಿತೀಯ ಟೆಸ್ಟ್: ಭಾರತ 168/5

ಬೆಂಗಳೂರು, ಮಾ.4: ಸ್ಪಿನ್ನರ್ ನಥಾನ್ ಲಿಯೊನ್(3-40) ದಾಳಿಗೆ ನಲುಗಿದ ಭಾರತ ತಂಡ ಆಸ್ಟ್ರೇಲಿಯ ವಿರುದ್ಧದ ಎರಡನೆ ಟೆಸ್ಟ್‌ನ ಟೀ ವಿರಾಮದ ವೇಳೆಗೆ 59 ಓವರ್‌ಗಳಲ್ಲಿ 5 ವಿಕೆಟ್‌ಗಳ ನಷ್ಟಕ್ಕೆ 168 ರನ್ ಗಳಿಸಿದೆ.

ಇಲ್ಲಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಶನಿವಾರ ಟಾಸ್ ಜಯಿಸಿದ ಭಾರತದ ನಾಯಕ ವಿರಾಟ್ ಕೊಹ್ಲಿ ದೊಡ್ಡ ಮೊತ್ತ ಗಳಿಸುವ ಉದ್ದೇಶದೊಂದಿಗೆ ಮೊದಲು ಬ್ಯಾಟಿಂಗ್ ಆಯ್ದುಕೊಂಡರು. ನಾಯಕನ ನಿರ್ಧಾರವನ್ನು ಲೋಕಲ್ ಹೀರೊ ಕೆಎಲ್ ರಾಹುಲ್(ಅಜೇಯ 79 ರನ್, 175 ಎಸೆತ, 9 ಬೌಂಡರಿ) ಹೊರತುಪಡಿಸಿ ಉಳಿದವರು ಸಮರ್ಥಿಸಿಕೊಳ್ಳಲು ವಿಫಲರಾದರು.

ಸ್ವತಃ ನಾಯಕ ಕೊಹ್ಲಿ 17 ಎಸೆತಗಳನ್ನು ಎದುರಿಸಿ 2 ಬೌಂಡರಿಗಳಿರುವ 12 ರನ್ ಗಳಿಸಿ ಲಿಯೊನ್ ಬೀಸಿದ ಎಲ್‌ಬಿಡಬ್ಲು ಬಲೆಗೆ ಬಿದ್ದರು.

ಗಾಯಗೊಂಡಿರುವ ಮುರಳಿ ವಿಜಯ್ ಬದಲಿಗೆ ರಾಹುಲ್‌ರೊಂದಿಗೆ ಇನಿಂಗ್ಸ್ ಆರಂಭಿಸುವ ಅವಕಾಶ ಪಡೆದಿದ್ದ ಅಭಿನವ್ ಮುಕುಂದ್ 8 ಎಸೆತಗಳನ್ನು ಎದುರಿಸಿದರೂ ಖಾತೆ ತೆರೆಯಲು ವಿಫಲವಾಗಿ ವೇಗದ ಬೌಲರ್ ಮಿಚೆಲ್ ಸ್ಟಾರ್ಕ್‌ಗೆ ವಿಕೆಟ್ ಒಪ್ಪಿಸಿದರು.

ಆಗ 2ನೆ ವಿಕೆಟ್‌ಗೆ ಚೇತೇಶ್ವರ ಪೂಜಾರ(17) ಅವರೊಂದಿಗೆ 61 ರನ್ ಜೊತೆಯಾಟ ನಡೆಸಿದ ರಾಹುಲ್ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡುವ ಯತ್ನ ನಡೆಸಿದರು. ಈ ಜೋಡಿಯನ್ನು ಲಿಯೊನ್ ಬೇರ್ಪಡಿಸಿದರು. 66 ಎಸೆತಗಳಲ್ಲಿ ಕೇವಲ 17 ರನ್ ಗಳಿಸಿದ್ದ ಪೂಜಾರ ಅವರು ಲಿಯೊನ್‌ಗೆ ವಿಕೆಟ್ ಒಪ್ಪಿಸಿದರು. ಪೂಜಾರ ಔಟಾದ ಬಳಿಕ ಬಂದ ನಾಯಕ ಕೊಹ್ಲಿ ಹಾಗೂ ರಹಾನೆ(17) ಬೇಗನೆ ಔಟಾಗಿ ನಿರಾಸೆಗೊಳಿಸಿದರು.

5ನೆ ವಿಕೆಟ್‌ಗೆ ಕರುಣ್ ನಾಯರ್(26) ಹಾಗೂ ರಾಹುಲ್ 38 ರನ್ ಜೊತೆಯಾಟ ನಡೆಸಿ ತಂಡವನ್ನು ಆಧರಿಸುವ ಸೂಚನೆ ನೀಡಿದ್ದರು. ಕನ್ನಡಿಗ ನಾಯರ್ ವಿಕೆಟ್ ಉರುಳಿಸಿದ ಸ್ಪಿನ್ನರ್ ಸ್ಟೀಫನ್ ಓ’ಕೀಫೆ ಆಸೀಸ್‌ಗೆ ಮತ್ತೊಮ್ಮೆ ಮೇಲುಗೈ ತಂದರು.

ಟೀ ವಿರಾಮದ ವೇಳೆ ರಾಹುಲ್ ಹಾಗೂ ಆರ್.ಅಶ್ವಿನ್ ಕ್ರೀಸ್ ಕಾಯ್ದುಕೊಂಡಿದ್ದರು. 40 ರನ್‌ಗೆ 3 ವಿಕೆಟ್‌ಗಳನ್ನು ಪಡೆದಿದ್ದ ಸ್ಪಿನ್ನರ್ ಲಿಯೊನ್ ಯಶಸ್ವಿ ಬೌಲರ್ ಎನಿಸಿಕೊಂಡರು.