ರಾಜ್ಯಕ್ಕೆ ಪ್ರತ್ಯೇಕ ಧ್ವಜ: ಸಿದ್ದರಾಮಯ್ಯ ಸರಕಾರ ಪ್ರಸ್ತಾಪ

ಹೊಸದಿಲ್ಲಿ,ಜು.18: ಕರ್ನಾಟಕಕ್ಕೆ ಪ್ರತ್ಯೇಕ ಧ್ವಜವನ್ನು ವಿನ್ಯಾಸಗೊಳಿಸುವ ಸಾಧ್ಯತೆಯ ಬಗ್ಗೆ ಅಧ್ಯಯನ ನಡೆಸಲು ಹಾಗೂ ಆ ಧ್ವಜಕ್ಕೆ ಸಾಂವಿಧಾನಿಕ ಸ್ಥಾನಮಾನ ನೀಡಲು ರಾಜ್ಯ ಸರಕಾರವು 9 ಮಂದಿ ಸದಸ್ಯರ ಸಮಿತಿಯೊಂದನ್ನು ರಚಿಸಿದೆ. ರಾಜ್ಯಕ್ಕೆ ಪ್ರತ್ಯೇಕ ಧ್ವಜವೊಂದನ್ನು ವಿನ್ಯಾಸಗೊಳಿಸುವಂತೆ ರಾಜ್ಯದ ಕನ್ನಡಪರ ಹೋರಾಟಗಾರರು ಹಾಗೂ ಅನೇಕ ರಾಜಕಾರಣಿಗಳು ಹಲವಾರು ವರ್ಷಗಳಿಂದ ಆಗ್ರಹಿಸುತ್ತಿದ್ದರು.

ರಾಜ್ಯಕ್ಕೊಂದು ಅಧಿಕೃತ ಧ್ವಜವನ್ನು ವಿನ್ಯಾಸಗೊಳಿಸಬೇಕೆಂದು ಆಗ್ರಹಿಸಿ ಹಿರಿಯ ಪತ್ರಕರ್ತ ಸಾಹಿತಿ ಪಾಟೀಲ ಪುಟ್ಟಪ್ಪ ಹಾಗೂ ಸಾಮಾಜಿಕ ಕಾರ್ಯಕರ್ತ ಭೀಮಪ್ಪ ಗುಂಡಪ್ಪ ಗಡಾಡ ಅವರು ರಾಜ್ಯಸರಕಾರವನ್ನು ಆಗ್ರಹಿಸಿದ ಹಿನ್ನೆಲೆಯಲ್ಲಿ ಕನ್ನಡ ಹಾಗೂ ಸಂಸ್ಕೃತಿ ಇಲಾಖೆಯ ಪ್ರಧಾನ ಕಾರ್ಯದರ್ಶಿಯವರ ನೇತೃತ್ವದಲ್ಲಿ ಸಮಿತಿ ರಚನೆಯಾಗಿತ್ತು.

  ಪ್ರಸ್ತಾಪಿತ ರಾಜ್ಯ ಧ್ವಜಕ್ಕೆ ಕಾನೂನಾತ್ಮಕ ಸ್ಥಾನಮಾನ ಲಭಿಸುವುದನ್ನು ಕರ್ನಾಟಕ ಸರಕಾರ ಖಾತರಿಪಡಿಸಬೇಕು ಈ ವಿಷಯದ ಪರಾಮರ್ಶೆಗಾಗಿ ಸಮಿತಿಯೊಂದನ್ನು ರಚಿಸಬೇಕೆಂದು ಅವರು ಆಗ್ರಹಿಸಿದ್ದರು. ಕರ್ನಾಟಕಕ್ಕೆ ಪ್ರತ್ಯೇಕ ಧ್ವಜ ಬೇಕೆಂದು ಆಗ್ರಹಿಸಿ 2014ರಲ್ಲಿ ಗಡಾದ ಅವರು ಅರ್ಜಿಯೊಂದನ್ನು ಸಲ್ಲಿಸಿದ್ದು, ಅದರಲ್ಲಿ ಅವರು ರಾಜ್ಯಕ್ಕೆ ಪ್ರತ್ಯೇಕ ಧ್ವಜವನ್ನು ವಿನ್ಯಾಸಗೊಳಿಸಿ, ಅದಕ್ಕೆ ಮಾನ್ಯತೆ ನೀಡುವಂತೆ ಮಾಡಲು ಸಮಿತಿಯೊಂದನ್ನು ರಚಿಸುವಂತೆ ಆಗ್ರಹಿಸಿದ್ದರು.

ಪ್ರಸ್ತಾಪಿತ ರಾಜ್ಯ ಧ್ವಜ ವಿನ್ಯಾಸ ಸಮಿತಿಯು ಸಿಬ್ಬಂದಿ ಹಾಗೂ ಆಡಳಿತಾತ್ಮಕ ಇಲಾಖೆಯ ಕಾರ್ಯದರ್ಶಿಗಳು, ಗೃಹ, ಕಾನೂನು ಹಾಗೂ ಸಂಸದೀಯ ವ್ಯವಹಾರಗಳು, ಕರ್ನಾಟಕ ಸಾಹಿತ್ಯ ಪರಿಷತ್ ಅಧ್ಯಕ್ಷರು, ಕರ್ನಾಟಕ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷರು, ಹಂಪಿಯ ಕನ್ನಡ ವಿವಿಯ ಉಪಕುಲಪತಿ, ಕನ್ನಡ ಹಾಗೂ ಸಂಸ್ಕೃತಿ ಇಲಾಖೆಯ ನಿರ್ದೇಶಕರು ಕೂಡಾ ಒಳಗೊಂಡಿರುತ್ತದೆ. ರಾಜ್ಯ ಧ್ವಜ; ಸಂವಿಧಾನ ಏನು ಹೇಳುತ್ತದೆ

 ಯಾವುದೇ ರಾಜ್ಯವು ತನ್ನದೇ ಆದ ಧ್ವಜವನ್ನು ಹೊಂದಿರುವುದನ್ನು ಭಾರತದ ಸಂವಿಧಾನವು ನಿಷೇಧಿಸುವುದಿಲ್ಲವೆಂದು ತಜ್ಞರು ಅಭಿಪ್ರಾಯವಾಗಿದೆ. ಆದಾಗ್ಯೂ ರಾಷ್ಟ್ರಧ್ವಜ ಸಂಹಿತೆಯು ಇತರ ಯಾವುದೇ ಧ್ವಜಗಳು ಭಾರತದ ತ್ರಿವರ್ಣ ಧ್ವಜಕ್ಕೆ ಅಗೌರವವನ್ನು ತೋರಿಸಬಾರದೆಂದು ಹೇಳುತ್ತದೆ. ಯಾವುದೇ ರಾಜ್ಯ ಧ್ವಜವಾದರೂ ಅದನ್ನು ರಾಷ್ಟ್ರಧ್ವಜಕ್ಕಿಂತ ಕೆಳಮಟ್ಟದಲ್ಲಿ ಹಾರಿಸಬೇಕೆಂದು ಅದು ಪ್ರತಿಪಾದಿಸುತ್ತದೆ.

 ರಾಜ್ಯಕ್ಕೆ ಪ್ರತ್ಯೇಕ ಧ್ವಜವನ್ನು ರೂಪಿಸುವ ಕರ್ನಾಟಕ ಸರಕಾರದ ಚಿಂತನೆ ಕಾರ್ಯಗತಗೊಂಡಲ್ಲಿ, ಕಾಶ್ಮೀರದ ಆನಂತರ ಕರ್ನಾಟಕವು ದೇಶದಲ್ಲಿ ಪ್ರತ್ಯೇಕ ಧ್ವಜಗಳನ್ನು ಹೊಂದಿರುವ ರಾಜ್ಯವಾಗಲಿದೆ. ಪ್ರಸ್ತುತ ಕಾಶ್ಮೀರ ಮಾತ್ರವೇ ಅಧಿಕೃತ ರಾಜ್ಯ ಧ್ವಜವನ್ನು ಹೊಂದಿದೆ.

 2012ರಲ್ಲಿ ರಾಜ್ಯದಲ್ಲಿ ಬಿಜೆಪಿ ಸರಕಾರದ ಆಡಳಿತವಿದ್ದಾಗ ಪ್ರತ್ಯೇಕ ರಾಜ್ಯ ಧ್ವಜವನ್ನು ವಿನ್ಯಾಸಗೊಳಿಸುವ ಬಗ್ಗೆ ಪ್ರಸ್ತಾವನ್ನು ಮುಂದಿಡಲಾಗಿತ್ತು. ಆಗ ಬಿಜೆಪಿ ಸರಕಾರವು ಹಳದಿ ಹಾಗೂ ಕೆಂಪು ಬಣ್ಣದ ಕನ್ನಡ ಧ್ವಜವನ್ನು ರಾಜ್ಯಧ್ವಜದ ಮಾನ್ಯತೆ ನೀಡಲು ನಿರಾಕರಿಸಿತ್ತು. ದೇಶದ ಏಕತೆ ಹಾಗೂ ಸಮಗ್ರತೆಗೆ ಪ್ರತ್ಯೇಕ ಧ್ವಜದ ಕಲ್ಪನೆ ವಿರುದ್ಧವಾದುದಾಗಿದೆಯೆಂದು ಅದು ಹೇಳಿತ್ತು.

ನಮಗೆ ರಾಜ್ಯ ಧ್ವಜದ ಅಗತ್ಯವಿದೆ. ರಾಜ್ಯ ಧ್ವಜವು ನಮ್ಮ ಸಂವೇದನೆಗಳು, ಸಂಸ್ಕೃತಿ ಹಾಗೂ ಭಾವನೆಗಳ ಸಂಕೇತವಾಗಿದೆ. ರಾಜ್ಯಕ್ಕೊಂದು ನೂತನ ಧ್ವಜವನ್ನು ವಿನ್ಯಾಸಗೊಳಿಸುವುದಾಗಲಿ ಅಥವಾ ಈಗ ಇರುವ ಧ್ವಜವನ್ನು ಅಧಿಕೃತಗೊಳಿಸುವುದಕ್ಕಾಗಲಿ ನನ್ನ ಯಾವುದೇ ಆಕ್ಷೇಪವಿಲ್ಲ’’.

ಭೀಮಪ್ಪ ಗುಂಡಪ್ಪ ಗಡಾಡ

ಕವ್ವಡ ಹೋರಾಟಗಾರ

ರಾಷ್ಟ್ರ ಧ್ವಜದ ಶ್ರೇಷ್ಠತೆಯನ್ನು ಉಲ್ಲಂಘಿಸದೆ ಯಾವುದೇ ರಾಜ್ಯವು ತನ್ನ ಧ್ವಜವನ್ನು ಹಾರಿಸಬಹುದಾಗಿದೆ.

ಶಶಿಥರೂರ್, ಕಾಂಗ್ರೆಸ್ ಸಂಸದ