45 ಸೆಕೆಂಡುಗಳಲ್ಲಿ ಭಾಷಣ ಮುಗಿಸಬೇಕಾದ ವೇದಿಕೆಯಲ್ಲಿ 20 ನಿಮಿಷ ಚಪ್ಪಾಳೆ !

ಆಸ್ಕರ್ ಪ್ರಶಸ್ತಿ ಎಂದರೆ ಚಿತ್ರರಂಗದ ಪಾಲಿಗೆ ನೊಬೆಲ್ ಇದ್ದಂತೆ. ಅಂತಹ ಪ್ರತಿಷ್ಠಿತ ಪ್ರಶಸ್ತಿ ಪಡೆಯುವುದೆಂದರೆ ಸಿನಿಮಾ ಜಗತ್ತಿನಲ್ಲೇ ಅದ್ವಿತೀಯ ಸಾಧನೆ ಮಾಡಿದ ಗೌರವ. ಆದರೆ ಅಷ್ಟು ದೊಡ್ಡ ಸಾಧನೆ ಮಾಡಿ ಆ ವೇದಿಕೆ ಏರಿ ಪ್ರಶಸ್ತಿ ಪಡೆಯುವವರಿಗೂ ಹಲವು ನೀತಿ, ನಿಯಮಗಳಿವೆ. ಪಡೆದಿದ್ದು ಭೂಲೋಕದ ಅತಿ ಪ್ರತಿಷ್ಠಿತ ಪ್ರಶಸ್ತಿಯಾದರೂ ಆತ ಅಥವಾ ಆಕೆ 45 ಸೆಕೆಂಡುಗಳೊಳಗೆ ತನ್ನ ಭಾಷಣ ಮುಗಿಸಬೇಕು ಎಂಬ ಅಲಿಖಿತ ನಿಯಮವಿದೆ. ಅದಾದ ಮೇಲೆ  ವಿಜೇತರಿಗೆ ಭಾಷಣ ನಿಲ್ಲಿಸುವಂತೆ ಸನ್ನೆ ಮಾಡಲಾಗುತ್ತದೆ. ತೀರಾ ಮುಂದುವರಿದರೆ ಧ್ವನಿ ವರ್ಧಕವನ್ನು ಬಂದ್ ಮಾಡಲಾಗುತ್ತದೆ ಎಂದು ಹೇಳಲಾಗುತ್ತದೆ.

ಆದರೆ ಸಿನಿಮಾ ಜಗತ್ತಿನ ಮಹಾ ಕಲಾವಿದ, ಇಡೀ ಜಗತ್ತನ್ನು ನಕ್ಕು ನಲಿಸಿದ ಶ್ರೇಷ್ಠ ನಟ ಚಾರ್ಲಿ ಚಾಪ್ಲಿನ್ ಗೆ ಆಸ್ಕರ್ ಗೌರವ ಪ್ರಶಸ್ತಿ ನೀಡಿದಾಗ ಏನಾಗಿತ್ತು ಗೊತ್ತೇ ?  45 ಸೆಕೆಂಡುಗಳಲ್ಲಿ ಭಾಷಣ ಮುಗಿಸಬೇಕು ಎಂದು ನಿಯಮವಿರುವ ಆ ವೇದಿಕೆಯಲ್ಲಿ ಸುಮಾರು 20 ನಿಮಿಷ ಸಭಿಕರು ಎದ್ದು ನಿಂತು ತಟ್ಟಿದ ಚಪ್ಪಾಳೆಗೆ ಕಿವಿಯಾದರು ಮಹಾನ್ ನಟ ಚಾರ್ಲಿ ಚಾಪ್ಲಿನ್ ! ಇನ್ನೊಂದು ವರದಿಯ ಪ್ರಕಾರ ಚಪ್ಪಾಳೆಯ ಒಟ್ಟು ಸಮಯ 12 ನಿಮಿಷಗಳು. 

ಚಪ್ಪಾಳೆಯೇ ಸುಮಾರು 20 ನಿಮಿಷ ಎಂದಾದರೆ ಚಾಪ್ಲಿನ್ ಭಾಷಣ ಎಷ್ಟು ಹೊತ್ತು ಇತ್ತು ಎಂದು ಅಚ್ಚರಿ ಪಡಬೇಡಿ. ಚಾಪ್ಲಿನ್ ಮಾತ್ರ ದೀರ್ಘ ಭಾಷಣ ಮಾಡಲಿಲ್ಲ. ತಮ್ಮ ಭಾಷಣಕ್ಕೆ ಮೊದಲು, ಭಾಷಣದ ನಡುವೆ ಮತ್ತು ಭಾಷಣದ ಬಳಿಕ ಸುದೀರ್ಘ ಕರತಾಡನಕ್ಕೆ ಸಾಕ್ಷಿಯಾದ ತೀವ್ರ ಭಾವುಕರಾದ ಚಾಪ್ಲಿನ್ ಅವರು ಹೇಳಿದ್ದಿಷ್ಟೇ : 
" Oh, thank you so much. This is an emotional moment for me, and words seem so futile, so feeble. I can only say thank you for the honor of inviting me here. And you're wonderful, sweet people. Thank you."

( ಓಹ್ , ಥಾಂಕ್ಯೂ ಸೋಮಚ್ , ಇದು ನನಗೆ ಅತ್ಯಂತ ಭಾವುಕ ಕ್ಷಣ.  ಈಗ ಪದಗಳು ವ್ಯರ್ಥ ಹಾಗು ಸವಕಲಾ ದಂತೆ ಭಾಸವಾಗುತ್ತಿದೆ.  ನನ್ನನ್ನು ಇಲ್ಲಿಗೆ ಆಹ್ವಾನಿಸಿದ್ದಕ್ಕೆ ಥ್ಯಾಂಕ್ಯೂ ಎಂದಷ್ಟೇ ಹೇಳಬಲ್ಲೆ. ನೀವೆಲ್ಲ ಇಂತಹ ಅದ್ಭುತ , ಸ್ವೀಟ್ ಜನರು. ಥಾಂಕ್ಯೂ.)

ಇದು ನಡೆದಿದ್ದು 1972, ಎ. 10 ರಂದು ನಡೆದ  ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ. ಆಗಷ್ಟೇ ತಮ್ಮ 20 ವರ್ಷಗಳ ದೇಶಭ್ರಷ್ಟ ಜೀವನ ಮುಗಿಸಿ ಚಾಪ್ಲಿನ್ ಅಮೆರಿಕಕ್ಕೆ ಹಿಂದುರುಗಿದ್ದರು. 1952 ರಲ್ಲಿ  ಕಮ್ಯುನಿಸ್ಟ್ ಬೆಂಬಲಿಗ ಎಂಬ ಹಣೆಪಟ್ಟಿ ಹಚ್ಚಿ ಯುರೋಪ್ ಪ್ರವಾಸದಲ್ಲಿದ್ದ ಅವರನ್ನು ದೇಶಕ್ಕೆ ಹಿಂದಿರುಗದಂತೆ ಮಾಡಲಾಗಿತ್ತು. ಹಾಗಾಗಿ ಅವರು ಸ್ವಿಟ್ಝರ್ ಲ್ಯಾನ್ಡ್ ನಲ್ಲಿ ನೆಲೆಸಿದ್ದರು. ಕೊನೆಗೆ ಎ. 2, 1972 ರಂದು ಗೌರವ ಆಸ್ಕರ್ ಪ್ರಶಸ್ತಿ ಸ್ವೀಕರಿಸಲು ಅಮೆರಿಕಕ್ಕೆ ಬರಲು ಅವರಿಗೆ ಅನುಮತಿ ನೀಡಲಾಯಿತು.

ಅಂದ ಹಾಗೆ, 1929 ರಲ್ಲೂ ಚಾಪ್ಲಿನ್ ಗೆ ದಿ ಸರ್ಕಸ್ ಚಿತ್ರಕ್ಕಾಗಿ ಗೌರವ ಆಸ್ಕರ್ ನೀಡಲಾಗಿತ್ತು.