ಮೊಸುಲ್ ಐಸಿಸ್ ಮುಕ್ತ
Update: 2017-07-09 23:09 IST
ಮೊಸುಲ್,ಜು.10: ಐಸಿಸ್ ವಿರುದ್ಧ ಸುಮಾರು ಎಂಟು ತಿಂಗಳುಗಳ ಭೀಕರ ಸಮರದ ಬಳಿಕ ಕೊನೆಗೂ ಇರಾಕ್ನ ಪ್ರಮುಖ ನಗರ ಮೊಸುಲ್, ಇರಾಕಿ ಪಡೆಗಳ ವಶವಾಗಿದೆ. ಇದರೊಂದಿಗೆ ಆಯಕಟ್ಟಿನ ದೃಷ್ಟಿಯಿಂದ ಅತ್ಯಂತ ಮಹತ್ವದ್ದಾಗಿದ ಈ ನಗರದಲ್ಲಿ ಮೂರು ವರ್ಷಗಳ ಐಸಿಸ್ ಆಳ್ವಿಕೆ ಅಂತ್ಯಗೊಂಡಿದೆ.
ಆದಾಗ್ಯೂ ಸರಕಾರಿ ಪಡೆಗಳು ಹಾಗೂ ಐಸಿಸ್ ಉಗ್ರರ ನಡುವಿನ ಭೀಕರ ಕಾಳಗದಿಂದಾಗಿ ಈ ನಗರವು ಬಹುತೇಕ ಭಾಗಗಳು ಸಂಪೂರ್ಣವಾಗಿ ಜರ್ಝರಿತವಾಗಿದ್ದು, ಎಲ್ಲೆಡೆ ಕುಸಿದುಬಿದ್ದ ಕಟ್ಟಡಗಳ ಅವಶೇಷಗಳು ಕಂಡು ಬರುತ್ತಿವೆ. ಇಡೀ ನಗರ ಪಾಳುಬಿದ್ದ ಸ್ಥಿತಿಯಲ್ಲಿದೆ. ಮೊಸುಲ್ ನಗರದಲ್ಲಿ ಕಳೆದ ಎಂಟು ತಿಂಗಳುಗಳಿಂದ ನಡೆದ ರಕ್ತಸಿಕ್ತ ಕಾಳಗದಲ್ಲಿ ಮಕ್ಕಳು, ಮಹಿಳೆಯರು ಸೇರಿದಂತೆ ಸಾವಿರಾರು ನಾಗರಿಕರು ಹತರಾಗಿದ್ದಾರೆ ಹಾಗೂ ಲಕ್ಷಾಂತರ ಮಂದಿ ನಿರಾಶ್ರಿತರಾಗಿದ್ದಾರೆ.
ಮೊಸುಲ್ ನಗರವನ್ನು ಇರಾಕಿ ಪಡೆಗಳು ಇಂದು ಸಂಪೂರ್ಣವಾಗಿ ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಂಡ ಬೆನ್ನಲ್ಲೇ, ಇರಾಕಿ ಪ್ರಧಾನಿ ಹೈದರ್ ಅಬಾದಿ ಅಲ್ಲಿಗೆ ಭೇಟಿ ನೀಡಿ ಸೇನಾ ಮುಖ್ಯಸ್ಥರನ್ನು ಭೇಟಿ ನೀಡಿದರು. ಮೊಸುಲ್ನಲ್ಲಿ ಸಾಧಿಸಿದ ವಿಜಯಕ್ಕಾಗಿ ಅವರು ವೀರ ಸೈನಿಕರನ್ನು ಹಾಗೂ ಇರಾಕಿ ನಾಗರಿಕರನ್ನು ಅಭಿನಂದಿಸಿದರು ಎಂದು ಅವರು ಕಾರ್ಯಾಲಯದ ಹೇಳಿಕೆ ತಿಳಿಸಿದೆ.
ಐಸಿಸ್ ಉಗ್ರರ ವಶದಿಂದ ವಿಮೋಚನೆಗೊಂಡ ಮೊಸುಲ್ನಗರವನ್ನು ಸಂದರ್ಶಿಸಿದ ವರದಿಗಾರರಿಗೆ ಅಲ್ಲಿನ ಹಳೆಯ ನಗರದ ಕಿರಿದಾದ ಓಣಿಗಳಲ್ಲಿ ಬಿದ್ದಿದ ಉಗ್ರರ ಹೆಣಗಳು ಸಾಲುಸಾಲಾಗಿ ಬಿದ್ದಿರುವುದು ಕಂಡುಬಂದಿತು. ಈ ಪ್ರದೇಶವು ಐಸಿಸ್ ಉಗ್ರರು ಹಾಗೂ ಇರಾಕಿ ಪಡೆಗಳ ನಡುವಿನ ಸುದೀರ್ಘ ಕಾಲದ ಹೋರಾಟಕ್ಕೆ ಸಾಕ್ಷಿಯಾಗಿತ್ತು.
ಮೊಸುಲ್ನಲ್ಲಿ ಕೊನೆ ಉಸಿರಿನ ತನಕವೂ ಹೋರಾಡುವುದಾಗಿ ಐಸಿಸ್ ಗುಂಪು ಹೇಳಿಕೊಳ್ಳುತ್ತಲೇ ಬಂದಿತ್ತು. ಆದಾಗ್ಯೂ ನಗರದ ನಡುವೆ ಹಾದುಹೋಗುವ ಟೈಗ್ರಿಸ್ ನದಿಯಲ್ಲಿ ಈಜಿ ಪರಾರಿಯಾಗಲು ಯತ್ನಿಸುತ್ತಿದ್ದ 20 ಮಂದಿ ಭಯೋತ್ಪಾದಕರನ್ನು ಕೊಂದುಹಾಕಿರುವುದಾಗಿ ಇರಾಕಿ ಸೇನಾ ವಕ್ತಾರ ಜನರಲ್ ಯಾಹ್ಯಾ ರಸೂಲ್, ಇಂದು ಟಿವಿ ವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಇದೀಗ ಮೊಸುಲ್ನ ಹೊರವಲಯದಲ್ಲಿ ಚದುರಿ ಹೋಗಿರುವ ಉಗ್ರರು, ನಗರಕ್ಕೆ ವಾಪಾಸಾಗುತ್ತಿರುವ ಸಹಸ್ರಾರು ನಾಗರಿಕರೊಂದಿಗೆ ತಮ್ಮ ಮಹಿಳಾ ಬಾಂಬರ್ಗಳನ್ನು ಕಳುಹಿಸಿ, ವಿಧ್ವಂಸಕ ಕೃತ್ಯಗಳನ್ನು ನಡೆಸಲು ಸಂಚು ಹೂಡಿದ್ದಾರೆಂದು ವರದಿಗಳು ತಿಳಿಸಿವೆ.
ಈ ಸುದೀರ್ಘ ಯುದ್ಧದಲ್ಲಿ ಇರಾಕಿ ಸೇನೆಯೂ ಭಾರೀ ಬೆಲೆಯನ್ನು ತೆರಬೇಕಾಗಿ ಬಂದಿದ್ದು, ಅದರ ನೂರಾರು ಯೋಧರು ಸಾವನ್ನಪ್ಪಿದ್ದಾರೆ. ಮೊಸೂಲ್ನಲ್ಲಿ ಇರಾಕ್ ಸೇನೆಯು ಐಸಿಸ್ ವಿರುದ್ಧದ ಕಾರ್ಯಾಚರಣೆಗೆ ಬೆಂಬಲವಾಗಿ ಅಮೆರಿಕವು ಅಲ್ಲಿದ್ದ ಉಗ್ರರ ನೆಲೆಗಳ ಮೇಲೆ ವೈಮಾನಿಕ ಬಾಂಬ್ ದಾಳಿ ನಡೆಸಿತ್ತು ಹಾಗೂ ಇರಾಕಿ ಸೇನೆಯ ಕಾರ್ಯಾಚರಣೆಗಳಲ್ಲೂ ಲ್ಲೂ ನೆರವಾಗಿದ್ದವು.
ಭದ್ರಕೋಟೆ ಕಳೆದುಕೊಂಡ ಐಸಿಸ್
*ತನ್ನ ನಿಯಂತ್ರಣದಲ್ಲಿದ್ದ ಅತಿ ದೊಡ್ಡ ನಗರವಾದ ಮೊಸುಲ್ನ್ನು ಕಳೆದುಕೊಂಡ ಬಳಿಕ ಇರಾಕ್ನಲ್ಲಿ ಐಸಿಸ್ ಆಧಿಪತ್ಯ ಈಗ ಮೊಸುಲ್ ನಗರದ ಹೊರವಲಯದಲ್ಲಿರುವ ದಕ್ಷಿಣ ಹಾಗೂ ಪಶ್ಚಿಮ ಭಾಗಗಳಲ್ಲಿನ ಗ್ರಾಮೀಣ ಹಾಗೂ ಮರುಭೂಮಿ ಪ್ರದೇಶಗಳಿಗಷ್ಟೇ ಸೀಮಿತವಾಗಿವೆ.
*ಮಧ್ಯಯುಗದ ಗ್ರಾಂಡ್ ಅಲ್ ನೂರಿ ಮಸೀದಿಯಿಂದಐಸಿಸ್ ನಾಯಕ ಅಬುಬಕರ್ ಅಲ್ ಬಗ್ದಾದಿ ಖಲೀಫೇಟ್ ರಾಜ್ಯವನ್ನು ಘೋಷಿಸಿ, ಹೆಚ್ಚುಕಮ್ಮಿ ಮೂರು ವರ್ಷಗಳು ತುಂಬಿದಾಗಲೇ ಮೊಸುಲ್ ಇರಾಕಿ ಪಡೆಗಳ ವಶವಾಗಿದೆ
*ಇರಾಕಿ ಪಡೆಗಳು ಅಲ್ ನೂರಿ ಮಸೀದಿಯನ್ನು ಕಳೆದ ವಾರ ವಶಪಡಿಸಿಕೊಂಡ ಬಳಿಕ ಇರಾಕಿ ಪ್ರಧಾನಿ ಅಬಾದಿ ಅವರು ಐಸಿಸ್ನ ಸುಳ್ಳು ಸಾಮ್ರಾಜ್ಯದ ಅಂತ್ಯ ಸಮೀಪಿಸಿದೆ ಎಂದು ಘೋಷಿಸಿದ್ದರು.