‘ಅಮ್ಮೇರ್ ಪೊಲೀಸಾ’ ಚಿತ್ರಕ್ಕೆ ಕಟೀಲ್‌ನಲ್ಲಿ ಮುಹೂರ್ತ
Update: 2017-10-18 07:02 GMT
ಮಂಗಳೂರು, ಅ.18: ಎಕ್ಕಸಕ, ಪಿಲಿಬೈಲ್ ಯಮುನಕ್ಕದಂತಹ ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ ಯುವ ನಿರ್ದೇಶಕ ಸೂರಜ್ ಶೆಟ್ಟಿ ಇದೀಗ ಮತ್ತೊಂದು ಹಾಸ್ಯ ಚಿತ್ರವನ್ನು ತುಳು ಪ್ರೇಕ್ಷಕರ ಮುಂದಿಡಲು ಸಿದ್ಧರಾಗಿದ್ದಾರೆ. ಅವರ ಹೊಸ ಚಿತ್ರ ‘ಅಮ್ಮೇರ್ ಪೊಲೀಸಾ’ ಚಿತ್ರಕ್ಕೆ ಇತ್ತೀಚೆಗೆ ಕಟೀಲು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದಲ್ಲಿ ಮುಹೂರ್ತ ನೆರವೇರಿದ್ದು, ಇರಾದಲ್ಲಿ ಚಿತ್ರೀಕರಣ ಭರದಿಂದ ಸಾಗುತ್ತಿವೆ.
ಈ ಬಾರಿ ಸೂರಜ್ ಶೆಟ್ಟಿ ಸಿನೆಮಾದ ಟೈಟಲೇ ನಗೆ ಭರಿಸುವಂತಹದ್ದಾಗಿದೆ. ಹಳ್ಳಿಗಾಡಿನ ಯುವಕರು ತಂಡ ಗುಂಪು ಕಟ್ಟಿ ಮಾತನಾಡುವಾಗ ‘ಅಮ್ಮೇರ್ ಪೋಲಿಸಾ ಅಪ್ಪೇ ಟೀಚರಾ...? ಎಂಬುದಾಗಿ ಒಬ್ಬರು ಮತ್ತೊಬ್ಬರನ್ನು ಗೇಲಿ ಮಾಡುತ್ತಿದ್ದರು. ಈಗ ಸೂರಜ್ ಶೆಟ್ಟಿ ‘ಅಮ್ಮೇರ್ ಪೊಲೀಸಾ’ ಎಂಬ ಟೈಟಲ್‌ನಡಿಯಲ್ಲಿ ಸಿನೆಮಾ ಮಾಡುತ್ತಿದ್ದಾರೆ. ಇದಕ್ಕಾಗಿ ಒಂದು ಒಳ್ಳೆಯ ಹಳ್ಳಿಯ ಪರಿಸರವನ್ನು ಗುರುತಿಸಿಕೊಂಡಿದ್ದಾರೆ. ನೈಜ ಗುತ್ತಿನ ಮನೆಯಲ್ಲಿಯೇ ಶೂಟಿಂಗ್ ನಡೆಸುತ್ತಿದ್ದಾರೆ. ಇರಾ, ಮುಡಿಪು, ದೇರಳಕಟ್ಟೆ ಭಾಗದಲ್ಲಿಯೇ ‘ಅಮ್ಮೇರ್ ಪೊಲೀಸಾ’ ಚಿತ್ರಕ್ಕೆ ಚಿತ್ರಿಕರಣ ಮುಂದುವರಿದಿದೆ.
ಪತ್ರಿಕಾ ಛಾಯಾಗ್ರಾಹಕ ಅಪುಲ್ ಇರಾ ಲೋಕೇಶ್‌ನ್ ಹುಡುಕಾಟಕ್ಕೆ ಸಹಕಾರ ನೀಡಿದ್ದಾರೆ. ಒಂದು ಹಂತದ ಚಿತ್ರೀಕರಣ ಅಪೂಲ್ ಇರಾರ ಮನೆ ಯಲ್ಲಿಯೇ ಆಗಿದೆ. ಸಿನಿಮಾದಲ್ಲಿ ಯುವಕರೇ ತುಂಬಿದ್ದಾರೆ.
ಕಿಶೋರ್ ಡಿ. ಶೆಟ್ಟಿಯ ಲಕುಮಿ ಸಿನಿ ಕ್ರಿಯೇಷನ್ಸ್ ಲಾಂಛನದಲ್ಲಿ ತಯಾರಾಗುತ್ತಿರುವ ಮೂರನೇ ಸಿನಿಮಾ ಇದಾಗಿದೆ. ರಾಜೇಶ್ ಬಿ. ಶೆಟ್ಟಿ ಚಿತ್ರದ ನಿರ್ಮಾಪಕರಾಗಿದ್ದು, ಸಚಿನ್ ಎಸ್. ಶೆಟ್ಟಿ ಛಾಯಾಗ್ರಾಹಕರಾಗಿದ್ದಾರೆ. ಸಂದೀಪ್ ಆರ್. ಬಳ್ಳಾಲ್ ಸಂಗೀತ ನಿರ್ದೇಶಕರಾಗಿ ಕೆಲಸ ಮಾಡುತ್ತಿದ್ದಾರೆ.
ಮಹೇಶ್ ಎಣ್ಮೂರು ಕಲಾ ನಿರ್ದೇಶನ, ಅರ್ಜುನ್ ಲೂಯಿಸ್ ಚಿತ್ರಕ್ಕೆ ಹಾಡು ಬರೆದಿದ್ದಾರೆ. ಸತೀಶ್ ಬ್ರಹ್ಮಾವರ್ ಪ್ರೊಡಕ್ಷನ್ ಮ್ಯಾನೇಜರ್ ಆಗಿರುತ್ತಾರೆ. ಈ ಸಿನಿಮಾವನ್ನು ಸಾಧಾರಣ ಬಜೆಟ್‌ನಲ್ಲಿ ನಿರ್ಮಿಸಲಾಗುತ್ತಿದೆ. ಆದರೆ ತಾಂತ್ರಿಕತೆಯಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ. ಈ ಹಿಂದಿನ ಚಿತ್ರಗಳಂತೆಯೇ ‘ಅಮ್ಮೆರ್ ಪೊಲೀಸಾ’ ಸಿನಿಮಾ ಹಾಸ್ಯ ಮನರಂಜನೆಯನ್ನು ಪ್ರೇಕ್ಷಕರಿಗೆ ಒದಗಿಸಲಿದೆ ಎಂದು ನಿರ್ದೇಶಕ ಸೂರಜ್ ಶೆಟ್ಟಿ ತಿಳಿಸಿದ್ದಾರೆ.
ಮುಖ್ಯ ಪಾತ್ರದಲ್ಲಿ ರೂಪೇಶ್ ಶೆಟ್ಟಿ, ಪೂಜಾ ಶೆಟ್ಟಿ ಹಾಗೂ ಇನ್ನುಳಿದಂತೆ ಹಾಸ್ಯ ಪಾತ್ರದಲ್ಲಿ ಅರವಿಂದ ಬೋಳಾರ್, ಸತೀಶ್ ಬಂದಲೆ, ಕಾಪು ಲೀಲಾಧರ ಶೆಟ್ಟಿ, ಪ್ರಜ್ವಲ್‌ಪ್ರಕಾಶ್,ಸಂದೀಪ್ ಶೆಟ್ಟಿ, ಪ್ರಸನ್ನ ಶೆಟ್ಟಿ ಬೈಲೂರು, ವಿಸ್ಮಯ ನಾಯಕ, ಮೈಮ್ ರಾಮ್‌ದಾಸ್, ದೀಪಕ್ ರೈ ಪಾಣಾಜೆ, ನಿತೇಶ್‌ಶೆಟ್ಟಿ ಎಕ್ಕಾರ್‌ಇದ್ದಾರೆ.