ಎರಡನೇ ಏಕದಿನ: ವಿಂಡೀಸ್ ವಿರುದ್ಧ ಭಾರತ 321/6

ವಿಶಾಖಪಟ್ಟಣ, ಅ.24: ನಾಯಕ ವಿರಾಟ್ ಕೊಹ್ಲಿ ಅವರ 37ನೇ ಶತಕ(ಔಟಾಗದೆ 157) ಹಾಗೂ ಅಂಬಟಿ ರಾಯುಡು ಅರ್ಧಶತಕ(73)ಕೊಡುಗೆ ನೆರವಿನಿಂದ ವಿಂಡೀಸ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ ಭಾರತ ನಿಗದಿತ 50 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 321 ರನ್ ಗಳಿಸಿದೆ.

ಬುಧವಾರ ಇಲ್ಲಿ ಟಾಸ್ ಜಯಿಸಿದ ಭಾರತ ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು. 9ನೇ ಓವರ್‌ನಲ್ಲಿ 40 ರನ್‌ಗೆ ಎರಡು ವಿಕೆಟ್ ಕಳೆದುಕೊಂಡ ಭಾರತ ಕಳಪೆ ಆರಂಭ ಪಡೆಯಿತು. ರೋಹಿತ್ ಶರ್ಮಾ 4 ರನ್‌ಗೆ ಔಟಾದರೆ, ಶಿಖರ್ ಧವನ್(29)ಮತ್ತೊಮ್ಮೆ ವಿಫಲರಾದರು.

ಆಗ ಜೊತೆಯಾದ ಕೊಹ್ಲಿ(ಔಟಾಗದೆ 157,129 ಎಸೆತ, 13 ಬೌಂಡರಿ, 4 ಸಿಕ್ಸರ್)ಹಾಗೂ ರಾಯುಡು(73,80 ಎಸೆತ, 8 ಬೌಂಡರಿ)3ನೇ ವಿಕೆಟ್‌ಗೆ 139 ರನ್ ಜೊತೆಯಾಟ ನಡೆಸಿ ತಂಡಕ್ಕೆ ಆಸರೆಯಾದರು.

ರಾಯುಡು ಔಟಾದ ಬಳಿಕ ಕ್ರೀಸ್‌ಗೆ ಇಳಿದ ಮಾಜಿ ನಾಯಕ ಎಂಎಸ್ ಧೋನಿ(20) ಅವರೊಂದಿಗೆ 4 ನೇ ವಿಕೆಟ್‌ಗೆ 43 ರನ್ ಹಾಗೂ ರವೀಂದ್ರ ಜಡೇಜರೊಂದಿಗೆ 6ನೇ ವಿಕೆಟ್‌ಗೆ 59 ರನ್ ಜೊತೆಯಾಟ ನಡೆಸಿದ ಕೊಹ್ಲಿ ತಂಡದ ಮೊತ್ತವನ್ನು 321ಕ್ಕೆ ತಲುಪಿಸಿದರು.

ಯುವ ದಾಂಡಿಗ ರಿಷಭ್ ಪಂತ್(17)ಬೇಗನೇ ಔಟಾದರು. 5ನೇ ಬಾರಿ 150ಕ್ಕೂ ಅಧಿಕ ರನ್ ಗಳಿಸಿದ ಕೊಹ್ಲಿ ವಿಂಡೀಸ್ ಬೌಲರ್‌ಗಳನ್ನು ಚೆನ್ನಾಗಿ ದಂಡಿಸಿದರು.

ವಿಂಡೀಸ್‌ನ ಪರ ನರ್ಸ್(2-48) ಹಾಗೂ ಮೆಕ್‌ಕಾಯ್(2-71) ತಲಾ ಎರಡು ವಿಕೆಟ್ ಪಡೆದರು.