ಖಾತೆ ನೀಡಿಕೆ ನಿಯಮ ಸಡಿಲಗೊಳಿಸಲು ಆಗ್ರಹಿಸಿ ಮನವಿ

ಪುತ್ತೂರು,ಜು.4: ಜಮೀನು ಖಾತೆ ನೀಡಿಕೆ ಮತ್ತು ಕಟ್ಟಡ ಪರವಾನಿಗೆಗೆ ತಾಂತ್ರಿಕ ಸಲಹೆ ನೀಡುವಿಕೆ ನಿಯಮಗಳನ್ನು ಬಿಗಿಗೊಳಿಸಿರುವ ಕಾರಣ ನಗರ ಪ್ರದೇಶಗಳಲ್ಲಿ ಅಗತ್ಯ ಬಳಕೆಗೂ ಖಾತೆ ಸಿಗದೇ ಸಮಸ್ಯೆಯಾಗುತ್ತಿರುವುದು ತನ್ನ ಗಮನಕ್ಕೆ ಬಂದಿದ್ದು, ಈ ಸಮಸ್ಯೆಯನ್ನು ಬಗೆಹರಿಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಬಿ. ರಮಾನಾಥ ರೈ ಅವರು ತಿಳಿಸಿದರು.

 ಪುತ್ತೂರಿಗೆ ಮಂಗಳವಾರ ಭೇಟಿ ನೀಡಿದ ಸಚಿವ ರಮಾನಾಥ ರೈ ಅವರನ್ನು ಕಾಂಗ್ರೆಸ್ ಮುಖಂಡರು ಮತ್ತು ಇಲ್ಲಿನ ನಾಗರಿಕ ಸಮಿತಿಯ ಪ್ರಮುಖರು ಮಿನಿ ವಿಧಾನ ಸೌಧದ ಬಳಿ ಭೇಟಿ ಮಾಡಿ ಮನವಿ ಸಲ್ಲಿಸಿದರು.

ತೀರಾ ಅಗತ್ಯ ಉದ್ದೇಶಗಳಿಗೆ ಜನ ಸಾಮಾನ್ಯರು ಖಾತೆ ಕೇಳಲು ಹೋದರೆ ನಗರಸಭೆಯಲ್ಲಿ ಖಾತೆ ನೀಡುತ್ತಿಲ್ಲ. ನಗರಾಭಿವೃದ್ಧಿ ಇಲಾಖೆ ನೀಡಿದ ಆದೇಶವನ್ನು ತೋರಿಸುತ್ತಿದ್ದಾರೆ. ಮತ್ತೊಂಡೆಗೆ ಪುತ್ತೂರು ನಗರ ಯೋಜನಾ ಪ್ರಾಧಿಕಾರದವರು ಕಟ್ಟಡ ಪರವಾನಿಗೆಗೆ ತಾಂತ್ರಿಕ ಸಲಹೆ ನೀಡುತ್ತಿಲ್ಲ.  ಕಾರಣ ಕೇಳಿದರೆ ನಗರ ಮತ್ತು ಗ್ರಾಮಾಂತರ ಯೋಜನಾ ನಿರ್ದೇಶಕರಿಂದ ಬಂದ ಆದೇಶವನ್ನು ಉಲ್ಲೇಖಿಸುತ್ತಿದ್ದಾರೆ. ಈ ಎರಡು ಆದೇಶಗಳಿಂದ ಜನ ಸಾಮಾನ್ಯರಿಗೆ ಸಮಸ್ಯೆಯಾಗುತ್ತಿದೆ. ಈ ಸಮಸ್ಯೆಗೆ ಕಾರಣವಾದ ಈ ಎರಡೂ ಆದೇಶಗಳಲ್ಲಿನ ನಿಯಮಗಳನ್ನು ಸಡಿಲಗೊಳಿಸಬೇಕು ಎಂದು ಆಗ್ರಹಿಸಿ ಅವರು ಮನವಿ ಸಲ್ಲಿಸಿದರು.

ಮನವಿ ಸ್ವೀಕರಿಸಿದ ಸಚಿವ ರಮಾನಾಥ ರೈ ಅವರು  ಸ್ಥಳದಲ್ಲಿದ್ದ ಉಪವಿಭಾಗಾಧಿಕಾರಿ  ಡಾ.ರಘುನಂದನ ಮೂರ್ತಿ ಅವರಿಗೆ ಮನವಿ ಹಸ್ತಾಂತರಿಸಿ ಜನರಿಗೆ ಸಮಸ್ಯೆಯಾಗದಂತೆ ಸಮಸ್ಯೆಯನ್ನು ಬಗೆಹರಿಸುವಂತೆ ಸೂಚಿಸಿದರು. ಶಾಸಕಿ ಶಕುಂತಳಾ ಶೆಟ್ಟಿ ಅವರು ಸಚಿವರ ಜೊತೆಗಿದ್ದರು.

ಸಮಸ್ಯೆ ಇತ್ಯರ್ಥವಾಗಲಿದೆ ಎಂದು ನಮಗೆ ಸಚಿವರು ನಮಗೆ ಭರವಸೆ ನೀಡಿದ್ದಾರೆ  ಎಂದು ನಿಯೋಗದಲ್ಲಿದ್ದ ಪುತ್ತೂರು ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಪ್ರಸಾದ್ ಕೌಶಲ್ ಶೆಟ್ಟಿ ಮತ್ತು ನಾಗರಿಕ ಸಮಿತಿಯ ಮುಖಂಡರೂ, ಪುತ್ತೂರು ಬ್ಲಾಕ್ ಕಾಂಗ್ರೆಸ್ ಅಲ್ಪಸಂಖ್ಯಾತ ಘಟಕದ ಪ್ರಧಾನ ಕಾರ್ಯದರ್ಶಿಯೂ ಆಗಿರುವ ಇಸಾಕ್ ಸಾಲ್ಮರ ಅವರು ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ನಿಯೋಗದಲ್ಲಿ ಪುತ್ತೂರು ಬ್ಲಾಕ್ ಮಹಿಳಾ ಘಟಕದ ಅಧ್ಯಕ್ಷೆ ವಿಶಾಲಾಕ್ಷಿ ಬನ್ನೂರು, ನಗರ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆ ವಿಲ್ಮಾ, ಕಾಂಗ್ರೆಸ್ ಮುಖಂಡರಾದ ಸೂತ್ರಬೆಟ್ಟು ಜಗನ್ನಾಥ ರೈ,  ಜತ್ತಪ್ಪ ಗೌಡ, ನೂರುದ್ದೀನ್ ಸಾಲ್ಮರ, ಹಸೈನಾರ್ ಬನಾರಿ, ಲ್ಯಾನ್ಸಿ ಮಸ್ಕರೇನಸ್, ಯಾಕೂಬ್ ಹಾಜಿ ದರ್ಬೆ ಮತ್ತಿತರರಿದ್ದರು.

ಇದು ಸಮಸ್ಯೆ.....ಹೀಗಿದೆ ಆಗ್ರಹ

ಸಕ್ಷಮ ಪ್ರಾಧಿಕಾರದಿಂದ ಅನುಮೋದಿತ ನಕ್ಷೆ ಪಡೆಯದ ಹೊರತು ಅಂಥ ಜಮಿನಿಗೆ ಖಾತೆ ಕೊಡಬಾರದು ಎಂಬುದು ನಗರಾಭಿವೃದ್ಧಿ ಇಲಾಖೆಯ ಕಟ್ಟುನಿಟ್ಟಿನ ಸೂಚನೆ. ಅನುಮೋದಿತ ನಕ್ಷೆಯನ್ನು ಆಯಾ ನಗರಾಭಿವೃದ್ಧಿ ಪ್ರಾಧಿಕಾರ/ ನಗರ ಯೋಜನಾ ಪ್ರಾಧಿಕಾರ ನೀಡಬೇಕು. ಈ ನಕ್ಷೆ ಪಡೆಯಬೇಕಾದರೆ ಜಮೀನು ಸಿಂಗಲ್ ಲೇಔಟ್ ಆಗಿರುವುದು (ಏಕ ವಿನ್ಯಾಸ) ನಕ್ಷೆಯಲ್ಲಿ ಕಾಣಿಸಬೇಕಾಗುತ್ತದೆ. ಅನುಮೋದಿತ ನಕ್ಷೆ ಪಡೆಯುವುದೆಂದರೆ ಅದೇ ಪ್ರಾಧಿಕಾರದಿಂದ ಸಿಂಗಲ್ ಲೇಔಟ್ ಮಾಡಿಸಬೇಕು ಎಂಬುದೇ ಅರ್ಥ.

ಸಿಂಗಲ್ ಲೇಔಟ್ ಮಾಡಿಸಬೇಕಾದರೆ ಕನ್ವರ್ಶನ್ ಆದ ಜಮೀನಿನ 45 ಶೇ. ಭಾಗವನ್ನು ಸ್ಥಳೀಯ ಸಂಸ್ಥೆಗೆ ಬಿಟ್ಟುಕೊಡಬೇಕು. ಸಿಂಗಲ್ ಲೇಔಟ್ ಮಾಡಿಸದಿದ್ದರೆ ಖಾತೆ ಕೊಡುವುದಿಲ್ಲ ಎಂಬ ನಿಯಮವನ್ನು ಸರಳಗೊಳಿಸಬೇಕು ಎಂಬುದು ಆಗ್ರಹ. ಕರ್ನಾಟಕ ಪೌರ ಕಾಯಿದೆ 1964ರ ಕಲಂ 387 ಜಾರಿಯಾಗಿದ್ದು 1976ರ ಡಿಸೆಂಬರ್ 8ರಂದು. ಅದಕ್ಕಿಂತ ಹಿಂದೆ ಕನ್ವರ್ಶನ್ ಆದ ಜಮೀನುಗಳಿಗೆ ಕಟ್ಟಡ ನಿರ್ಮಾಣಕ್ಕೆ ತಾಂತ್ರಿಕ ಸಲಹೆ ಕೊಡಬಹುದು. ನಂತರ ಕನ್ವರ್ಶನ್ ಆದ ಜಮೀನುಗಳಿಗೆ ತಾಂತ್ರಿಕ ಸಲಹೆ ನೀಡಬೇಕಾದರೆ ವಿನ್ಯಾಸ ನಕ್ಷೆ ಆಗಿರಲೇಬೇಕು ಎಂದು ನಗರ ಯೋಜನಾ ಪ್ರಾಧಿಕಾರಕ್ಕೂ ಸೂಚಿಸಲಾಗಿದೆ. ಇದನ್ನೂ ಪರಿಷ್ಕರಿಸಬೇಕು. 1976ರ ನಂತರ ಎಂಬುದನ್ನು ಬದಲಾಯಿಸಿ ನಗರ ಯೋಜನಾ ಪ್ರಾಧಿಕಾರ ರಚನೆಯಾದ ನಂತರ ಎಂದು ಮಾರ್ಪಾಡು ಮಾಡಬೇಕು ಎಂದು ಆಗ್ರಹಿಸಲಾಗಿದೆ.