ಅರೆಸೇನಾ ಪಡೆಗಳ ಅಂಗವಿಕಲ ಸಿಬ್ಬಂದಿಗೆ ಪರಿಹಾರ ಮೊತ್ತ 20 ಲ.ರೂ.ಗೆ ಏರಿಕೆ
Update: 2017-06-18 12:53 GMT
ಹೊಸದಿಲ್ಲಿ,ಜೂ.18: ಕೇಂದ್ರ ಗೃಹಸಚಿವಾಲಯವು ಕಾರ್ಯಾಚರಣೆಗಳ ಸಂದರ್ಭ ದಲ್ಲಿ ಗಾಯಗೊಂಡು ಶೇ.100ರಷ್ಟು ಅಂಗವೈಕಲ್ಯಕ್ಕೆ ಗುರಿಯಾಗುವ ಅರೆಸೇನಾ ಪಡೆಗಳ ಸಿಬ್ಬಂದಿಗಳಿಗೆ ನೀಡಲಾಗುವ ಪರಿಹಾರದ ಮೊತ್ತವನ್ನು 9 ಲ.ರೂ.ಗಳಿಂದ 20 ಲ.ರೂ.ಗಳಿಗೆ ಹೆಚ್ಚಿಸಿದೆ. ಈ ಆದೇಶವು 2016,ಜ.1ರಿಂದ ಪೂರ್ವಾನ್ವಯಗೊಂಡಿದೆ. ಏಳನೇ ವೇತನ ಆಯೋಗದ ಶಿಫಾರಸುಗಳನ್ನು ಆಧರಿಸಿ ಈ ಏರಿಕೆಯನ್ನು ಮಾಡಲಾ ಗಿದೆ.
ಎಲ್ಲ ಕೇಂದ್ರ ಅರೆಸೇನಾ ಪಡೆಗಳು ಮತ್ತು ಅಸ್ಸಾಂ ರೈಫಲ್ಸ್‌ಗೆ ಈ ಪರಿಹಾರ ಏರಿಕೆಯ ಲಾಭ ದೊರೆಯಲಿದೆ.ಶೇ.100ಕ್ಕೂ ಕಡಿಮೆ ಅಂಗವೈಕಲ್ಯ ಹೊಂದಿರುವ ಸಿಬ್ಬಂದಿಗಳಿಗೆ ಪರಿಹಾರದ ಮೊತ್ತವು ಅಂಗವೈಕಲ್ಯದ ಪ್ರಮಾಣಕ್ಕೆ ಅನುಗುಣವಾಗಿ ಕಡಿಮೆಯಾಗಬಹುದು ಎಂದು ಸಚಿವಾಲಯವು ತನ್ನ ಇತ್ತೀಚಿನ ಸುತ್ತೋಲೆಯಲ್ಲಿ ತಿಳಿಸಿದೆ.
ಗೃಹ ಸಚಿವಾಲಯದ ಅಧೀನದಲ್ಲಿ ಎಂಟು ಅರೆಸೇನಾ ಪಡೆಗಳ ಸುಮಾರು 10 ಲಕ್ಷ ಸಿಬ್ಬಂದಿಗಳಿದ್ದಾರೆ.