ಫೆಲೆಸ್ತೀನ್ ನೆಲದಲ್ಲಿ ಇಸ್ರೇಲ್‌ನ ಬಡಾವಣೆಗೆ ಹಾಲಿವುಡ್ ನಟ ಗೇರ್ ಖಂಡನೆ

ಜೆರುಸಲೇಂ, ಮಾ. 12: ಫೆಲೆಸ್ತೀನ್ ದೇಶ ನಿರ್ಮಿಸಲು ಅಗತ್ಯ ಎಂಬುದಾಗಿ ಅಲ್ಲಿನ ನಿವಾಸಿಗಳು ಬಯಸುವ ಜಮೀನುಗಳಲ್ಲಿ ಮನೆಗಳ ಬಡಾವಣೆಗಳನ್ನು ನಿರ್ಮಿಸುವ ಇಸ್ರೇಲ್‌ನ ಕ್ರಮವನ್ನು ಹಾಲಿವುಡ್ ನಟ ರಿಚರ್ಡ್ ಗೇರ್ ಖಂಡಿಸಿದ್ದಾರೆ.

ಇಸ್ರೇಲಿ ಲೇಖಕ-ನಿರ್ದೇಶಕ ಜೋಸೆಫ್ ಸೆಡಾರ್ ನಿರ್ಮಾಣದ ನೂತನ ಚಿತ್ರದ ಸ್ಥಳೀಯ ಪ್ರೀಮಿಯರ್‌ನಲ್ಲಿ ಭಾಗವಹಿಸಲು ಜೆರುಸಲೇಂಗೆ ಬಂದಿದ್ದ ವೇಳೆ ಗೇರ್ ಇಸ್ರೇಲ್ ಕುರಿತ ತನ್ನ ಅತೃಪ್ತಿಯನ್ನು ಹೊರಹಾಕಿದರು.

‘‘ಬಡಾವಣೆಗಳು ಪ್ರಚೋದನೆಯಾಗಿದೆ ಹಾಗೂ ಪ್ರಾಮಾಣಿಕ ಶಾಂತಿ ಪ್ರಕ್ರಿಯೆಯನ್ನು ಬಯಸುವ ವ್ಯಕ್ತಿಗಳು ಈ ನೀತಿಯನ್ನು ಅನುಸರಿಸಲು ಸಾಧ್ಯವಿಲ್ಲ’’ ಎಂದು ಅವರು ಹೇಳಿರುವುದಾಗಿ ‘ಹಾರೆಝ್’ ಪತ್ರಿಕೆ ರವಿವಾರ ವರದಿ ಮಾಡಿದೆ.

‘ಪ್ರಿಟಿ ವೂಮನ್’ ಎಂಬ ಚಿತ್ರದಲ್ಲಿನ ಅವರ ನಟನೆಯು ಪ್ರಸಿದ್ಧವಾಗಿದೆ.ಉಭಯ ದೇಶಗಳ ನಡುವಿನ ಭೂವಿವಾದದ ದ್ವಿರಾಷ್ಟ್ರ ಪರಿಹಾರಕ್ಕೆ ಇಸ್ರೇಲ್‌ನ ಬಡಾವಣೆಗಳು ಅಡ್ಡಿಯಾಗುತ್ತದೆ ಎಂಬುದಾಗಿ ಅಂತಾರಾಷ್ಟ್ರೀಯ ಸಮುದಾಯ ಭಾವಿಸಿದೆ.