ಕೊಲ್ಲೂರಿನಲ್ಲಿ ಗಾನ ಗಂಧರ್ವನ ಹುಟ್ಟುಹಬ್ಬ, ಗಾನಸುಧೆ

ಕೊಲ್ಲೂರು, ಜ.10: ಕಳೆದ ನಾಲ್ಕು ದಶಕಗಳಿಗೂ ಅಧಿಕ ಸಮಯದಿಂದ ಸತತವಾಗಿ ಪಾಲಿಸಿಕೊಂಡು ಬಂದ ಸಂಪ್ರದಾಯದಂತೆ ದೇಶದ ಖ್ಯಾತನಾಮ ಶಾಸ್ತ್ರೀಯ ಸಂಗೀತಕಾರ, ಬಹುಭಾಷಾ ಚಲನಚಿತ್ರ ಹಿನ್ನೆಲೆ ಗಾಯಕ ಕೆ.ಜೆ. ಜೇಸುದಾಸ್ ಅವರು ಇಂದು ತಮ್ಮ 78ನೇ ಹುಟ್ಟುಹಬ್ಬವನ್ನು ಕೊಲ್ಲೂರು ಶ್ರೀಮೂಕಾಂಬಿಕಾ ದೇವಸ್ಥಾನದಲ್ಲಿ ಆಚರಿಸಿಕೊಂಡರು.

ಪತ್ನಿ ಪ್ರಭಾ ಸೇರಿದಂತೆ ಕುಟುಂಬದ ಸದಸ್ಯರೊಂದಿಗೆ ಆಗಮಿಸಿದ ಜೇಸುದಾಸ್‌ರೊಂದಿಗೆ ಸಂಗೀತಗಾರರು, ಕಲಾವಿದರ ತಂಡವೂ ಕೊಲ್ಲೂರಿಗೆ ಆಗಮಿಸಿತ್ತು. ಜೇಸುದಾಸ್ ಇಂದು ಬೆಳಗ್ಗೆ ಪತ್ನಿ ಪ್ರಭಾ ಅವರೊಂದಿಗೆ ದೇವಿಗೆ ವಿಶೇಷ ಪೂಜೆ ನೆರವೇರಿಸಿದರಲ್ಲದೇ, ದೇವಸ್ಥಾನದಲ್ಲಿ ವಿಶೇಷ ಚಂಡಿಕಾಯಾಗ ನಡೆಸಿ ತಮ್ಮ 78ನೇ ಹುಟ್ಟುಹಬ್ಬವನ್ನು ಬಂಧು ಮಿತ್ರರ ನಡುವೆ ಸರಳವಾಗಿ ಆಚರಿಸಿಕೊಂಡರು.

ಈ ಸಂದರ್ಭದಲ್ಲಿ ಮಾತನಾಡಿದ ಅವರು ಸಂಗೀತವೇ ನನ್ನ ಉಸಿರಾಗಿದ್ದು, ಕೊಲ್ಲೂರು ಮುಕಾಂಬಿಕೆಯ ಪ್ರೇರಣೆಯಿಂದ ಜೀವನದಲ್ಲಿ ಕಿಂಚಿತ್ ಸಾಧನೆ ಮಾಡಲು ಸಾದ್ಯವಾಗಿದೆ ಎಂದರು. ಜೇಸುದಾಸ್‌ರ ಶಿಷ್ಯ ಹಾಗೂ ಅಭಿಮಾನಿ ಕಾಂಞಗಾಡಿನ ರಾಮಚಂದ್ರನ್ ಅವರ ನೇತೃತ್ವದಲ್ಲಿ ಸತತ 15ನೇ ವರ್ಷದಲ್ಲಿ ದೇವಸ್ಥಾನದ ಸ್ವರ್ಣಮುಖಿ ಸಭಾಭವನದಲ್ಲಿ ಬೆಳಗಿನಿಂದ ಸಂಜೆಯವರೆಗೆ ಸಂಗೀತ ಕಚೇರಿ ನಡೆಯಿತು. ಇದರಲ್ಲಿ ಜೇಸುದಾಸ್ ಅವರು ಪಾಲ್ಗೊಂಡರು.

ಜೇಸುದಾಸ್ ದಂಪತಿಯನ್ನು ದೇವಸಾ್ಥನದ ವತಿಯಿಂದ ಸನ್ಮಾನಿಸಲಾಯಿತು.