ಅಪಹೃತ ಭಾರತೀಯ ಯೋಧ ಔರಂಗಜೇಬ್ ಮೃತದೇಹ ಪತ್ತೆ

ರಜೌರಿ, ಜೂ.15: ಅಪಹೃತ ಭಾರತೀಯ ಯೋಧ ಔರಂಗಜೇಬ್‌ನ ಮೃತದೇಹವು ಗುರುವಾರ ಸಂಜೆ ಪುಲ್ವಾಮಾದ ಗುಸೂ ಪ್ರದೇಶದಲ್ಲಿ ರಕ್ತದಮಡುವಿನಲ್ಲಿ ಪತ್ತೆಯಾಗಿದೆ. ರಜೌರಿ ನಿವಾಸಿಯಾಗಿದ್ದ ಔರಂಗಜೇಬ್ ಈದ್ ಹಬ್ಬದ ಪ್ರಯುಕ್ತ ರಜೆಯಲ್ಲಿ ಮನೆಗೆ ತೆರಳುತ್ತಿದ್ದ ವೇಳೆ ಮಾರ್ಗಮಧ್ಯೆ ಪುಲ್ವಾಮಾದ ಕಲಂಪೋರಾದಲ್ಲಿ ಉಗ್ರರರು ಅವರನ್ನು ಅಪಹರಿಸಿದ್ದರು. 4 ಜಮ್ಮು ಮತ್ತು ಕಾಶ್ಮೀರ ಲೈಟ್ ಇನ್ಫಾಂಟ್ರಿಗೆ ಸೇರಿದ್ದ ಔರಂಗಜೇಬ್ ಶೋಪಿಯಾನ್‌ನ ಶಾದಿಮಾರ್ಗ್‌ನ 44 ರಾಷ್ಟ್ರೀಯ ರೈಫಲ್ಸ್‌ನ ಶಿಬಿರದಲ್ಲಿ ನಿಯುಕ್ತಿಗೊಂಡಿದ್ದರು. ಗುರುವಾರ ಬೆಳಿಗ್ಗೆ 9 ಗಟೆಯ ಸುಮಾರಿಗೆ ಸೇನಾ ವಿಭಾಗದ ಅಧಿಕಾರಿಯೊಬ್ಬರು ಕಾರೊಂದನ್ನು ತಡೆದು ಔರಂಗಜೇಬ್‌ರನ್ನು ಶೋಪಿಯಾನ್‌ಗೆ ಬಿಡುವಂತೆ ಮನವಿ ಮಾಡಿದ್ದರು. ಅದರಂತೆ ಔರಂಗಜೇಬ್ ಕಾರಿನಲ್ಲಿ ತೆರಳುತ್ತಿದ್ದಾಗ ಅವರನ್ನು ತಡೆದ ಉಗ್ರರು ಯೋಧನನ್ನು ಅಪಹರಿಸಿದ್ದರು. ಔರಂಗಜೇಬ್ ಉಗ್ರ ಸಮೀರ್ ಟೈಗರ್ ಹತ್ಯಾ ಕಾರ್ಯಾಚರಣೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.