ಚಿನ್ನಾಭರಣ ಕಳವು: 10 ಮಂದಿ ಕಳ್ಳರ ಬಂಧನ

ಕುಂದಾಪುರ, ಎ.22: ಕುಂಭಾಸಿ ಆನೆಗುಡ್ಡೆ ಶ್ರೀವಿನಾಯಕ ದೇವಸ್ಥಾನದಲ್ಲಿ ಭಕ್ತರೊಬ್ಬರ ಬ್ಯಾಗ್‌ನಲ್ಲಿದ್ದ ಚಿನ್ನಾಭರಣ ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ಕ್ಷಿಪ್ರ ಕಾರ್ಯಾಚರಣೆ ನಡೆಸಿದ ಕುಂದಾಪುರ ಪೊಲೀಸರು ಶನಿವಾರ ಚಿಕ್ಕ ಮಗಳೂರು ಜಿಲ್ಲೆಯ ಮೂಡಿಗೆರೆ ಎಂಬಲ್ಲಿ 10 ಮಂದಿ ಸರಗಳ್ಳರ ತಂಡವನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಸವಣೂರು ನಿವಾಸಿಗಳಾದ ರಾಘವೇಂದ್ರ(24), ಗೌಸ್ ಮೊಯ್ದಿನ್(35), ಗದಗ ನಿವಾಸಿಗಳಾದ ರವಿ(32), ರಾಜು(35), ನೇತ್ರಾ(27), ಲಕ್ಕವ್ವ(50), ಹರಪ್ಪನಹಳ್ಳಿ ನಿವಾಸಿಗಳಾದ ಶಾರದಾ(30), ದಾಕ್ಷಾಯಿಣಿ(24), ಗಂಗವ್ವ (40), ಶ್ರುತಿ(26) ಎಂಬವರು ಬಂಧಿತ ಆರೋಪಿಗಳು. ಇವರಿಂದ ಒಟ್ಟು 303 ಗ್ರಾಂ ತೂಕದ ಚಿನ್ನಾಭರಣ, 7,000 ನಗದು ಹಾಗೂ ತೂಫಾನ್ ವಾಹನವನ್ನುಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಎ.20ರಂದು ಮಧ್ಯಾಹ್ನ ಆನೆಗುಡ್ಡೆ ದೇವಸ್ಥಾನದಲ್ಲಿ ಮೂವರು ಮಹಿಳೆಯರು ನೂಕು ನುಗ್ಗಲು ಮಾಡಿ ಬೆಂಗಳೂರಿನ ಜ್ಯೋತಿ ಲಕ್ಷ್ಮಿ ಎಂಬವರ ವ್ಯಾನಿಟಿ ಬ್ಯಾಗ್‌ನಲ್ಲಿದ್ದ 40 ಗ್ರಾಂ ತೂಕದ ಚಿನ್ನದ ನೆಕ್ಲೇಸ್, 16 ಗ್ರಾಂ ತೂಕದ 2 ಚಿನ್ನದ ಸರ, 10 ಗ್ರಾಂ ತೂಕದ ಚಿನ್ನದ ಬಳೆ ಸಹಿತ ಒಟ್ಟು 82 ಗ್ರಾಂ ತೂಕದ 2ಲಕ್ಷ ರೂ. ಮೌಲ್ಯದ ಚಿನ್ನಾಭರಣಗಳನ್ನು ಕಳವು ಮಾಡಿ ಪರಾರಿಯಾಗಿದ್ದರು.

ನೆರವಾದ ವಾಹನ ನಂಬರ್:ಈ ಬಗ್ಗೆ ಜ್ಯೋತಿ ನೀಡಿದ ದೂರಿನಂತೆ ಕುಂದಾಪುರ ಪೊಲೀಸರು ಪ್ರಕರಣ ದಾಖಲಿಸಿ ಕೂಡಲೇ ಕಾರ್ಯಪ್ರವೃತ್ತರಾಗಿ, ದೇವಳದಲ್ಲಿರುವ ಸಿಸಿ ಟಿವಿ ಫೂಟೇಜ್ ವೀಕ್ಷಿಸಿದರು. ಅದರಲ್ಲಿ ಕೆಲವು ವ್ಯಕ್ತಿಗಳು ಅನುಮಾನಾಸ್ಪದವಾಗಿ ತಿರುಗಾಡುತ್ತಿರುವುದು ಮತ್ತು ಚಿನ್ನ ಕಳ್ಳತನವಾದ ನಂತರ ಅವಸರವಸರವಾಗಿ ಅಲ್ಲಿಂದ ರಾರಿಯಾಗುವ ದೃಶ್ಯ ಕಂಡುಬಂತು.

ಕಳವು ಮಾಡಿದ ಬಳಿಕ ಕಳ್ಳರ ತಂಡ ತಾವು ಬಂದಿದ್ದ ತೂಫಾನ್ ವಾಹನವನ್ನು ಏರುವಾಗ ಅಲ್ಲೇ ಸಮೀಪದಲ್ಲಿದ್ದ ಯಾತ್ರಾರ್ಥಿಯೊಬ್ಬರು ಅನುಮಾನ ಗೊಂಡು ವಾಹನದ ನಂಬರ್‌ನ್ನು ನಮೂದಿಸಿಕೊಂಡರು. ಬಳಿಕ ಪೊಲೀಸರು ದೇವಸ್ಥಾನಕ್ಕೆ ಆಗಮಿಸಿದಾಗ ಆ ನಂಬರ್‌ನ್ನು ಆತ ಪೊಲೀಸರಿಗೆ ನೀಡಿದ್ದು, ಇದು ಆರೋಪಿಗಳನ್ನು ಪತ್ತೆ ಹಚ್ಚಲು ಇನ್ನಷ್ಟು ಸಹಕಾರಿಯಾಯಿತು. ದಾವಣಗೆರೆ ನೋಂದಣಿ ಹೊಂದಿದ್ದ ಈ ತೂಫಾನ್ ವಾಹನದ ಮಾಲಕನನ್ನು ಹುಡುಕಲು ಶುಕ್ರವಾರ ಕುಂದಾಪುರ ಪೊಲೀಸರ ಒಂದು ತಂಡ ಹಾವೇರಿಗೆ ತೆರಳಿತ್ತು.

ಅಲ್ಲಿ ವಾಹನ ಮಾಲಕನನ್ನು ಭೇಟಿ ಮಾಡಿದಾಗ ಆ ವಾಹನವನ್ನು 15 ದಿನಗಳ ಕಾಲ ಬಾಡಿಗೆಗೆ ನೀಡಿರುವುದಾಗಿ ತಿಳಿದುಬಂತು. ವಾಹನ ಮಾಲಕನ ನೆರವಿನಿಂದ ಕಳ್ಳರು ಎಲ್ಲಿದ್ದಾರೆಂಬುದನ್ನು ಪೊಲೀಸರು ಖಚಿತಪಡಿಸಿಕೊಂಡರು. ನಂತರ ಇನ್ನೊಂದು ಪೊಲೀಸ್ ತಂಡ ಕಳ್ಳರ ವಾಹನ ವನ್ನು ಬೆನ್ನಟ್ಟಿ ಚಿಕ್ಕಮಗಳೂರು ಸಮೀಪದ ಮೂಡಿಗೆರೆಯಲ್ಲಿ ಬಂಧಿಸುವಲ್ಲಿ ಯಶಸ್ವಿಯಾಯಿತು.

ಖತರ್‌ನಾಕ್ ತಂಡ:ವಿವಿಧ ದೇವಸ್ಥಾನಗಳಲ್ಲಿ ಸರಣಿ ಕಳ್ಳತನ ನಡೆಸಿರುವ ಈ ತಂಡ, ಕೆಲವು ದಿನಗಳ ಹಿಂದೆ ಹೊರನಾಡು ದೇವಸ್ಥಾನದಲ್ಲೂ ಮಹಿಳೆ ಸರ ಕದ್ದು ಪರಾರಿಯಾಗಿತ್ತು. ಈ ಬಗ್ಗೆ ಕಳಸ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಶಾಲಾ ರಜಾ ಸಮಯದಲ್ಲಿ ಭಕ್ತರ ಸಂಖ್ಯೆ ಹೆಚ್ಚು ಇರುವ ಸಂದರ್ಭದಲ್ಲಿ ಕುಟುಂಬ ಸಮೇತವಾಗಿ ಭಕ್ತರ ಸೋಗಿನಲ್ಲಿ ದೇವಸ್ಥಾನಗಳಿಗೆ ಹೋಗುವ ಈ ತಂಡ ಸಾಕಷ್ಟು ಚಿನ್ನಾಭರಣಗಳನ್ನು ಕಳವು ಮಾಡಿದೆ ಎಂಬ ಮಾಹಿತಿ ತನಿಖೆಯಿಂದ ತಿಳಿದು ಬಂದಿದೆ. ಎ.13ರಂದು ಗದಗದಿಂದ ಹೊರಟ ಈ ತಂಡ ಮೊದಲು ಗೋಕರ್ಣ, ಮುರ್ಡೆಶ್ವರ, ಕೊಲ್ಲೂರು, ಆನೆಗುಡ್ಡೆ, ಬೇಳೂರು, ಹಳೆಬೀಡು, ಮೈಸೂರು, ಶ್ರೀರಂಗಪಟ್ಟಣ, ಹೊರನಾಡು ಹೀಗೆ ಹಲವು ಪ್ರಮುಖ ಧಾರ್ಮಿಕ ಕ್ಷೇತ್ರಗಳಿಗೆ ತೆರಳಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ಕೆ.ಟಿ.ಬಾಲಕೃಷ್ಣ ಹಾಗೂ ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ವಿಷ್ಣುವರ್ದನ್ ನಿರ್ದೇಶನದಂತೆ ಕುಂದಾಪುರ ಡಿವೈಎಸ್ಪಿ ಪ್ರವೀಣ್ ನಾಯ್ಕಿ ಮಾರ್ಗದರ್ಶನದಲ್ಲಿ ಕುಂದಾಪುರ ಪೊಲೀಸ್ ವೃತ್ತನಿರೀಕ್ಷಕ ಮಂಜಪ್ಪಡಿ.ಆರ್., ಕುಂದಾಪುರ ಠಾಣಾಧಿಕಾರಿ ನಾಸೀರ್ ಹುಸೇನ್, ಕ್ರೈಂ ಪಿಎಸ್ಸೈ ದೇವರಾಜ್, ಸಿಬ್ಬಂದಿಗಳಾದ ರಾಘವೇಂದ್ರ, ಜ್ಯೋತಿ, ನಾಗೇಂದ್ರ, ಸಚಿನ್ ಶೆಟ್ಟಿ, ಸಂತೋಷ, ಸಂತೋಷ, ಶ್ರೀಧರ್ ಈ ಕಾರ್ಯಾಚರಣೆ ನಡೆಸಿದ್ದರು.