ಶೀತಲ್ ಮೆಡಿಕಲ್ಸ್, ಶಿಲ್ಪಾ ಹೆಲ್ತ್ಕೇರ್ ಸೆಂಟರ್ ಉದ್ಘಾಟನೆ
Update: 2017-05-01 19:31 IST
ಮಂಗಳೂರು, ಮೇ 1: ನಗರದ ಶೀತಲ್ ಗೈಡ್ಲೈನ್ಸ್ ಸಂಸ್ಥೆಯ ಹೊಸ ಶಾಖೆ ಹಾಗೂ ಅದರ ಸಹ ಸಂಸ್ಥೆಗಳಾದ ಶೀತಲ್ ಮೆಡಿಕಲ್ಸ್ ಮತ್ತು ಶಿಲ್ಪಾ ಹೆಲ್ತ್ಕೇರ್ ಸೆಂಟರ್ನ ನೂತನ ಮಳಿಗೆಗಳು ಹಂಪನಕಟ್ಟೆಯ ಮಿಲಾಗ್ರಿಸ್ ಕಾಲೇಜು ಹೊಸ ಕಟ್ಟಡದಲ್ಲಿ ಸೋಮವಾರ ಉದ್ಘಾಟನೆಗೊಂಡವು.
ಪ್ರಸಿದ್ಧ ಉದ್ಯಮಿ ಹಾಗೂ ಎ.ಜೆ.ಸಮೂಹ ಸಂಸ್ಥೆಗಳ ಆಡಳಿತ ನಿರ್ದೇಶಕ ಎ.ಜೆ.ಶೆಟ್ಟಿ ಶೀತಲ್ ಮೆಡಿಕಲ್ಸ್ ಮಳಿಗೆಯನ್ನು ಉದ್ಘಾಟಿಸಿದರು. ಶಿಲ್ಪಾ ಹೆಲ್ತ್ಕೇರ್ ಸೆಂಟರ್ನ್ನು ಶಾಸಕ ಜೆ.ಆರ್.ಲೋಬೊ ಉದ್ಘಾಟಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಲೋಬೊ, ಇಂದಿನ ದಿನಗಳಲ್ಲಿ ಜನರು ಆಸ್ಪತ್ರೆಗಳ ಮೇಲೆ ವಿಶ್ವಾಸವನ್ನು ಕಳೆದುಕೊಂಡಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ನೂತನ ಹೆಲ್ತ್ಕೇರ್ ಸೆಂಟರ್ ರೋಗಿಗಳ ವಿಶ್ವಾಸ ಗಳಿಸಬೇಕು ಮಾತ್ರವಲ್ಲದೆ, ಅದನ್ನು ಉಳಿಸಿಕೊಳ್ಳುವ ಪ್ರಯತ್ನ ಮಾಡಬೇಕೆಂದು ಕಿವಿಮಾತು ಹೇಳಿದರು.
ಉದ್ಘಾಟನೆಗೊಂಡಿರುವ ಆರೋಗ್ಯಕ್ಕೆ ಸಂಬಂಧಿಸಿದ ಮೂರು ಕೇಂದ್ರಗಳಲ್ಲಿ ವಿವಿಧ ಸೌಲಭ್ಯಗಳು ಒಂದೇ ಸೂರಿನಡಿ ಒದಗಿಸಿರುವ ಆಡಳಿತ ನಿರ್ದೇಶಕ ಸನ್ನಿ ಜಾನ್ ಅವರಿಗೆ ಇದೇ ಸಂದರ್ಭದಲ್ಲಿ ಕೃತಜ್ಞತೆ ಸಲ್ಲಿಸಿ ನೂತನ ಆರೋಗ್ಯ ಕೇಂದ್ರಗಳಿಗೆ ಶುಭ ಹಾರೈಸಿದರು.
ಅವರ್ ಲೇಡಿ ಆಫ್ ಮಿರಾಕಲ್ಸ್, ಮಿಲಾಗ್ರಿಸ್ ಚರ್ಚ್ನ ಧರ್ಮಗುರು ವಂ.ವಲೇರಿಯನ್ ಡಿಸೋಜ, ಬೆಂದೂರ್ನ ಸಂತ ಸೆಬಾಸ್ಟಿಯನ್ ಚರ್ಚ್ನ ಧರ್ಮಗುರು ವಂ.ಆ್ಯಂಟನಿ ಸೆರಾವೊ ಹಾಗೂ ಮಿಲಾಗ್ರಿಸ್ ಕಾಲೇಜಿನ ಪ್ರಾಂಶುಪಾಲ ವಂ.ಮೈಕಲ್ ಸಾಂತುಮಾಯೊರ್ ಆಶೀರ್ವಚನ ನೀಡಿದರು. ಶಾಸಕ ವಿನಯಕುಮಾರ್ ಸೊರಕೆ ಅಧ್ಯಕ್ಷತೆ ವಹಿಸಿದ್ದರು.
ಈ ಸಂದರ್ಭದಲ್ಲಿ ಸಂಸದ ನಳಿನ್ ಕುಮಾರ್ ಕಟೀಲ್ ಹಾಗೂ ಇಂಡಿಯನ್ ಮೆಡಿಕಲ್ ಅಸೋಸಿಯೇಶನ್ ಮಂಗಳೂರು ಘಟಕದ ಅಧ್ಯಕ್ಷ ಡಾ. ರಾಘವೇಂದ್ರ ಭಟ್ ಕೆ., ವಿಧಾನಪರಿಷತ್ ಮುಖ್ಯ ಸಚೇತಕ ಐವನ್ ಡಿಸೋಜ, ವಂ.ಪೀಟರ್ ನೊರೊನ್ಹಾ, ಫಾ. ಮುಲ್ಲರ್ ಚಾರಿಟೇಬಲ್ ಸಂಸ್ಥೆಗಳ ಮಾಜಿ ನಿರ್ದೇಶಕ ಎಂ. ಸೀತಾರಾಮ್ ಶೆಟ್ಟಿ, ಕಾರ್ಪೊರೇಟರ್ ಎ.ಸಿ.ವಿನಯರಾಜ್, ಸಂಸ್ಥೆಯ ಆಡಳಿತ ನಿರ್ದೇಶಕ ಸನ್ನಿ ಜಾನ್ ಹಾಗೂ ಸಹ ನಿರ್ದೇಶಕಿ ಲವಿನಾ ಎಸ್. ಜಾನ್ ಉಪಸ್ಥಿತರಿದ್ದರು.
ಸಹ ನಿರ್ದೇಶಕಿ ಲವಿನಾ ಎಸ್. ಜಾನ್ ಸ್ವಾಗತಿಸಿದರು. ಪತ್ರಕರ್ತ ಮನೋಹರ್ ಪ್ರಸಾದ್ ಕಾರ್ಯಕ್ರಮ ನಿರೂಪಿಸಿದರು.
ನೂತನ ಹೆಲ್ತ್ಕೇರ್ ಸೆಂಟರ್ ಸಂಪೂರ್ಣ ಹವಾನಿಯಂತ್ರಿವಾಗಿದ್ದು, ಸುಸಜ್ಜಿತ, ವಿಶೇಷ ತಜ್ಞ ವೈದ್ಯರನ್ನು ಒಳಗೊಂಡಿದೆ. ಶಿಲ್ಪಾ ಹೆಲ್ತ್ಕೇರ್ ಸೆಂಟರ್ ಅತ್ಯಾಧುನಿಕ ಸೂಪರ್ ಸ್ಪೆಶಾಲಿಟಿ ಪಾಲಿಕ್ಲಿನಿಕ್ ಆಗಿದೆ. ಶೀತಲ್ ಮೆಡಿಕಲ್ ಸೆಂಟರ್ ಎಲ್ಲಾ ರೀತಿಯ ಔಷಧಗಳನ್ನು ಹೊಂದಿರುವ ಫಾರ್ಮಸಿ ಆಗಿದೆ. ಮೆಡಿಕಲ್ ಲ್ಯಾಬೊರೇಟರಿ, ಡಿಜಿಟಲ್ ಎಕ್ಸ್-ರೇ, ಅಲ್ಟ್ರಾಸೌಂಡ್ ಸ್ಕ್ಯಾನಿಂಗ್, ಕಲರ್ ಡೊಪ್ಲರ್ ಹಾಗೂ ಎಕೊ ಎಂಡೋಸ್ಕೊಪಿ ಸೌಲಭ್ಯಗಳು, ಸಣ್ಣ ಶಸ್ತ್ರಚಿಕಿತ್ಸೆಗಳಿಗೆ ಸುಸಜ್ಜಿತ ಮೈನರ್ ಅಪರೇಷನ್ ಥಿಯೇಟರ್, ಶಸ್ತ್ರಚಿಕಿತ್ಸೆಯ ನಂತರದ ಆರೈಕೆ ಕೊಠಡಿಗಳು, ಸಂಪೂರ್ಣ ಆರೋಗ್ಯ ತಪಾಸಣೆಗಾಗಿ ಎಕ್ಸಿಕ್ಯೂಟಿವ್ ಲಾಂಜ್ ಹಾಗೂ ಕ್ಯಾಂಟಿನ್ ಮುಂತಾದ ಅಗತ್ಯ ಸೌಲಭ್ಯಗಳು ಇಲ್ಲಿ ಲಭ್ಯ ಇವೆ.