ಅಮೆರಿಕನ್ನರು ಟ್ರಂಪ್‌ರನ್ನು ನಂಬುತ್ತಿಲ್ಲ: ಭಾರತೀಯ-ಅಮೆರಿಕನ್ ಕಾಂಗ್ರೆಸ್ ಸದಸ್ಯೆ ಪ್ರಮೀಳಾ ಜಯಪಾಲ್

ವಾಶಿಂಗ್ಟನ್ ಸೆ. 17: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ರ ಅಧ್ಯಕ್ಷೀಯ ಪ್ರಚಾರ ತಂಡದಲ್ಲಿ ಏನು ನಡೆಯುತ್ತಿತ್ತು ಎಂಬ ವಿಷಯ ಅವರಿಗೆ ಗೊತ್ತಿರಲಿಲ್ಲ ಎನ್ನುವುದನ್ನು ಜನರು ನಂಬುತ್ತಿಲ್ಲ ಎಂದು ಭಾರತೀಯ-ಅಮೆರಿಕನ್ ಕಾಂಗ್ರೆಸ್ ಸದಸ್ಯೆ ಪ್ರಮೀಳಾ ಜಯಪಾಲ್ ರವಿವಾರ ಹೇಳಿದ್ದಾರೆ.

2016ರ ಚುನಾವಣಾ ಪ್ರಚಾರ ಅವಧಿಯಲ್ಲಿ ನಾನು ರಶ್ಯದೊಂದಿಗೆ ಸಂಪರ್ಕದಲ್ಲಿದ್ದುದು ನಿಜ ಎಂಬುದನ್ನು ಟ್ರಂಪ್ ಪ್ರಚಾರ ತಂಡದ ಮಾಜಿ ಮುಖ್ಯಸ್ಥ ಪೌಲ್ ಮನಫೋಟ್ ಒಪ್ಪಿಕೊಂಡ ದಿನಗಳ ಬಳಿಕ ಪ್ರಮೀಳಾ ಈ ಹೇಳಿಕೆ ನೀಡಿದ್ದಾರೆ.

2016ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ರಶ್ಯ ಹಸ್ತಕ್ಷೇಪ ನಡೆಸಿತ್ತು ಎಂಬ ಆರೋಪಗಳ ಬಗ್ಗೆ ತನಿಖೆ ನಡೆಸುತ್ತಿರುವ ವಿಶೇಷ ವಕೀಲ ರಾಬರ್ಟ್ ಮುಲ್ಲರ್ ಜೊತೆ ಸಹಕರಿಸಲೂ ಮನಫೋರ್ಟ್ ಒಪ್ಪಿಕೊಂಡಿದ್ದಾರೆ.

ಪ್ರಮೀಳಾ ಜಯಪಾಲ್, ಅಮೆರಿಕದ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ಗೆ ಆಯ್ಕೆಯಾದ ಮೊದಲ ಭಾರತೀಯ-ಅಮೆರಿಕನ್ ಮಹಿಳೆಯಾಗಿದ್ದಾರೆ.

‘‘ಇಲ್ಲಿ ಯಾರೋ ನಗಣ್ಯ ವ್ಯಕ್ತಿಗಳು ತಪ್ಪೊಪ್ಪಿಕೊಂಡಿರುವುದಲ್ಲ. ಟ್ರಂಪ್‌ರ ಉನ್ನತ ಸಲಹಾಕಾರರು, ಪ್ರಚಾರ ತಂಡವನ್ನು ನಡೆಸಿದವರು, ತಂಡದ ಮ್ಯಾನೇಜರ್, ಉಪ ಮ್ಯಾನೇಜರ್, ಅಧ್ಯಕ್ಷರ ಖಾಸಗಿ ವಕೀಲರು ಸೇರಿದಂತೆ ಅತಿ ಮುಖ್ಯ ವ್ಯಕ್ತಿಗಳು ತಪ್ಪೊಪ್ಪಿಕೊಂಡಿರುವುದನ್ನು ನಾವು ನೋಡಿದ್ದೇವೆ’’ ಎಂದು ಅವರು ನುಡಿದರು.