ಕಾಸರಗೋಡು : ಲಾರಿ-ಬುಲೆಟ್ ಬೈಕ್ ಢಿಕ್ಕಿ; ಇಬ್ಬರು ಸ್ಥಳದಲ್ಲೇ ಮೃತ್ಯು

ಕಾಸರಗೋಡು, ಫೆ. 8: ಲಾರಿ ಮತ್ತು ಬುಲೆಟ್ ಬೈಕ್ ನಡುವೆ ಉಂಟಾದ ಅಪಘಾತದಲ್ಲಿ  ಇಬ್ಬರು ಸ್ಥಳದಲ್ಲೇ ಮೃತಪಟ್ಟ  ಘಟನೆ  ಗುರುವಾರ ಸಂಜೆ  ರಾಷ್ಟ್ರೀಯ ಹೆದ್ದಾರಿಯ  ಚೌಕಿ ಕಲ್ಲಂಗೈಯಲ್ಲಿ ನಡೆದಿದೆ.

ಮೃತರನ್ನು  ಮೂಲತಃ ಕುಂದಾಪುರದ ಪ್ರಸ್ತುತ ಭೀಮನಡಿಯಲ್ಲಿ ವಾಸವಾಗಿರುವ ಎಂ  ಪಿ ಲೂಕಚ್ಚನ್ ( 53) ಮತ್ತು ವಿಜಯನ್ ( 38) ಎಂದು ಗುರುತಿಸಲಾಗಿದೆ.

ಕುಂದಾಪುರದಿಂದ ಕಾಸರಗೋಡಿನ ಭೀಮನಡಿಗೆ ಮರಳುತ್ತಿದ್ದ ವೇಳೆ ಈ ಅಪಘಾತ ನಡೆದಿದೆ.  ಇಬ್ಬರು ಸ್ನೇಹಿತರಾಗಿದ್ದು,  ವಿಜಯನ್  ಭೀಮನಡಿಯಲ್ಲಿ  ಹೋಟೆಲ್ ನೌಕರನಾಗಿದ್ದರು ಎಂದು ತಿಳಿದುಬಂದಿದೆ.

ಈ ಬಗ್ಗೆ ಕಾಸರಗೋಡು ಸಂಚಾರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.