ಸೂಟರ್‌ಪೇಟೆ ಪರಿಸರದಲ್ಲಿ ಲೋಬೊ ಮತಯಾಚನೆ

ಮಂಗಳೂರು, ಮೇ 8: ಮಂಗಳೂರು ದಕ್ಷಿಣ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಜೆ.ಆರ್. ಲೋಬೊ ಅವರು ಮಂಗಳವಾರ ವೆಲೆನ್ಸಿಯಾ, ಸೂಟರ್‌ಪೇಟೆ ಪರಿಸರಗಳಲ್ಲಿ ಬಿರುಸಿನ ಮತಯಾಚನೆ ನಡೆಸಿದರು.

ಈ ಸಂದರ್ಭದಲ್ಲಿ ಸುದ್ಧಿಗಾರರೊಂದಿಗೆ ಮಾತನಾಡಿದ ಲೋಬೊ ಅವರು, ಮತಯಾಚನೆ ಮಾಡುವಾಗ ಪ್ರತೀ ಮನೆಗಳಲ್ಲಿ ಜನರು ನಮಗೆ ಪ್ರೋತ್ಸಾಹ ನೀಡಿ ಹುರಿದುಂಬಿಸುತ್ತಿದ್ದಾರೆ. ಈ ಪ್ರದೇಶದ ಜನರ ಆತ್ಮೀಯತೆ, ಪ್ರೀತಿ ವಾತ್ಸಲ್ಯ ನಮಗೆ ಅತೀವ ಸಂತಸವನ್ನು ನೀಡಿದೆ. ಪರಿಶಿಷ್ಟ ಪಂಗಡದವರ ಉದ್ಧಾರಕ ದಿ. ಕುದ್ಮುಲ್ ರಂಗರಾವ್ ಅವರ ಹೆಸರಿನಲ್ಲಿ ಬಾಬುಗುಡ್ಡೆಯಲ್ಲಿ ರೂ. 3.50 ಕೋಟಿ ವೆಚ್ಚದಲ್ಲಿ ಭವನ ನಿರ್ಮಾಣ ಕಾರ್ಯ ಈಗಾಗಲೇ ಪ್ರಾರಂಭವಾಗಿದೆ. ಇದು ಪೂರ್ತಿಯಾದರೆ ಈ ಕಟ್ಟಡದಲ್ಲಿ ಪರಿಶಿಷ್ಟ ಪಂಗಡಗಳ ಜನರ ಅನೇಕ ಕಲ್ಯಾಣ ಕಾರ್ಯಕ್ರಮಗಳು ಜರಗಲಿವೆ. ಮಹಾಕಾಳಿಪಡ್ಪುವಿನಲ್ಲಿ ರೂ. 2.40 ಕೋಟಿ ವೆಚ್ಚದಲ್ಲಿ ಮಹಾನಗರ ಪಾಲಿಕೆ ಪೌರ ಕಾರ್ಮಿಕರ ವಸತಿ ಗೃಹದ ನಿರ್ಮಾಣ ಕಾರ್ಯ ಈಗಾಗಲೇ ಆರಂಭವಾಗಿದೆ. ಅದಲ್ಲದೆ ಈ ಪ್ರದೇಶದಲ್ಲಿರುವ ಶ್ರೀ ಆದಿ ಶಕ್ತಿಭುವನೇಶ್ವರಿ ಸಿದ್ಧಪೀಠಕ್ಕೆ ತೆರಳಿ ದೇವರ ದರ್ಶನ ಪಡೆದು, ಅಲ್ಲಿ ಪ್ರವೀಣ್ ಬಾಬಾ ಅವರ ಆರ್ಶೀರ್ವಾದವನ್ನು ಪಡೆದಿದ್ದೇನೆ. ಖಂಡಿತವಾಗಿಯೂ, ಈ ಪ್ರದೇಶದ ಜನರು ಕಾಂಗ್ರೆಸ್ ಪಕ್ಷವನ್ನು ಬೆಂಬಲಿಸಿ, ನನ್ನನ್ನು ಮಗದೊಮ್ಮೆ ಶಾಸಕನಾಗಿ ಆಯ್ಕೆ ಮಾಡುತ್ತಾರೆ ಎಂಬ ದೃಢನಂಬಿಕೆ ಇದೆ ಎಂದರು.

ಈ ಸಂದರ್ಭದಲ್ಲಿ ಮನಪಾ ಸದಸ್ಯರಾದ ಅಪ್ಪಿ, ಜೆಸಿಂತಾ ಆಲ್ಫ್ರೇಡ್, ಆಶಾ ಡಿ.ಸಿಲ್ವ, ಬ್ಲಾಕ್ ಅಧ್ಯಕ್ಷ ಅಬ್ದುಲ್ ಸಲೀಂ, ಸದಾಶಿವ ಅಮೀನ್, ಸುರೇಶ್ ಶೆಟ್ಟಿ, ಪ್ರದೀಪ್ ಬೇಕಲ್, ಟಿ.ಕೆ. ಸುಧೀರ್, ಮೆರಿಲ್ ರೇಗೋ, ರಮಾನಂದ ಪೂಜಾರಿ, ಬಿ.ಎಂ. ಭಾರತಿ, ಡೆನ್ನಿಸ್ ಡಿ.ಸಿಲ್ವ, ಹೊನ್ನಯ್ಯ, ಹ್ಯೂಬರ್ಟ್ ಪಾಯಸ್, ವಿನಯ್ ಲೋಬೊ, ಚೇತನ್, ಎಸ್.ವಿ. ಅಮೀನ್, ವಿನಯ್ ಮಸ್ಕರೇನಸ್ ಮುಂತಾದವರು ಉಪಸ್ಥಿತರಿದ್ದರು.