ಭಾರತೀಯ ತಟರಕ್ಷಣಾ ನೌಕೆಯಿಂದ ಚೀನಾ ಹಡಗಿನ ಸಿಬ್ಬಂದಿಯ ರಕ್ಷಣೆ

ಮಂಗಳೂರು, ಮೇ 16: ನಗರದಿಂದ ಸುಮಾರು 25 ಕಿ.ಮೀ. ದೂರದ ಸಮುದ್ರದಲ್ಲಿ ಮೋಟಾರ್ ಟ್ಯಾಂಕರ್ ಸೀ ಡ್ರಾಗನ್ ಎಂಬ ಹಡಗಿನಲ್ಲಿ ಅಪಾಯದಲ್ಲಿ ಸಿಲುಕಿದ್ದ ಚೀನಾದ ಸಿಬ್ಬಂದಿಯನ್ನು ಭಾರತೀಯ ತಟರಕ್ಷಾ ಪಡೆಯ ಸಾವಿತ್ರಿ ಭಾಯಿ ಫುಲೆ ಹಡಗಿನ ಮೂಲಕ ರಕ್ಷಿಸಲಾಗಿದೆ.

ಸಿಂಗಾಪುರದಿಂದ ಫುಜೈರಾಕ್ಕೆ ತೆರಳುತ್ತಿದ್ದ 230 ಮೀಟರ್ ಉದ್ದದ ಎಲ್‌ಪಿಜಿ ಸಾಗಿಸುವ ಲೈಬೀರಿಯಾ ನೋಂದಣಿ ಹೊಂದಿದ ಎಂಟಿ ಸೀ ಡ್ರಾಗನ್ ಹಡಗಿನಲ್ಲಿದ್ದ ಹಾಂಗ್ ಜಿಯಾಂಗ್ ಎಂಬವರು ತೊಂದರೆಗೆ ಸಿಲುಕಿದ್ದರು. ಈ ಸಂದರ್ಭ ಕರಾವಳಿ ತಟರಕ್ಷಣಾ ಪಡೆಯ ಕರ್ನಾಟಕ ಮುಖ್ಯ ಕಚೇರಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದು, ತಕ್ಷಣವೇ ಭಾರತೀಯ ಕರಾವಳಿ ತಟ ರಕ್ಷಣಾ ಪಡೆಯ ಸಾವಿತ್ರಿಭಾಯಿ ಫುಲೆ ಹಡಗನ್ನು ರಕ್ಷಣೆಗಾಗಿ ಕಳುಹಿಸಲಾಯಿತು.

ಕಮಾಂಡೆಂಟ್ ಮನೀಶ್ ಕುಮಾರ್ ನೇತೃತ್ವದಲ್ಲಿ ಹಾಂಗ್ ಜಿಯಾಂಗ್‌ರವರಿಗೆ ಪ್ರಥಮ ಚಿಕಿತ್ಸೆಯನ್ನು ಒದಗಿಸಿ, ಅವರನ್ನು ಹಡಗಿನಲ್ಲಿ ಹೆಚ್ಚಿನ ಚಿಕಿತ್ಸೆಗಾಗಿ ಕರೆತಂದು ಶಿಪ್ಪಿಂಗ್ ಏಜೆಂಟ್‌ಗೆ ಹಸ್ತಾಂತರಿಸಲಾಯಿತು. ನಂತರ ಹೆಚ್ಚಿನ ವೈದ್ಯಕೀಯ ಚಿಕಿತ್ಸೆಗೆ ವ್ಯವಸ್ಥೆ ಮಾಡಲಾಯಿತು.