ಎಂಟು ಲಾರಿಗಳ ಬ್ಯಾಟರಿ ಕಳವು: ದೂರು

ಮಂಗಳೂರು, ಜು.3: ಮನೆಯ ಪಕ್ಕದಲ್ಲಿ ನಿಲ್ಲಿಸಿದ್ದ ಎಂಟು ಸರಕು ಲಾರಿಗಳ ಬ್ಯಾಟರಿಗಳು ಕಳವಾದ ಘಟನೆ ವಾಮಂಜೂರಿನಲ್ಲಿ ಮಂಗಳವಾರ ಬೆಳಗ್ಗೆ ನಡೆದಿದೆ.

ವಾಮಂಜೂರು ನಿವಾಸಿ ಐತಪ್ಪ ಪೂಜಾರಿ ಎಂಬರಿಗೆ ಸೇರಿದ ಲಾರಿಗಳ ಬ್ಯಾಟರಿಗಳು ಕಳವಾಗಿದ್ದು, ಕಳವಾದ ಬ್ಯಾಟರಿಗಳ ಮೌಲ್ಯ 40ಸಾವಿರ ರೂ.ಎಂದು ಅಂದಾಜಿಸಲಾಗಿದೆ.

ವಾಮಂಜೂರು ನಿವಾಸಿ ಐತಪ್ಪಪೂಜಾರಿ ಮತ್ತು ಅವರ ಮಕ್ಕಳ ಮಾಲಕತ್ವದಲ್ಲಿ ಎಂಟು ಸರಕು ಲಾರಿಗಳಿದ್ದು, ಎಂದಿನಂತೆ ಜು.2 (ಸೋಮವಾರ)ರಂದು ಸಂಜೆ 6ಕ್ಕೆ ಲಾರಿಗಳನ್ನು ಮನೆಯ ಪಕ್ಕದಲ್ಲಿನ ಖಾಲಿ ಜಾಗದಲ್ಲಿ ನಿಲ್ಲಿಸಲಾಗಿತ್ತು. ಮರುದಿನ ಬೆಳಗ್ಗೆ ನೋಡಿದಾಗ 8 ಸರಕು ಲಾರಿಗಳ ಬ್ಯಾಟರಿಗಳು ಕಳವಾಗಿರುವುದು ಬೆಳಕಿಗೆ ಬಂದಿದೆ.

ಈ ಕುರಿತು ಮಂಗಳೂರು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.