‘ಮೂಲಭೂತ ಸೌಕರ್ಯ ನೀಡದಿದ್ದರೆ ಸ್ವಚ್ಛ ಭಾರತ ಆಗಲ್ಲ’ : ಡಾ.ಮನೋಜ್ ನಾಗಸಂಪಿಗೆ

ಉಡುಪಿ, ಮಾ.21: ಸ್ವಚ್ಛ ಭಾರತ ಅಭಿಯಾನ ಎಂಬುದು ಕೇವಲ ಟಿವಿ ಹಾಗೂ ಬಾಯಿಗೆ ಮಾತ್ರ ಸೀಮಿತವಾಗಿದೆ. ಅದರ ಸರಿಯಾದ ಅನುಷ್ಠಾನ ಇನ್ನು ಆಗಿಲ್ಲ. ಮೂಲಭೂತ ಸೌಕರ್ಯ ಹಾಗೂ ಕಸ ವಿಲೇವಾರಿಗೆ ಪರಿಹಾರ ನೀಡುವ ಮೊದಲೇ ಸ್ವಚ್ಛ ಭಾರತ ಅಭಿಯಾನವನ್ನು ಜಾರಿಗೆ ತರಲಾಗಿದೆ ಎಂದು ಸಿಕ್ಕಿಂ ಮಣಿಪಾಲ ವಿಶ್ವವಿದ್ಯಾನಿಲಯದ ಪರಿಸರ ಪ್ರಾಧ್ಯಾಪಕ ಡಾ.ಮನೋಜ್ ನಾಗಸಂಪಿಗೆ ಹೇಳಿದ್ದಾರೆ.

ಕೇಂದ್ರ ಸಂಸ್ಕೃತಿ ಸಚಿವಾಲಯ ನವದೆಹಲಿ, ಕರ್ನಾಟಕ ಯಕ್ಷಗಾನ ಬಯ ಲಾಟ ಅಕಾಡೆಮಿ, ಮಣಿಪಾಲ ವಿವಿ ಪ್ರಾದೇಶಿಕ ಜಾನಪದ ರಂಗ ಕಲೆಗಳ ಅಧ್ಯಯನ ಕೇಂದ್ರ ಮತ್ತು ಉಡುಪಿ ಪಚ್ಚೆ ಭಾರತ ಗೊಂಬೆ- ಚಿತ್ತಾರ ರಂಗ ಬಳಗದ ಸಂಯುಕ್ತ ಆಶ್ರಯದಲ್ಲಿ ವಿಶ್ವ ಗೊಂಬೆಯಾಟ ದಿನಾಚರಣೆಯ ಪ್ರಯುಕ್ತ ಮಂಗಳವಾರ ಉಡುಪಿ ಎಂಜಿಎಂ ಕಾಲೇಜಿನ ನೂತನ ರವೀಂದ್ರ ಮಂಟಪದಲ್ಲಿ ಆಯೋಜಿಸಲಾದ ‘ಪ್ಲಾಸ್ಟಿಕಾಸುರ’ ವಿಚಾರ ಸಂಕಿರಣ ಮತ್ತು ಗೊಂಬೆಯಾಟ ಕಾರ್ಯಕ್ರಮದಲ್ಲಿ ‘ಪರಿಸರ ಕಾಳಜಿ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವ ಹಣೆ’ ವಿಷಯದ ಕುರಿತು ಅವರು ಮಾತನಾಡುತಿದ್ದರು.

ಸ್ವಚ್ಛ ಭಾರತ ಅಭಿಯಾನದಡಿ ಲಕ್ಷ ಲಕ್ಷ ಸಂಖ್ಯೆಯಲ್ಲಿ ವೈಯಕ್ತಿಕ ಮತ್ತು ಸಾಮುದಾಯಿಕ ಶೌಚಾಲಯಗಳನ್ನು ದೇಶಾದ್ಯಂತ ನಿರ್ಮಿಸಲಾಗಿದೆ ಮತ್ತು ಮನೆಮನೆಯಿಂದ ಕಸ ಸಂಗ್ರಹಿಸುವ ಕೆಲಸ ಮಾಡಲಾಗುತ್ತಿದೆ. ಆದರೂ ಈ ಅಭಿಯಾನ ಜನರ ಮಧ್ಯೆ ಅಷ್ಟೊಂದು ಪರಿಣಾಮ ಬೀರಿಲ್ಲ ಎಂದು ಅವರು ಅಭಿಪ್ರಾಯಪಟ್ಟರು.

ಪ್ರಸ್ತುತ ನಗರದಲ್ಲಿನ ಕಸದ ತೊಟ್ಟಿಗಳನ್ನು ತೆಗೆದು ಹಾಕಲಾಗಿದೆ. ಇದ ರಿಂದಾಗಿ ನಗರದ ಜನ ಕಸ ಸಂಗ್ರಹಿಸಲು ಬರುವವರನ್ನು ಕಾಯಲು ಆಗದೆ ಸಂಗ್ರಹವಾದ ಕಸವನ್ನು ಅರಣ್ಯ ಪ್ರದೇಶದಲ್ಲಿ ಎಸೆಯುತ್ತಿದ್ದಾರೆ. ಇದರಿಂದ ಅಲ್ಲಿಯ ಪರಿಸರ ಕೂಡ ಹಾಳಾಗುತ್ತಿದೆ. ಆದುದರಿಂದ ನಗರದಲ್ಲಿ ಕಸದ ತೊಟ್ಟಿಗಳನ್ನು ಸ್ಥಾಪಿಸಬೇಕು ಎಂದರು.

ರಿವರ್ಸ್ ವೆಂಡಿಂಗ್ ಯಂತ್ರ: ನಾರ್ವೆ ದೇಶದಲ್ಲಿ ಬಳಸಿದ ಬಾಟಲಿ ಗಳನ್ನು ರಿವರ್ಸ್ ವೆಂಡಿಂಗ್ ಯಂತ್ರಕ್ಕೆ ಹಾಕಿದರೆ ಒಂದು ಬಾಟಲಿಗೆ ಎರಡು ಕ್ರೋನ್ ಹಣ ನೀಡಲಾಗುತ್ತದೆ. ಆ ಬಾಟಲಿಗಳನ್ನು ಮೆಶಿನ್ ಮೂಲಕ ಪುನರ್‌ಬಳಕೆ ಮಾಡಲಾಗುತ್ತದೆ. ಇದರಿಂದಾಗಿ ನಾರ್ವೆ ದೇಶದ ಜನ ಹೊರಗಡೆ ಎಲ್ಲಿಯೂ ಪ್ಲಾಸ್ಟಿಕ್ ಬಾಟಲಿಗಳನ್ನು ಎಸೆಯುತ್ತಿಲ್ಲ. ಇದೇ ಯಂತ್ರವನ್ನು ಕಳೆದ ಜನವರಿಯಿಂದ ದೆಹಲಿ ನಗರದ 100 ಕಡೆಗಳಲ್ಲಿ ಸ್ಥಾಪಿಸಲಾಗಿದೆ. ನಮ್ಮಲ್ಲಿ ಒಂದು ಬಾಟಲಿಗೆ ಒಂದು ರೂ. ನೀಡಲಾಗುತ್ತಿದೆ. ಇದನ್ನು ದೇಶದ ಎಲ್ಲ ಕಡೆ ವಿಸ್ತರಿಸಿದರೆ ಸಿಕ್ಕಲ್ಲಿ ಬಾಟಲಿ ಎಸೆಯುವುದನ್ನು ತಡೆಯಬಹುದಾಗಿದೆ ಎಂದು ಡಾ.ಮನೋಜ್ ನಾಗಸಂಪಿಗೆ ತಿಳಿಸಿದರು.

ಇಂದು ನಮ್ಮ ದೈನಂದಿನ ಬದುಕಿನಲ್ಲಿ ಪ್ಲಾಸ್ಟಿಕ್ ಬಳಕೆ ವಿಪರೀತ ಹೆಚ್ಚಳ ಆಗುತ್ತಿದೆ. ಇದರಿಂದ ಭಾರತದಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವಹಣೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇದರ ನಿಯಂತ್ರಣಕ್ಕೆ ಜನ ತಮ್ಮ ಮನಸ್ಥಿತಿಯನ್ನು ಬದಲಾಯಿಸಬೇಕು ಇಲ್ಲವೇ ಸರಕಾರ ದಂಡ ವಿಧಿಸಬೇಕು ಎಂದು ಅವರು ಹೇಳಿದರು.

ಕಾರ್ಯಕ್ರಮವನ್ನು ಉತ್ತರ ಕನ್ನಡ ಜಿಲ್ಲೆಯ ಪದ್ಮಶ್ರೀ ನಾಡೋಜ ಸುಕ್ರಿ ಬೊಮ್ಮ ಗೌಡ ಉದ್ಘಾಟಿಸಿದರು. ಈ ಸಂದರ್ಭದಲ್ಲಿ ಅವರಿಗೆ ‘ಪಚ್ಚೆ ವನಶ್ರೀ’ ಬಿರುದು ನೀಡಿ ಗೌರವಿಸಲಾಯಿತು. ಮಣಿಪಾಲ ಅಕಾಡೆಮಿ ಆಫ್ ಜನರಲ್ ಎಜುಕೇಶನ್‌ನ ಆಡಳಿತಾಧಿಕಾರಿ ಡಾ.ಎಚ್. ಶಾಂತಾರಾಮ್, ಯಕ್ಷಗಾನ ಬಯಲಾಟ ಅಕಾಡೆಮಿಯ ಸದಸ್ಯರಾದ ಕಿಶನ್ ಹೆಗ್ಡೆ, ಅಂಬಾತನಯ ಮುದ್ರಾಡಿ, ಪುತ್ಥಳಿ ರಂಗಯಂತ್ರದ ಗೌರವ ನಿರ್ದೇಶಕ ಯು.ಸಿ.ನಿರಂಜನ್, ಪ್ರಾದೇಶಿಕ ಜಾನಪದ ರಂಗ ಕಲೆಗಳ ಅಧ್ಯಯನ ಕೇಂದ್ರದ ಸಂಯೋಜನಾಧಿಕಾರಿ ಪ್ರೊ.ವರದೇಶ ಹಿರೇಗಂಗೆ ಉಪಸ್ಥಿತರಿದ್ದರು.

ಉಡುಪಿ ಪ್ರಾಚ್ಯ ಸಂಚಯ ಸಂಶೋಧನ ಕೇಂದ್ರದ ಪ್ರೊ.ಎಸ್.ಎ.ಕೃಷ್ಣಯ್ಯ ಸ್ವಾಗತಿಸಿ ಕಾರ್ಯಕ್ರಮ ನಿರೂಪಿಸಿದರು. ಬಳಿಕ ‘ಪ್ಲಾಸ್ಟಿಕಾಸುರ’(ಪ್ರಕೃತಿ ಪರಿಸರ ವಿನಾಶಕಾರಿ ದೈತ್ಯ) ಗೊಂಬೆಯಾಟ ಪ್ರದರ್ಶನಗೊಂಡಿತು..

2100ರಲ್ಲಿ ಸಮುದ್ರ ಮಟ್ಟ 40ಸೆ.ಮೀ. ಏರಿಕೆ

ವಿಶ್ವಸಂಸ್ಥೆ ಜಗತ್ತಿನ 193 ರಾಷ್ಟ್ರಗಳಿಗೆ ಬಡತನ, ಆಹಾರ, ಆರೋಗ್ಯ, ವಿದ್ಯುತ್, ಪರಿಸರ ಸೇರಿದಂತೆ ಒಟ್ಟು 17 ಗುರಿಗಳನ್ನು 2030ರೊಳಗೆ ಸಾಧಿ ಸುವಂತೆ ಸೂಚಿಸಿದೆ. ಇಂದು ಜಗತ್ತಿನಲ್ಲಿ ತಾಪಮಾನದಿಂದ ಹಿಮ ಕರಗಿ ಸಮುದ್ರ ಮಟ್ಟ ಏರಿಕೆಯಾಗುತ್ತಿದೆ. ಇದರಿಂದ ಪ್ರಾಕೃತಿಕ ವಿಕೋಪ ಹಾಗೂ ಪ್ರಳಯ ಸಂಭವಿಸುವ ಸಾಧ್ಯತೆಗಳಿವೆ. ಇದೇ ರೀತಿ ಮುಂದುವರೆದರೆ 2100 ರಲ್ಲಿ ಸಮುದ್ರ ಮಟ್ಟವು 40ಸೆ.ಮೀ.ನಷ್ಟು ಏರಿಕೆಯಾಗಲಿದೆ ಎಂದು ಡಾ. ಮನೋಜ್ ನಾಗಸಂಪಿಗೆ ಆತಂಕ ವ್ಯಕ್ತಪಡಿಸಿದರು.

ನೀರಿನ ಬಾಟಲಿಗಳನ್ನು ಒಂದೇ ಬಾರಿ ಬಳಕೆ ಮಾಡಬೇಕು. ಈ ಬಾಟಲಿ ಗಳನ್ನು ರಾಸಾಯನಿಕದಿಂದ ತಯಾರಿಸುವುದರಿಂದ ಅದನ್ನು ಮತ್ತೆ ಮತ್ತೆ ಬಳಕೆ ಮಾಡುವುದರಿಂದ ಮೆದುಳಿಗೆ ತೊಂದರೆಯಾಗುತ್ತದೆ. ಹೀಗಾಗಿ ಮಕ್ಕಳು ಈ ಬಾಟಲಿ ಬಳಸದಂತೆ ಎಚ್ಚರ ವಹಿಸಬೇಕು ಎಂದು ಅವರು ತಿಳಿಸಿದರು.