ಮೂಡುಬಿದಿರೆ: ವಿದ್ಯುತ್ ಶಾಕ್‌ಗೆ ಮಹಿಳೆ ಬಲಿ

ಮೂಡುಬಿದಿರೆ, ಮೇ.2: ಗುಡ್ಡೆಯಂಗಡಿ ಸಮೀಪದ ಮುರ್ಕತ್‌ಪಲ್ಕೆ ಎಂಬಲ್ಲಿ ಬಟ್ಟೆ ಒಗೆದು ವಾಷಿಂಗ್ ಮಿಷನ್ ಬಂದ್ ಮಾಡುವ ವೇಳೆ ನಡೆದ ವಿದ್ಯುತ್ ಅವಘಡಕ್ಕೆ ಮಹಿಳೆಯೊಬ್ಬರು ಬಲಿಯಾದ ಘಟನೆ ಬುಧವಾರ  ನಡೆದಿದೆ.

ಮುರ್ಕತ್‌ಪಲ್ಕೆ ನಿವಾಸಿ ಪ್ರಸಿದ್ಧ ವಾದ್ಯ ಕಲಾವಿದ ಅಣ್ಣಿ ಸುವರ್ಣರ ಪತ್ನಿ ಮಾಲತಿ (54) ಮೃತರು ಎಂದು ಗುರುತಿಸಲಾಗಿದೆ. ಇವರು  ಮನೆ ಕೆಲಸ ಮುಗಿಸಿ ಬಳಿಕ ಬಟ್ಟೆ ಒಗೆದು ವಾಷಿಂಗ್ ಮೆಷಿನ್ ಬಂದ್ ಮಾಡಲು ಮರೆತಿದ್ದರು ಎನ್ನಲಾಗಿದೆ. ಕೆಲ ಹೊತ್ತಿನ ನಂತರ ಮತ್ತೆ ಮೆಷಿನ್ ಬಂದ್ ಮಾಡಲು ತೆರಳಿದ್ದು ಈ ವೇಳೆ ಸ್ವಿಚ್ ಬೋರ್ಡ್ ತೆರೆದಿದ್ದು ಕೈ ನೇರವಾಗಿ ವಿದ್ಯುತ್ ಸ್ಪರ್ಶಿಸಿದ್ದರಿಂದ ವಿದ್ಯುತ್ ಶಾಕ್ ತಗಲಿದೆ. ಘಟನೆ ನಡೆದ ಸಂದರ್ಭ ಯಾರ ಗಮನಕ್ಕೂ ಬಂದಿರಲಿಲ್ಲ ಎನ್ನಲಾಗಿದ್ದು, ನಂತರ ಮೃತರ ಪತಿ ಮತ್ತು ಮಕ್ಕಳು  ಗಮನಿಸಿದ್ದು ಈ ವೇಳೆಗೆ ಮಾಲತಿ ಮೃತಪಟ್ಟಿದ್ದರು ಎಂದು ಅವರು ಮಾಹಿತಿ ನೀಡಿದ್ದಾರೆ. ಮೂಡುಬಿದಿರೆ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.