ಜಗತ್ತಿನಲ್ಲೇ ಅತ್ಯುತ್ತಮ ನೌಕರಿ ಇಲ್ಲಿದೆ; ಅರ್ಜಿ ಸಲ್ಲಿಸುತ್ತೀರೇನು ?

ಹೊಸದಿಲ್ಲಿ, ಮಾ. 27 : ರಜಾಕಾಲದ ಹಾಲಿಡೆ ಹೋಮ್ ಕಂಪೆನಿ -ಥರ್ಡ್ ಹೋಂ, ಜಗತ್ತಿನ ಅತ್ಯಂತ ಉತ್ತಮ ನೌಕರಿಗಾಗಿ ಅರ್ಜಿಗಳನ್ನು ಆಹ್ವಾನಿಸಿದೆ. ಮೂರು ತಿಂಗಳ ಗುತ್ತಿಗೆಯಾಧರಿತ ಈ ನೌಕರಿಗೆ ಆಸಕ್ತಿಯಿರುವ ಅಭ್ಯರ್ಥಿಗಳು ಮಾರ್ಚ್ 30ರೊಳಗಾಗಿ ಅರ್ಜಿ ಸಲ್ಲಿಸಬೇಕು. ಅವರು ಮಾಡಬೇಕಾದದ್ದಿಷ್ಟೆ. ಜಗತ್ತಿನಾದ್ಯಂತ ಸಂಚರಿಸಿ ಸಂಸ್ಥೆಯ ಬಹುಕೋಟಿ ಮೌಲ್ಯದ ವಿಲಾಸಿ ಹಾಲಿಡೆ ಹೋಂಗಳಲ್ಲಿ ವಾಸಿಸಿ ಅವುಗಳ ಬಗ್ಗೆ ಬ್ಲಾಗ್ ಬರೆಯಬೇಕು ಹಾಗೂ ಫೋಟೋಗಳನ್ನು ಪ್ರಕಟಿಸಬೇಕು. ಅವರು ಎಲ್ಲಿ ವಾಸಿಸಬೇಕೆಂಬ ನಿರ್ಧಾರವನ್ನು ಥರ್ಡ್ ಹೋಂ ಸಂಸ್ಥೆ ಮಾಡಲಿದೆ.

ಅರ್ಹತೆ: ಅಭ್ಯರ್ಥಿಯು ತಾನು ವಾಸಿಸುವ ಹಾಲಿಡೆ ಅಥವಾ ವೆಕೇಶನ್ ಹೋಂ ನಲ್ಲಿರುವ ಐಷಾರಾಮಿ ಸೌಲಭ್ಯಗಳನ್ನು ಅರ್ಥೈಸಿ ಆತನ ಅಥವ  ಆಕೆಯ ಅನುಭವಗಳನ್ನು ಬ್ಲಾಗಿಂಗ್, ವ್ಲಾಗಿಂಗ್ ಹಾಗೂ ಇತರ ಸಾಮಾಜಿಕ ಜಾಲತಾಣಗಳ ಮೂಲಕ ಪ್ರಚುರ ಪಡಿಸಬೇಕು. ಬರವಣಿಗೆಯಲ್ಲಿ ನೈಪುಣ್ಯ ಹೊಂದಿರಬೇಕು ಹಾಗೂ ಜಗತ್ತಿನ ಯಾವುದೇ ಭಾಗದವರೂ ಆಗಿರಬಹುದು. ಆಯ್ಕೆಯಾದವರು ಮೂರು ತಿಂಗಳ ಕಾಲ ವಿಶ್ವದಾದ್ಯಂತ ಸಂಚರಿಸಬಹುದು.

ಅನುಭವ: ಅಭ್ಯರ್ಥಿಗಳು ಸಾಮಾಜಿಕ ಜಾಲತಾಣದಲ್ಲಿ ಸಕ್ರಿಯರಾಗಿರಬೇಕು ಹಾಗೂ ಬರವಣಿಗೆ, ಬ್ಲಾಗಿಂಗ್ ಹಾಗೂ ವ್ಲಾಗಿಂಗ್ ಪರಿಣತರಾಗಿರಬೇಕು. ಅಂತಾರಾಷ್ಟ್ರೀಯ ಟ್ರಾವೆಲ್ಸ್ ಸಂಸ್ಥೆಯೊಂದಿಗೆ ಕೆಲಸ ಮಾಡಿದ ಅನುಭವವಿರಬೇಕು.

ಇತರ ಆವಶ್ಯಕತೆಗಳು: ಸೂಕ್ತ ಪಾಸ್ ಪೋರ್ಟ್, ವೀಸಾ, ಚಾಲನಾ ಪರವಾನಿಗೆಯಿರಬೇಕು ಹಾಗೂ ವಿಮಾನ ಪ್ರಯಾಣಕ್ಕೆ ಯಾವುದೇ ಹಿಂಜರಿಕೆಯಿರಬಾರದು.

ಎಲ್ಲಿಗೂ ಪ್ರಯಾಣಿಸಲು ಸಿದ್ಧರಿರಬೇಕು, ಕನಿಷ್ಠ 18 ವರ್ಷ ವಯಸ್ಸಿನವರಾಗಿರಬೇಕು, ಮೂರು ತಿಂಗಳು ಸತತ ಪ್ರವಾಸಕ್ಕೆ ಸಿದ್ಧರಿರಬೇಕು.

ವೇತನ: ಗುತ್ತಿಗೆ ಒಪ್ಪಂದದಂತೆ ಆಯ್ಕೆಯಾದವರಿಗೆ ಮಾಸಿಕ 10,000 ಅಮೆರಿಕನ್ ಡಾಲರ್ ವೇತನವಲ್ಲದೆ ಮೂರು ತಿಂಗಳ ತನಕದ ಎಲ್ಲಾ ಪ್ರಯಾಣ ವೆಚ್ಚವನ್ನು ಭರಿಸಲಾಗುವುದು. ಅವರೊಂದಿಗೆ ಇನ್ನೊಬ್ಬ ಜತೆಗಾರರನ್ನು ಕೂಡ ಅನುಮತಿಸಲಾಗುವುದಾದರೂ ಅವರ ವೆಚ್ಚಗಳನ್ನು ಥರ್ಡ್ ಹೋಂ ಭರಿಸುವುದಿಲ್ಲ.

ಆಸಕ್ತಿಯಿರುವ ಅಭ್ಯರ್ಥಿಗಳು ತಮ್ಮ ಅರ್ಜಿಯೊಂದಿಗೆ ಅವರೇಕೆ ಈ ಹುದ್ದೆಗೆ ಅರ್ಹರು ಎಂದು ತಿಳಿಸುವ ಒಂದು ನಿಮಿಷ ಅವಧಿಯ ವೀಡಿಯೋವೊಂದನ್ನೂ ಸಲ್ಲಿಸಬೇಕು.ವೀಡಿಯೋ ಇಲ್ಲದ ಅರ್ಜಿಗಳನ್ನು ತಿರಸ್ಕರಿಸಲಾಗುವುದು. ಆಸಕ್ತಿ ಹೊಂದಿದವರು ಬೆಸ್ಟ್‌ಜಾಬ್‌ಆನ್‌ದಿ ಪ್ಲಾನೆಟ್@ಥರ್ಡ್ ಹೋಂ.ಕಾಂ ಗೆ ತಮ್ಮ ಅರ್ಜಿ ಸಲ್ಲಿಸಬಹುದು.