ಜೂ.2ರಿಂದ ದಾಂಡೇಲಿಯಲ್ಲಿ ‘ಕಾಳಿ ಕಯಾಕಿಂಗ್ ಉತ್ಸವ’

ಉಡುಪಿ, ಮೇ 31: ರಾಜ್ಯದ ಯುವಜನತೆಯಲ್ಲಿ ಸಾಹಸ ಪ್ರವೃತ್ತಿ ಬೆಳೆಸಲು ಹಾಗೂ ಸಾಹಸ ಕ್ರೀಡೆಗೆ ಉತ್ತೇಜನ ನೀಡಲು ಇದೇ ಮೊದಲ ಬಾರಿಗೆ ರಾಜ್ಯ ಯುವಜನ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ಪ್ರವಾಸೋದ್ಯಮ ಇಲಾಖೆ ಹಾಗೂ ಜನರಲ್ ತಿಮ್ಮಯ್ಯ ರಾಷ್ಟ್ರೀಯ ಸಾಹಸ ಅಕಾಡೆಮಿ (ಜೇತನಾ) ಸಂಸ್ಥೆಯ ಸಹಯೋಗದೊಂದಿಗೆ ರಾಜ್ಯದಾದ್ಯಂತ ಸಾಹಸ ಕ್ರೀಡೆಗಳನ್ನು ಆಯೋ ಜಿಸಲು ನಿರ್ಧರಿಸಿದೆ ಎಂದು ರಾಜ್ಯ ಮೀನುಗಾರಿಕೆ, ಯುವಸಬಲೀಕರಣ ಹಾಗೂ ಕ್ರೀಡಾ ಸಚಿವ ಪ್ರಮೋದ್ ಮಧ್ವರಾಜ್ ತಿಳಿಸಿದ್ದಾರೆ.

ಉಡುಪಿಯಲ್ಲಿಂದು ಕರೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, 2017-18ನೇ ಸಾಲಿನಲ್ಲಿ ಇಂಥ 10 ಸಾಹಸ ಕ್ರೀಡೆ ಗಳನ್ನು ಇಲಾಖೆ ಆಯೋ ಜಿಸಲಿದೆ ಎಂದರು. ಇದರ ಮೊದಲ ಕಾರ್ಯಕ್ರಮವಾಗಿ ಉತ್ತರ ಕನ್ನಡ ಜಿಲ್ಲೆಯ ದಾಂಡೇಲಿ ಸಮೀಪ ಜೊಯಿಡಾ ತಾಲೂಕಿನ ಅವೆಡಾ ಗ್ರಾಮದ ಕಾಳಿ ನದಿಯಲ್ಲಿ ಜೂ.2ರಿಂದ 4ರವರೆಗೆ ‘ಕಾಳಿ ಕಯಾಕಿಂಗ್ ಉತ್ಸವ- 2017’ನ್ನು ಆಯೋಜಿಸಲಾಗುವುದು ಎಂದರು.

 ಆ.4 ಮತ್ತು 5ರಂದು ಬೆಂಗಳೂರಿನಲ್ಲಿ ಬೆಂಗಳೂರು ಬೋಲ್ಡರಿಂಗ್ ಚಾಂಪಿಯನ್‌ಷಿಪ್, ಆ. 26-27ರಂದು ಚಿತ್ರದುರ್ಗ ಜಿಲ್ಲೆ ಹಿರಿಯೂರಿನ ವಾಣಿವಿಲಾಸ ಸಾಗರದಲ್ಲಿ ‘ಸೆಯ್ಲಿಂಗ್ ರಿಗೆಟ್ಟಾ’, ಸೆ.19ರಿಂದ 30ರವರೆಗೆ ಮೈಸೂರಿನಲ್ಲಿ ದಸರಾ ಸಾಹಸೋತ್ಸವ, ಅ.29ರಿಂದ 29ರವರೆಗೆ ಬಾದಾಮಿ ರಾಕ್ ಫೆಸ್ಟಿವಲ್, ನವೆಂಬರ್‌ನಲ್ಲಿ ನಂದಿಬೆಟ್ಟದಲ್ಲಿ ನಂದಿ ಅಡ್ವೆಂಚರ್ ಫೆಸ್ಟಿವಲ್, ಡಿ.16 ಮತ್ತು 17ರಂದು ಉಡುಪಿಯಲ್ಲಿ ಉಡುಪಿ ಅಡ್ವೆಂಚರ್ ಫೆಸ್ಟಿವಲ್, 2018ರ ಜ.6ಮತ್ತು 7ರಂದು ಯಾದಗಿರಿ ಅಡ್ವೆಂಚರ್ ಫೆಸ್ಟಿವಲ್, ಜ.20 ಮತ್ತು 21ರಂದು ಅವಥಿ ಬೋಲ್ಡರಿಂಗ್ ಫೆಸ್ಟಿವಲ್ ಹಾಗೂ ಫೆ.9 ಮತ್ತು 10ರಂದು ಬೆಂಗಳೂರಿನಲ್ಲಿ ‘ಏಷ್ಯಕಪ್ ಸ್ಪೋರ್ಟ್ಸ್ ಕ್ಲೈಮಿಂಗ್ ಸ್ಪರ್ಧೆ ನಡೆಯಲಿದೆ ಎಂದು ಪ್ರಮೋದ್ ತಿಳಿಸಿದರು.

ಸಾಹಸ ಕ್ರೀಡೆಗಳು ಸಾಹಸ ಪ್ರವಾಸೋದ್ಯಮದೊಂದಿಗೆ ನಿಕಟ ಸಂಬಂಧ ಹೊಂದಿರುವುದರಿಂದ ಪ್ರವಾಸೋದ್ಯಮ ಇಲಾಖೆಯ ಸಹಯೋಗದೊಂದಿಗೆ ಅಂತಾರಾಷ್ಟ್ರೀಯ ಮಟ್ಟದ ಈ ಸ್ಪರ್ಧೆಗಳನ್ನು ಆಯೋಜಿಸಲಾಗಿದೆ. ಇದಕ್ಕೆ ಜೇತನಾ ಕೈಜೋಡಿಸಲಿದೆ ಎಂದರು.

ಕಾಳಿ ಕಯಾಕಿಂಗ್ ಅಂತಾರಾಷ್ಟ್ರೀಯ ಮಟ್ಟದ ಸ್ಪರ್ಧೆಯಾಗಿದ್ದು, ಇದರಲ್ಲಿ ಆಸ್ಟ್ರೇಲಿಯ, ನ್ಯೂಜಿಲೆಂಡ್, ಬ್ರಿಟಲ್ ಹಾಗೂ ಅಮೆರಿಕ ಖ್ಯಾತನಾಮ ಕಯಾಕಿಂಗ್ ಪಟುಗಳು ಪಾಲ್ಗೊಳ್ಳಲಿದ್ದಾರೆ. ಈಗಾಗಲೇ 127 ಮಂದಿ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳುವುದನ್ನು ಖಚಿತ ಪಡಿಸಿದ್ದಾರೆ ಎಂದು ಜೇತನಾದ ಸಲಹೆಗಾರ ಕೀರ್ತಿ ಪಾಯಸ್ ತಿಳಿಸಿದರು.

 ಗಣೇಶಗುಡಿಯ ಬಿಳಿನೀರಿನಲ್ಲಿ ನಡೆಯುವ ಕಾಳಿ ಕಯಾಕಿಂಗ್ ವರ್ಷದ ಮೊದಲ ಕ್ರೀಡಾಕೂಟವಾಗಿದ್ದು, ಕೇರಳ ಮಲಬಾರ್‌ನಲ್ಲಿ ಕಳೆದ ಮೂರು ವರ್ಷಗಳಿಂದ ಯಶಸ್ವಿಯಾಗಿ ‘ಮಲಬಾರ್ ಕಯಕ್’ ಸ್ಪರ್ಧೆ ನಡೆಸುವ ಸಂಘಟಕರ ತಾಂತ್ರಿಕ ನೆರವಿನೊಂದಿಗೆ ಈ ಉತ್ಸವ ನಡೆಯಲಿದೆ. ಈ ಮೂಲಕ ಭಾರತದಲ್ಲಿ -ಮಲಬಾರ್, ಮೇಘಾಲಯ ಹಾಗೂ ಗಂಗಾನದಿ ಬಳಿಕ- ಕಯಾಕಿಂಗ್ ಕ್ರೀಡೆ ನಡೆಯುವ ನಾಲ್ಕನೇ ತಾಣ ಕಾಳಿ ನದಿಯಾಗಲಿದೆ ಎಂದು ಪ್ರಮೋದ್ ನುಡಿದರು.

ಕಾಳಿ ನದಿಯ ಬಿಳಿ ನೀರಿನಲ್ಲಿ ಅಲ್ಲೇ ಪಕ್ಕದಲ್ಲಿರುವ ಸೂಪಾ ಅಣೆಕಟ್ಟಿನಿಂದ ನಿಯಂತ್ರಿತವಾಗಿ ಬಿಡುವ ನೀರಿನಿಂದ ವರ್ಷದ 365 ದಿನವೂ ಕಯಾಕಿಂಗ್‌ನ್ನು ನಡೆಸಬಹುದಾಗಿದೆ. ಮೊತ್ತ ಮೊದಲ ಕಾಳಿ ಕಯಾಕಿಂಗ್ ಉತ್ಸವ ಮೂರು ದಿನಗಳ ಕಾಲ ನಡೆಯಲಿದೆ. ಇದರಲ್ಲಿ ದೇಶ-ವಿದೇಶಗಳಿಂದ ಭಾಗವಹಿಸುವ ವೃತ್ತಿಪರರು ಸ್ಪರ್ಧೆಗಳಲ್ಲಿ ಭಾಗವಹಿಸುವರು. ಅವರಿಗೆ ಆಕರ್ಷಕ ನಗದು ಬಹುಮಾನವಿದೆ. ಉಳಿದಂತೆ ಇದೇ ಮೊದಲ ಬಾರಿ ಭಾಗವಹಿಸುವವರು ಹಾಗೂ ಸ್ವಲ್ಪ ಅನುಭವವಿರುವವರೂ ಪ್ರತ್ಯೇಕವಾಗಿ ಭಾಗವಹಿಸಲು ಅವಕಾಶವಿದೆ.

ಉಡುಪಿ ಜಿಲ್ಲೆಯ ಮಣ್ಣಪಳ್ಳದಲ್ಲಿ, ಮಲ್ಪೆ ಹಾಗೂ ಪಡುಕೆರೆ ಬೀಚ್‌ಗಳಲ್ಲಿ ಸಾಹಸ ಕ್ರೀಡೆಗಳನ್ನು ಆಯೋಜಿಸಲು ನಿರ್ಧರಿಸಲಾಗಿದೆ. ಪಡುಕೆರೆ ಬೀಚ್‌ನಲ್ಲಿ ಸ್ಕೂಬಾ ಡೈವಿಂಗ್‌ನ್ನು ಸಹ ಏರ್ಪಡಿಸಲಾಗುವುದು ಎಂದು ಪ್ರಮೋದ್ ತಿಳಿಸಿದರು.

ಉಡುಪಿ ಜಿಲ್ಲಾ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಸಹಾಯಕ ನಿರ್ದೇಶಕ ಡಾ.ರೋಶನ್‌ಕುಮಾರ್ ಶೆಟ್ಟಿ ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

ಸಚಿವ ದೇಶಪಾಂಡೆ ಉದ್ಘಾಟನೆ
ರಾಜ್ಯದಲ್ಲಿ ಇದೇ ಮೊದಲ ಬಾರಿ ನಡೆಯುವ ಕಾಳಿ ಕಯಾಕಿಂಗ್ ಉತ್ಸವವನ್ನು ಜೂ.2ರಂದು ಬೆಳಗ್ಗೆ 9:30ಕ್ಕೆ ಅವೆಡಾ ಗ್ರಾಮದ ಗಣೇಶ ಗುಡಿಯಲ್ಲಿ ಉಕ.ಜಿಲ್ಲಾ ಉಸ್ತುವಾರಿ ಸಚಿವ ಹಾಗೂ ರಾಜ್ಯ ಬೃಹತ್ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಆರ್.ವಿ.ದೇಶಪಾಂಡೆ ಉದ್ಘಾಟಿಸಲಿದ್ದಾರೆ. 

ಪ್ರವಾಸೋದ್ಯಮ ಸಚಿವ ಪ್ರಿಯಾಂಕ ಖರ್ಗೆ ಹಾಗೂ ಕ್ರೀಡಾ ಸಚಿವ ಪ್ರಮೋದ್ ಮಧ್ವರಾಜ್ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿ ದ್ದಾರೆ. ಪ್ರವಾಸೋದ್ಯಮ ಸಚಿವ ಪ್ರಿಯಾಂಕ ಖರ್ಗೆ ಹಾಗೂ ಕ್ರೀಡಾ ಸಚಿವ ಪ್ರಮೋದ್ ಮದ್ವರಾಜ್ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ.