ಕೇರಳ: ಎರಡು ಎಟಿಎಮ್‌ಗಳಿಂದ 35 ಲ.ರೂ.ದೋಚಿದ ಕಳ್ಳರು
Update: 2018-10-12 13:06 GMT
ಕೊಚ್ಚಿ/ತ್ರಿಶೂರು,ಅ.12: ಶುಕ್ರವಾರ ಬೆಳಗಿನ ಜಾವ ತ್ರಿಶೂರು ಮತ್ತು ಎರ್ನಾಕುಳಂ ಜಿಲ್ಲೆಗಳಲ್ಲಿಯ ಎರಡು ಎಟಿಎಂ ಯಂತ್ರಗಳನ್ನು ಒಡೆದ ಕಳ್ಳರು 35 ಲ.ರೂ.ಗಳನ್ನು ದೋಚಿದ್ದಾರೆ. ಇವೆರಡೂ ಕಳ್ಳತನಗಳಲ್ಲಿ ಒಂದೇ ತಂಡದ ಕೈವಾಡವನ್ನು ಪೊಲೀಸರು ಶಂಕಿಸಿದ್ದಾರೆ.
ಮೊದಲ ಘಟನೆ ಎರ್ನಾಕುಳಂ ಜಿಲ್ಲೆಯ ತ್ರಿಪುನ್ನಿತ್ತುರದ ಇರುಂಬನಂ ಎಂಬಲ್ಲಿ ನಸುಕಿನ 3:30ರ ಸುಮಾರಿಗೆ ನಡೆದಿದೆ. ಗ್ಯಾಸ್ ಕಟರ್ ಬಳಸಿ ರಾಷ್ಟ್ರೀಕೃತ ಬ್ಯಾಂಕೊಂದರ ಎಟಿಎಂ ಯಂತ್ರವನ್ನು ತೆರೆದ ಕಳ್ಳರು 25 ಲ.ರೂ.ಗಳನ್ನು ಎಗರಿಸಿದ್ದಾರೆ. ನಂತರ 4:30ರ ಸುಮಾರಿಗೆ ತ್ರಿಶೂರು ಜಿಲ್ಲೆಯ ಕೊರಟ್ಟಿಯಲ್ಲಿ ಖಾಸಗಿ ಬ್ಯಾಂಕೊಂದರ ಎಟಿಎಂ ಯಂತ್ರವನ್ನು ಇದೇ ರೀತಿ ತೆರೆದು 10 ಲ.ರೂ.ಗಳನ್ನು ದೋಚಿ ಶಟರ್ ಎಳೆದು ಪರಾರಿಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದರು.
ಕೃತ್ಯವನ್ನು ಎಸಗುವ ಮುನ್ನ ಕಳ್ಳರು ಸಿಸಿಟಿವಿ ಕ್ಯಾಮೆರಾಕ್ಕೆ ಬಣ್ಣ ಸಿಂಪಡಿಸಿದ್ದು ದಾಖಲಾಗಿದೆ.