ಮಂಗಳೂರು: ದಡಾರ, ರುಬೆಲ್ಲಾ ನಿಯಂತ್ರಣ ಲಸಿಕೆ ಪಡೆಯಲು ಕೊನೆಯ ಎರಡು ದಿನಗಳ ಅವಕಾಶ

ಮಂಗಳೂರು,ಮಾ.17:ರಾಷ್ಟ್ರೀಯ ಪಲ್ಸ್ ಪೋಲಿಯೋ ಲಸಿಕೆ ನೀಡುವ ಈ ವರ್ಷದ ಪ್ರಥಮ ಮತ್ತು ಎರಡನೆ ಕಾರ್ಯಕ್ರಮ ಎಪ್ರಿಲ್ 2 ಮತ್ತು 30ರಂದು ಜರಗಲಿದೆ.

ಜಿಲ್ಲೆಯಲ್ಲಿ 0-5ವರ್ಷದೊಳಗಿನ 1,64,965 ಮಕ್ಕಳಿಗೆ ಲಸಿಕೆ ನೀಡುವ ಗುರಿ ಹೊಂದಲಾಗಿದೆ. ಜಿಲ್ಲೆಯಲ್ಲಿ 921 ತಂಡ ಮತ್ತು ಬೂತ್‌ಗಳು , 9 ಸಂಚಾರಿ ತಂಡ ಹಾಗೂ 27 ಟ್ರಾನ್ಸಿಟ್ ತಂಡಗಳಲ್ಲಿ ಈ ಅಭಿಯಾನ ನಡೆಯಲಿದೆ ಎಂದು ಜಿಲ್ಲಾ ಆರೋಗ್ಯಾಧಿಕಾರಿ ಡಾ.ರಾಮಕೃಷ್ಣ ರಾವ್ ತಿಳಿಸಿದ್ದಾರೆ.

ನಗರ ಪ್ರದೇಶದಲ್ಲಿ 50,425 ಹಾಗೂ ಗ್ರಾಮಾಂತರ ಪ್ರದೇಶದಲ್ಲಿ 1,14,540 ಮಕ್ಕಳಿಗೆ ಲಸಿಕೆ ನೀಡುವ ಗುರಿ ಹೊಂದಲಾಗಿದೆ.ಜಿಲ್ಲೆಯಲ್ಲಿ 575 ಆರೋಗ್ಯ ಸಿಬ್ಬಂದಿ, 2,079 ಅಮಗನವಾಡಿ ಕಾರ್ಯಕರ್ತೆಯರು,1,100ಆಶಾ ಕಾರ್ಯಕರ್ತೆಯರು, 89 ಅನುಷ್ಟಾನ ಅಧಿಕಾರಿಗಳು 1,852 ವಾಹನಗಳೊಂದಿಗೆ ಈ ಅಭಿಯಾನದಲ್ಲಿ ಭಾಗವಹಿಸಲಿದ್ದಾರೆ.

ನಿಗದಿಪಡಿಸಿದ ದಿನದ ಬಳಿಕ ಉಳಿದುಕೊಂಡಿರುವ ಮಕ್ಕಳ ನಿವಾಸಗಳಿಗೆ ತೆರಳಿ ಲಸಿಕೆ ಹಾಕುವ ಕಾರ್ಯಕ್ರಮವನ್ನು ಉಳಿದ ಮೂರು ದಿನಗಳಲ್ಲಿ ನಗರ ಪ್ರದೇಶದಲ್ಲಿ ಹಾಗೂ ಎರಡು ದಿನ ಗ್ರಾಮಾಂತರ ಪ್ರದೇಶದಲ್ಲಿ ಹಮ್ಮಿಕೊಳ್ಳಲಾಗಿದೆ.ದ.ಕ ಜಿಲ್ಲೆಯಲ್ಲಿ 1,999ರ ಬಳಿಕ ಪೋಲಿಯೋ ಪ್ರಕರಣ ಕಂಡು ಬಂದಿಲ್ಲ ಎಂದು ಡಿಎಚ್‌ಒ ರಾಮಕೃಷ್ಣ ರಾವ್ ತಿಳಿಸಿದ್ದಾರೆ.

ದಡಾರ ರುಬೆಲ್ಲಾ ಲಸಿಕೆ ಪಡೆಯಲು ಕೊನೆಯ ಎರಡು ದಿನ ಅವಕಾಶ

ಜಿಲ್ಲೆಯಲ್ಲಿ 0-15 ವರ್ಷದೊಳಗಿನ ಮಕ್ಕಳಿಗೆ ದಡಾರ ಮತ್ತುರುಬೆಲ್ಲಾ ನಿಯಂತ್ರಣ ಲಸಿಕೆ ಕಾರ್ಯಕ್ರಮ ಆರಂಭಗೊಂಡು ಶೇ 93.77 ಮಕ್ಕಳಿಗೆ ಲಸಿಕೆ ನೀಡಲಾಗಿದೆ.ಇನ್ನು ಎರಡು ದಿನಗಳಲ್ಲಿ ಇನ್ನು ಲಸಿಕೆ ಪಡೆಯದೆ ಇರುವವರು ಅದನ್ನು ಪಡೆದುಕೊಳ್ಳಲು ಕೊನೆಯ ಅವಕಾಶ ನೀಡಲಾಗಿದೆ ಎಂದು ಡಾ.ರಾಮಕೃಷ್ಣ ರಾವ್ ತಿಳಿಸಿದ್ದಾರೆ.