ಆಹಾರ ಸಂಸ್ಕರಣಾ ಘಟಕ ಮಂಜೂರಾತಿಗೆ ಯತ್ನ: ಶೋಭಾ ಕರಂದ್ಲಾಜೆ

ಉಡುಪಿ, ಜು.4: ಉಡುಪಿ ಜಿಲ್ಲೆಗೆ ಆಹಾರ ಸಂಸ್ಕರಣಾ ಘಟಕವನ್ನು ಮಂಜೂರು ಮಾಡಲು ಪ್ರಯತ್ನಿಸಲಾಗುವುದು. ಇದಕ್ಕೆ ಬೇಕಾದ 20 ಎಕರೆ ಜಾಗವನ್ನು ಬೆಳಪುವಿನ ಕೈಗಾರಿಕೆ ವಲಯದಲ್ಲಿ ಒದಗಿಸಬೇಕಾಗಿದೆ ಎಂದು ಉಡುಪಿ ಚಿಕ್ಕಮಗಳೂರು ಸಂಸದೆ ಶೋಭಾ ಕರಂದ್ಲಾಜೆ ಹೇಳಿದ್ದಾರೆ.

ಮಣಿಪಾಲದಲ್ಲಿರುವ ಉಡುಪಿ ಜಿಪಂ ಸಭಾಂಗಣದಲ್ಲಿ ಮಂಗಳವಾರ ನಡೆದ ಉಡುಪಿ ಜಿಲ್ಲಾ ಅಭಿವೃದ್ಧಿ ಸಮನ್ವಯ ಮತ್ತು ಉಸ್ತುವಾರಿ ಸಮಿತಿ ಸಭೆ(ದಿಶಾ)ಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡುತಿದ್ದರು.

ಜಿಲ್ಲೆಯ ಎಲ್ಲಾ 158 ಗ್ರಾಪಂಗಳನ್ನು ನಗದು ರಹಿತ ಮಾಡುವ ನಿಟ್ಟಿನಲ್ಲಿ 40 ಗ್ರಾಪಂಗಳಿಗೆ ವಿತರಿಸಲಾಗಿರುವ ಪೋಸ್‌ಮೆಷಿನ್‌ಗೆ ಆಯಾ ಬ್ಯಾಂಕಿನ ವರು ಬಾಡಿಗೆ ಹಣ ಹಾಗೂ ಸೇವಾ ವೆಚ್ಚವನ್ನು ಪಡೆಯುತ್ತಿರುವುದರಿಂದ ಗ್ರಾಪಂಗಳು ಅದರ ಬಳಕೆಯನ್ನು ನಿಲ್ಲಿಸಿದ್ದು, ಈ ನಿಟ್ಟಿನಲ್ಲಿ ಪೋಸ್ ಮೆಷಿನ್ ಬದಲು ಮೊಬೈಲ್ ಬ್ಯಾಕಿಂಗ್ ಮೂಲಕ ನಗದುರಹಿತ ವ್ಯವಹಾರ ನಡೆಸಲು ಕ್ರಮ ತೆಗೆದುಕೊಳ್ಳಬೇಕೆಂದು ಸಂಸದೆ ಶೋಭಾ ಸಲಹೆ ನೀಡಿದರು.

ಲೀಡ್ ಬ್ಯಾಂಕಿನ ಮೆನೇಜರ್ ಫ್ರಾನ್ಸಿಸ್ ಮಾತನಾಡಿ, ಪೊಸ್ ಮೆಶಿನ್‌ಗೆ ಬ್ಯಾಂಕಿನವರು ಪ್ರತಿ ತಿಂಗಳು 100-800ರೂ. ಬಾಡಿಗೆ ಹಣ ಮತ್ತು ಪ್ರತಿ ಯೊಂದು ವ್ಯವಹಾರಕ್ಕೆ ಮರ್ಚಂಟ್ ಡಿಸ್ಕೌಂಟ್ ರೇಟ್ ಕಮಿಷನ್ ಪಡೆಯು ತ್ತಿದ್ದಾರೆ. ಇದರಿಂದ ಗ್ರಾಪಂಗಳು ಆ ಮೆಶಿನ್ ಬಳಕೆ ನಿಲ್ಲಿಸಿವೆ. ಇದರಿಂದ ಗ್ರಾಪಂಗಳಲ್ಲಿ ನಗದುರಹಿತ ವ್ಯವಹಾರ ಅನುಷ್ಠಾನ ಸಾಧ್ಯವಾಗುತ್ತಿಲ್ಲ ಎಂದರು.

ಮೊಬೈಲ್ ಬ್ಯಾಂಕಿಂಗ್ ಮೂಲಕ ನಗದು ವ್ಯವಹಾರ ನಡೆಸಲು ಪೈಲಟ್ ಯೋಜನೆಯಾಗಿ ಒಂದು ಗ್ರಾಮದಲ್ಲಿ ಈ ವ್ಯವಸ್ಥೆ ಅಳವಡಿಸಿ ನಂತರ ಎಲ್ಲಾ ಗ್ರಾಮಗಳಿಗೆ ವಿಸ್ತರಿಸಬೇಕು ಎಂದು ಕರಂದ್ಲಾಜೆ ಸೂಚಿಸಿದರು. ಎಲ್ಲಾ ಬ್ಯಾಂಕ್ ಗಳು ಒಂದೊಂದು ಗ್ರಾಮಗಳನ್ನು ದತ್ತು ಪಡೆದು ಈ ಯೋಜನೆಯನ್ನು ಅಳವಡಿಸಬೇಕು ಎಂದು ಜಿಲ್ಲಾಧಿಕಾರಿ ತಿಳಿಸಿದರು.

ಕುಂದಾಪುರ ತಾಲೂಕಿನ ಹಳ್ಳಾಡಿ ಗ್ರಾಮದಲ್ಲಿ ಮೊಬೈಲ್ ಬ್ಯಾಂಕಿಂಗ್ ನೊಂದಣಿ ಪೂರ್ಣಗೊಂಡಿದ್ದು, ಒಂದು ವಾರದೊಳಗೆ ಈ ಗ್ರಾಮವನ್ನು ನಗದು ರಹಿತ ವ್ಯವಹಾರ ಗ್ರಾಮವನ್ನಾಗಿ ಘೋಷಿಸಲಾಗುವುದು ಎಂದು ಅಧಿಕಾರಿ ಗಳು ಸಭೆಗೆ ತಿಳಿಸಿದರು.

1.20ಲಕ್ಷ ಹೆಸರು ಡಿಲಿಟ್:ಜಿಲ್ಲೆಯಲ್ಲಿ ಪಡಿತರ ಚೀಟಿಗೆ ಆಧಾರ್ ಕಾರ್ಡ್ ಲಿಂಕ್ ನೀಡದ 1.20ಲಕ್ಷ ಹೆಸರುಗಳನ್ನು ಡಿಲಿಟ್ ಮಾಡಲಾಗಿದೆ. ಸದ್ಯಕ್ಕೆ ಹೊಸ ಕಾರ್ಡ್ ನೀಡುವುದು ನಿಲ್ಲಿಸಲಾಗಿದೆ ಎಂದು ಆಹಾರ ಇಲಾಖೆಯ ಅಧಿಕಾರಿ ಸಭೆಗೆ ತಿಳಿಸಿದರು. ಡಿಲಿಟ್ ಆಗಿರುವ ಹೆಸರುಗಳ ಮರು ಸೇರ್ಪಡೆಗೆ ಕ್ರಮ ಕೈಗೊಳ್ಳಬೇಕೆಂದು ಶೋಭಾ ಕರಂದ್ಲಾಜೆ ಸೂಚಿಸಿದರು.

ಜಿಲ್ಲೆಯಲ್ಲಿರುವ 300 ನ್ಯಾಯಬೆಲೆ ಅಂಗಡಿಗಳ ಪೈಕಿ 40 ಅಂಗಡಿಗಳಿಗೆ ಪೋಸ್ ಮೆಶಿನ್ ನೀಡಲಾಗಿದೆ. ಪೋಸ್ ಮೆಶಿನ್ ಬಳಸುವ ಅಂಗಡಿಗಳಿಗೆ ಹೆಚ್ಚಿನ ಕಮಿಷನ್ ನೀಡಲಾಗುತ್ತಿದೆ. ಎಲ್ಲ ಅಂಗಡಿಗಳು ಈ ಮೆಶಿನ್ ಬಳಸು ವಂತೆ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ಅಧಿಕಾರಿ ಹೇಳಿದರು.

ನರ್ಮ್ ಹಾಗೂ ಖಾಸಗಿ ಬಸ್‌ಗಳ ಮಧ್ಯೆ ಸಾಕಷ್ಟು ಪೈಪೋಟಿ ನಡೆಯುತ್ತಿದ್ದು, ಇದರಿಂದ ನರ್ಮ್ ಬಸ್‌ಗಳು ಖಾಲಿಯಾಗಿ ಸಂಚರಿಸುತ್ತಿದೆ ಎಂಬ ಸಮಿತಿಯ ಸದಸ್ಯರ ದೂರಿಗೆ ಪ್ರತಿಕ್ರಿಯಿಸಿದ ಸಂಸದೆ, ನರ್ಮ್ ಬಸ್‌ಗಳ ಸಮಯವನ್ನು ಬದಲಾಯಿಸುವಂತೆ ಎಆರ್‌ಟಿಓಗೆ ಸೂಚನೆ ನೀಡಿದರು.

ದೀನ ದಯಾಳ್ ಉಪಾಧ್ಯಾಯ ವಿದ್ಯುದ್ದೀಕರಣ ಯೋಜನೆಯಲ್ಲಿ ಜಿಲ್ಲೆಯ 3024 ಮನೆಗಳಿಗೆ ಸಂಪರ್ಕ ಕಲ್ಪಿಸಲು 9.41 ಕೋಟಿ ರೂ. ಅಂದಾಜು ವೆಚ್ಚ ತಯಾರಿಸಲಾಗಿದ್ದು, ಈ ಬಗ್ಗೆ ಸರ್ವೆ ಕಾರ್ಯ ನಡೆಯುತ್ತಿದೆ ಎಂದು ಮೆಸ್ಕಾಂ ಅಧಿಕಾರಿಗಳು ಮಾಹಿತಿ ನೀಡಿದರು.

ಉಡುಪಿ ತಾಲೂಕಿನಲ್ಲಿ 11ಸಾವಿರ, ಕುಂದಾಪುರ ತಾಲೂಕಿನಲ್ಲಿ 7618 ಮತ್ತು ಕಾರ್ಕಳ ತಾಲೂಕಿನಲ್ಲಿ 2749 ನಿವೇಶನ ರಹಿತರಿದ್ದು, ಬಸವ ವಸತಿ ಯೋಜನೆಯಲ್ಲಿ 3255 ಕುಟುಂಬಗಳಿಗೆ ಮನೆ ಮಂಜೂರು ಆಗಿದೆ ಎಂದು ಜಿಲ್ಲಾ ಪಂಚಾಯತ್ ಯೋಜನಾ ನಿರ್ದೇಶಕಿ ನಯನಾ ತಿಳಿಸಿದರು

100 ಟವರ್ ಅವಶ್ಯಕ: ಜಿಲ್ಲೆಯಲ್ಲಿ ಬಿಎಸ್‌ಎನ್‌ಎಲ್‌ನ 216 2ಜಿ ಹಾಗೂ 164 3ಜಿ ಟವರ್‌ಗಳನ್ನು ಈಗಾಗಲೇ ಅಳವಡಿಸಲಾಗಿದೆ. ಇಡೀ ಜಿಲ್ಲೆಗೆ ಇನ್ನು 100 ಟವರ್‌ಗಳ ಅವಶ್ಯಕ ಇದೆ. ಈ ಸಂಬಂಧ ಉಡುಪಿ ತಾಲೂಕಿನಲ್ಲಿ 47, ಕಾರ್ಕಳ 31, ಕುಂದಾಪುರ 40 ಹೊಸ ಟವರ್‌ಗೆ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದು ಬಿಎಸ್‌ಎನ್‌ಎಲ್ ಅಧಿಕಾರಿಗಳು ತಿಳಿಸಿದರು.

ಕರೆಂಟ್ ಹೋದ ಸಮಯದಲ್ಲಿ ಬಿಎಸ್‌ಎನ್‌ಎಲ್ ನೆಟ್‌ವರ್ಕ್ ಸಿಗುತ್ತಿಲ್ಲ ಎಂದು ಹಲವು ದೂರುಗಳು ಬರುತ್ತಿವೆ. ಈ ಕುರಿತು ಸಂಬಂಧಪಟ್ಟ ಅಧಿಕಾರಿ ಗಳು ಕ್ರಮ ಕೈಗೊಳ್ಳಬೇಕು. ಟವರ್‌ಗಳ ನಿರ್ವಹಣೆಗೆ ಸರಬರಾಜು ಆಗುತ್ತಿರುವ ಡೀಸೆಲ್ ಮಾಹಿತಿಯನ್ನು ನೀಡಬೇಕು ಎಂದು ಶೋಭಾ ಕರಂದ್ಲಾಜೆ ಸೂಚನೆ ನೀಡಿದರು. ಮಿಂಚು ಬಂದಾಗ ಮಾತ್ರ ನಾವು ಟವರ್ ಆಫ್ ಮಾಡುತ್ತೇವೆ ಎಂದು ಅಧಿಕಾರಿಗಳು ತಿಳಿಸಿದರು.

ಮಲ್ಪೆಯಲ್ಲಿರುವ ಕೇಂದ್ರೀಯ ವಿದ್ಯಾಲಯಕ್ಕೆ ಈಗಾಗಲೇ ಗುರುತಿಸಿರುವ ಜಾಗದಲ್ಲಿ ಕಟ್ಟಡ ನಿರ್ಮಾಣಕ್ಕೆ ಸಮಸ್ಯೆ ಇರುವುದರಿಂದ ಶೀಘ್ರದಲ್ಲಿ ಬೇರೆ ಜಾಗವನ್ನು ಗುರುತಿಸಬೇಕು ಎಂದು ಶೋಭಾ ಜಿಲ್ಲಾಧಿಕಾರಿಗಳಿಗೆ ತಿಳಿಸಿದರು. ಈಗ ಇರುವ ಕಟ್ಟಡದಲ್ಲಿ ಸ್ಥಳದ ಕೊರತೆ ಇರುವುದರಿಂದ ಹೆಚ್ಚುವರಿ ಒಂದು ಕೋಣೆಯನ್ನು ಒದಗಿಸುವಂತೆ ಅವರು ಡಿಡಿಪಿಐಗೆ ಸೂಚಿಸಿದರು. ಸಭೆೆಯಲ್ಲಿ ಅಪರ ಜಿ್ಲಾಧಿಕಾರಿ ಅನುರಾಧ ಉಪಸ್ಥಿತರಿದ್ದರು.