ಡಾ. ಏರ್ಯ ಸಾಹಿತ್ಯ ಸಂಭ್ರಮ-2017ರ ಸಮಾರೋಪ ಸಮಾರಂಭ

ಬಂಟ್ವಾಳ, ಡಿ. 17: ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಯ ಸಾಹಿತ್ಯ, ಸಾಂಸ್ಕೃತಿಕ, ಸಾಮಾಜಿಕ ಕ್ಷೇತ್ರಗಳ ರಾಯಬಾರಿಯಾಗಿ ರಾಜ್ಯ, ದೇಶದ ಗಡಿದಾಟಿದ ಡಾ. ಏರ್ಯರು ಈ ಶತಮಾನ ಕಂಡಿರುವ ಓರ್ವ ಶ್ರೇಷ್ಠ ವ್ಯಕ್ತಿ ಎಂದು ನಿಟ್ಟೆ ಸ್ವಾಯತ್ತ ವಿಶ್ವವಿದ್ಯಾನಿಲಯಯ ಕುಲಾಧಿಪತಿ ಡಾ. ಎನ್. ವಿನಯ ಹೆಗ್ಡೆ ಹೇಳಿದ್ದಾರೆ.

ಡಾ. ಏರ್ಯ ಸಾಹಿತ್ಯ ಸಂಭ್ರಮ ಸ್ವಾಗತ ಸಮಿತಿ ಬಿ.ಸಿ.ರೋಡಿನ ಸ್ಪರ್ಶಾ ಕಲಾಮಂದಿರದ ಸಹಕಾರಿ ಪಿತಾಮಹ ಮೊಳಹಳ್ಳಿ ಶಿವರಾವ್ ಸಭಾಂಗಣದ ಕವಿಶಿಷ್ಯ ಪಂಜೆಮಂಗೇಶರಾವ್ ವೇದಿಕೆಯಲ್ಲಿ ನಡೆದ ಡಾ. ಏರ್ಯ ಸಾಹಿತ್ಯ ಸಂಭ್ರಮ-2017ರ ಸಮಾರೋಪ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಅವರು ಮಾತನಾಡಿದರು.

ತಾನು ಹಿರಿಯರಾದ ಏರ್ಯರಿಂದ ಸ್ಫೂರ್ತಿ ಪಡೆದು ಬೆಳೆದವನು. ಹೀಗೆ ಅನೇಕರ ಮಂದಿಯನ್ನು ಮೌಲ್ಯ ಆಧರಿತ ವ್ಯಕ್ತಿಗಳನ್ನಾಗಿ ಈ ಸಮಾಜಕ್ಕೆ ಕೊಡುಗೆಯಾಗಿ ನೀಡಿದ ಏರ್ಯರದ್ದು, ನಿಸ್ವ್ವ್ವಾರ್ಥವಾದ ಬದುಕು. ಯಾವುದೇ ಸಂದರ್ಭದಲ್ಲೂ ಪರಿಸ್ಥಿತಿಯೊಂದಿಗೆ ರಾಜಿ ಮಾಡಿಕೊಳ್ಳದೇ, ಎಲ್ಲರನ್ನೂ ಪ್ರೀತಿಸುತ್ತಾ ಮೇರು ವ್ಯಕ್ತಿ. ಅವರ ಸಾಹಿತ್ಯಕ ಸೇವೆಯನ್ನು ಉಳಿಸುವ ಕಾರ್ಯ ಮುಂದುವರಿಯಲಿ ಎಂದವರು ಹಾರೈಸಿದರು.

ಇನ್ನೋರ್ವ ಮುಖ್ಯಅತಿಥಿ ಯೆನೆಪೊಯ  ವಿಶ್ವವಿದ್ಯಾನಿಲಯದ ಕುಲಾಧಿಪತಿ ಯೆನೆಪೊಯ ಅಬ್ದುಲ್ಲಾ ಕುಂಞಿ ಮಾತನಾಡಿ, ಸ್ವಾತಂತ್ರ್ಯ ಹೋರಾಟಗಾರ ಕಾರ್ನಾಡ್ ಸದಾಶಿವ ರಾವ್ ಅವರ ದೇಶಭಕ್ತಿ, ಸಹಕಾರಿ ಪಿತಾಮಹ ಮೊಳಹಳ್ಳಿ ಶಿವರಾಯರ ಸಹಕಾರ ಚಳುವಳಿಯಿಂದ ರೂಪುಗೊಂಡು ಏರ್ಯರು, ತಮ್ಮ ಬದುಕಿನ ಉದ್ದಕ್ಕೂ ತಮ್ಮದೇಯಾದ ಜೀವನ ಮೌಲ್ಯವನ್ನು ಸಾರುತ್ತಾ, ಸಾರ್ಥಕತೆ ಕಂಡವರು ಎಂದು ತಿಳಿಸಿದರು. 

ಏರ್ಯರು ಶೈಕ್ಷಣಿಕ ಕ್ಷೇತ್ರದಲ್ಲೂ ಅಪಾರ ಸೇವೆ ಸಲ್ಲಿಸಿದವರು. ಓರ್ವ ಹಿಂದೂ ಧರ್ಮದ ಪ್ರತಿಪಾದಕನಾಗಿ ಇತರ ಧರ್ಮೀಯರನ್ನು ಗೌರವಿಸುವ ಅವರ ಗುಣ ವಿಶೇಷ ಈ ಸಮಾಜಕ್ಕೆ ಸಾಮರಸ್ಯದ ಸಂದೇಶವನ್ನು ನೀಡಲಿ ಎಂದು ಮೊಡಂಕಾಪು ಚರ್ಚ್ ಪ್ರಧಾನ ಧರ್ಮಗುರು ವಂ. ಮ್ಯಾಕ್ಸಿಂ ಎಲ್. ನೊರೊನ್ಹಾ ಶುಭ ಹಾರೈಸಿದರು.

ಸಾಂಸ್ಕೃತಿಕ, ಸಾಹಿತ್ಯ, ಧಾರ್ಮಿಕವಾಗಿ ಸಂಪನ್ನಗೊಂಡಿರುವ ಬಂಟ್ವಾಳ ಇತ್ತೀಚಿನ ದಿನಗಳಲ್ಲಿ ಮಾನವೀಯ ಸೆಳೆದಿಂದ ದೂರವಾಗುತ್ತಿದೆಯೇ ಎನ್ನುವ ಆತಂಕದಲ್ಲಿದ್ದೇವೆ. ಯುವ ಜನರಲ್ಲಿ ಸಾಮರಸ್ಯ, ಸೌಹಾರ್ದತೆ ಹಾಗೂ ಸಹಭಾಳ್ವೆಯನ್ನು ತುಂಬಿಸುವ ಕೆಲಸಕ್ಕೆ ಈ ಸಾಹಿತ್ಯ ಸಂಭ್ರಮ ಮುನ್ನುಡಿಯಾಗಲಿದೆ ಎಂದು ಹಿರಿಯ ಸಾಹಿತಿ ಡಾ. ಏರ್ಯ ಲಕ್ಷ್ಮೀ ನಾರಾಯಣ ಆಳ್ವರು ಭಾವನಾತ್ಮಕವಾಗಿ ನುಡಿದರು.

ತನ್ನ 20ನೇ ವಯಸ್ಸಿನಲ್ಲೇ ಸಮಾಜ ಪರಿವರ್ತನೆಗೆ ದೊಡ್ಡ ಹೆಜ್ಜೆ ಹಾಕಿದ ಡಾ. ಏರ್ಯ ಸವಾಲುಗಳನ್ನು ಎದುರಿಸಿ ದಲಿತೋದ್ಧಾರದ ಕುರಿತು ಪ್ರಯತ್ನಿಸಿದ್ದರು ಎಂದು ಇತಿಹಾಸಕಾರ ಡಾ. ಪುಂಡಿಕಾಯಿ ಗಣಪಯ್ಯ ಭಟ್ ಹೇಳಿದರು.

ಡಾ. ಏರ್ಯ ಸಾಹಿತ್ಯ ಸಂಭ್ರಮ-2017 ಸ್ವಾಗತ ಸಮಿತಿ ಅಧ್ಯಕ್ಷ ವಿಶ್ವನಾಥ್ ಬಂಟ್ವಾಳ ಸ್ವಾಗತಿಸಿ, ಸಂಘಟಕ ಬಿ.ತಮ್ಮಯ ವಂದಿಸಿದರು.

ಸ್ವಾಗತ ಸಮಿತಿ ಕೋಶಾಧಿಕಾರಿ, ವಿಮರ್ಶಕ ವಿ.ಸು.ಭಟ್ ಕಾರ್ಯಕ್ರಮ ನಿರೂಪಿಸಿದರು.

ಸ್ವಾಗತ ಸಮಿತಿಯ ಮುಖ್ಯಸಂಘಟಕ ಮಹಾಬಲೇಶ್ವರ ಹೆಬ್ಬಾರ್, ಸೇವಾಂಜಲಿ ಪ್ರತಿಷ್ಠಾನದ ಮುಖ್ಯಸ್ಥ ಕೆ.ಕೆ.ಪೂಂಜ, ಸ್ವಾಗತ ಸಮಿತಿಯ ಪ್ರಧಾನ ಕಾರ್ಯದರ್ಶಿ ಫಾರೂಕ್ ಬಂಟ್ವಾಳ ಕಾರ್ಯಕ್ರಮವನ್ನು ಸಂಯೋಜಿಸಿದರು.

ಡಾ. ಏರ್ಯ ಸಾಹಿತ್ಯ ಸಂಭ್ರಮ ಕಾರ್ಯಕ್ರಮದಲ್ಲಿ ನಡೆದ ವಿಚಾರಗೋಷ್ಠಿಯಲ್ಲಿ ಬದುಕು - ಬರೆಹ ಕುರಿತು ಮಾತನಾಡಿದ ಅವರು, ಸತ್ವಪರ, ನ್ಯಾಯಪರ ಬದುಕು ಕಟ್ಟುವ ದಿಸೆಯಲ್ಲಿ ಸಾಗಿದ ಏರ್ಯ, ರಾಜಕೀಯ, ಸಹಕಾರಿ ಮತ್ತು ಇತರ ರಂಗಗಳಲ್ಲಿ ಮುಂದುವರಿಯುವವರು, ನಾಯಕರಾಗುವವರಿಗೆ ಮಾದರಿ ಎಂದರು.

ಏರ್ಯರದು ಏರು ವ್ಯಕ್ತಿತ್ವ , ಅವರ ಸಾಹಿತ್ಯಕ್ಕಿಂತಲೂ ಜೀವನ ಶೈಲಿಯೇ ನಮಗೆ ಹೆಚ್ಚು ಆದರ್ಶ ಎಂದ ಅವರು ಏರ್ಯರ ಸಾಹಿತ್ಯ, ಸಹಕಾರಿ ಕ್ಷೇತ್ರದ ಯಶಸ್ಸಿನಲ್ಲಿ ಪತ್ನಿ ಆನಂದಿ ಆಳ್ವರ ಪಾತ್ರವೂ ಹಿರಿದು ಎಂದು ಅಭಿಪ್ರಾಯಪಟ್ಟರು. ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರದ ಅಧ್ಯಕ್ಷ ಪ್ರೊ.ತುಕಾರಾಂ ಪೂಜಾರಿ ವೇದಿಕೆಯಲ್ಲಿದ್ದರು. ಪತ್ರಕರ್ತ ಹರೀಶ ಮಾಂಬಾಡಿ ಕಾರ್ಯಕ್ರಮ ನಿರೂಪಿಸಿದರು.

ಕೊಡುಗೆ ಅದ್ವಿತೀಯ

ಮೊಳಹಳ್ಳಿ ಶಿವರಾಯರಂತೆ ಡಾ. ಏರ್ಯ ಅವರು ಸಹಕಾರ ಕ್ಷೇತ್ರಕ್ಕೆ ಅದ್ವಿತೀಯ ಕೊಡುಗೆ ನೀಡಿದ್ದಾರೆ ಎಂದು ಕ್ಯಾಂಪ್ಕೊ ಅಧ್ಯಕ್ಷ ಎಸ್.ಆರ್.ಸತೀಶ್ಚಂದ್ರ ಹೇಳಿದರು. ಏರ್ಯ ಅವರು ಸಹಕಾರ ಕ್ಷೇತ್ರದಲ್ಲಿ ನಡೆದ ಹಾದಿಯ ಕುರಿತು ಅವರು ಪ್ರಸ್ತಾಪಿಸಿ, ಮಾದರಿಯಾಗುವಂತ ಹೆಜ್ಜೆಯನ್ನು ಅವರು ಕ್ಷೇತ್ರದಲ್ಲಿ ಇಟ್ಟಿದ್ದಾರೆ ಎಂದರು. ಡಾ. ನಾ.ದಾಮೋದರ ಶೆಟ್ಟಿ ವೇದಿಕೆಯಲ್ಲಿದ್ದರು. ಉಪನ್ಯಾಸಕ ಸುರೇಶ್ ನಂದೊಟ್ಟು ಕಾರ್ಯಕ್ರಮ ನಿರೂಪಿಸಿದರು.

ಕ್ರಿಯಾಶಕ್ತಿಯ ಕೇಂದ್ರ

ಡಾ. ಏರ್ಯ ಕ್ರಿಯಾಶಕ್ತಿಯ ಕೇಂದ್ರ ಎಂದು ಹೇಳಿದ ಪ್ರಾಧ್ಯಾಪಕ ಡಾ. ವರದರಾಜ ಚಂದ್ರಗಿರಿ, ದೇವಸ್ಥಾನಗಳಲ್ಲಿ ದಲಿತ ವರ್ಗದ ಜನರನ್ನು ಪ್ರವೇಶಿಸುವಂತೆ ಮಾಡಿದ 70 ವರ್ಷಗಳ ಹಿಂದಿನ ಸಂಗತಿ ಈಗಲೂ ಪ್ರಸ್ತುತ. ನಾಯಕತ್ವದ ಗುಣವನ್ನು ಅವರು ಮೈಗೂಡಿಸಿಕೊಂಡಿದ್ದರು ಎಂದರು.

ಕರಾವಳಿಗೆ ಅಧ್ಯಾಪಕ ಪರಂಪರೆಯ ಗೋವಿಂದ ಪೈ, ಪಂಡಿತ ಪರಂಪರೆಯ ಪಂಜೆ ಮಂಜೇಶರಾಯರು ಪ್ರಮುಖರು. ಪಂಜೆಯವರ ಶತಮಾನೋತ್ಸವವನ್ನು ಇಡೀ ಕರ್ನಾಟಕ ಗಮನ ಸೆಳೆಯುವಂತೆ ಮಾಡಿದವರು ಡಾ. ಏರ್ಯ ಎಂದು ಅವರ ಸಂಘಟನಾ ಕ್ಷೇತ್ರದ ಕುರಿತು ಮಾತನಾಡಿದ ಡಾ. ವರದರಾಜ ಚಂದ್ರಗಿರಿ ಹೇಳಿದರು.

ವೇದಿಕೆಯಲ್ಲಿ ಕಸಾಪ ಮಾಜಿ ಅಧ್ಯಕ್ಷ ಬಿ.ತಮ್ಮಯ್ಯ ಉಪಸ್ಥಿತರಿದ್ದರು. ಡಿ.ಬಿ.ಅಬ್ದುಲ್ ರಹಿಮಾನ್ ಕಾರ್ಯಕ್ರಮ ನಿರೂಪಿಸಿದರು.