ಡಿ.1: ಏಡ್ಸ್ ತಡೆಗೆ ಜನಜಾಗೃತಿ ಜಾಥಾ

14 ವರ್ಷ ಪ್ರಾಯದೊಳಗಿನ ನಾಲ್ವರಿಗೆ ತಗುಲಿದ ಸೋಂಕು

ಮಂಗಳೂರು, ನ.30: ದ.ಕ.ಜಿಲ್ಲೆಯಲ್ಲಿ ಕಳೆದ 10 ತಿಂಗಳಲ್ಲಿ 10 ಗರ್ಭಿಣಿಯರ ಸಹಿತ 472 ಎಚ್‌ಐವಿ ಸೋಂಕಿತರ ಪತ್ತೆಯಾಗಿದೆ ಎಂದು ದ.ಕ.ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಅಧಿಕಾರಿ ಡಾ. ರಾಮಕೃಷ್ಣ ರಾವ್ ಮಾಹಿತಿ ನೀಡಿದ್ದಾರೆ.

ಜಿಲ್ಲಾ ಆರೋಗ್ಯ ಇಲಾಖೆಯ ಕಚೇರಿಯಲ್ಲಿ ಶುಕ್ರವಾರ ಸುದ್ದಿಗೋಷ್ಠಿ ನಡೆಸಿದ ಅವರು ಏಡ್ಸ್ ತಡೆಗೆ ಜಿಲ್ಲಾದ್ಯಂತ ವ್ಯಾಪಕ ಕ್ರಮ ಕೈಗೊಳ್ಳಲಾಗಿದೆ. ಸರಕಾರದ ವಿವಿಧ ಸೌಲಭ್ಯಗಳನ್ನು ಏಡ್ಸ್ ಸೋಂಕಿತರಿಗೆ ತಲುಪಿಸುವ ಕಾರ್ಯ ಮಾಡಲಾಗಿದೆ. ಮಾಹಿತಿ ಶಿಕ್ಷಣ ಕಾರ್ಯಕ್ರಮದಡಿ ಡಿ.1ರಿಂದ ಜಿಲ್ಲಾದ್ಯಂತ ಜಾನಪದ ಕಲಾ ತಂಡದ ಮೂಲಕ ಡಮಾಮಿ ನೃತ್ಯ ಪ್ರದರ್ಶಿಸಿ ಏಡ್ಸ್ ತಡೆಗೆ ಜಾಗೃತಿ ಮೂಡಿಸಲಾಗುತ್ತದೆ ಎಂದರು.

ಸದ್ಯ ಪ್ರಪಂಚದಲ್ಲಿ 36.9 ಮಿಲಿಯನ್, ಭಾರತದಲ್ಲಿ 2.10 ಮಿಲಿಯನ್, ಕರ್ನಾಟಕದಲ್ಲಿ 3.30 ಲಕ್ಷ ಹಾಗೂ ದ.ಕ.ಜಿಲ್ಲೆಯಲ್ಲಿ 2007ರ ಜನವರಿಯಿಂದ 2018ರ ಅಕ್ಟೋಬರ್‌ವರೆಗೆ 10,239 ಏಡ್ಸ್ ಸೋಂಕಿತರಿದ್ದಾರೆ. ಜಿಲ್ಲೆಯ 10,239 ಸೋಂಕಿತರ ಪೈಕಿ 397 ಗರ್ಭಿಣಿಯರೂ ಸೇರಿದ್ದಾರೆ. ಈ ವರ್ಷದ ಜನವರಿಯಿಂದ ಅಕ್ಟೋಬರ್‌ವರೆಗೆ 472 ಏಡ್ಸ್ ಸೋಂಕಿತರು ಪತ್ತೆಯಾಗಿದ್ದಾರೆ. ಅದರಲ್ಲಿ 10 ಗರ್ಭಿಣಿಯರೂ ಇದ್ದಾರೆ. ಉಳಿದಂತೆ 462 ಮಂದಿಯಲ್ಲಿ 290 ಪುರುಷ ಮತ್ತು 172 ಮಹಿಳೆಯರಿಗೆ ಸೋಂಕು ತಗಲಿದೆ. ಇವರಲ್ಲಿ 4 ಮಂದಿ 14 ವರ್ಷ ಪ್ರಾಯದ ಕೆಳಗಿನವರಿರುವುದು ಗಮನಾರ್ಹ ಎಂದರು.

2006ರಿಂದ 2018ರ ಅಕ್ಟೋಬರ್‌ವರೆಗೆ ಏಆರ್‌ಟಿ ಕೇಂದ್ರದಲ್ಲಿ ನೋಂದಣಿಯಾದ 8033 ಸೋಂಕಿತರ ಪೈಕಿ 4051 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅದರಲ್ಲಿ 1999 ಪುರುಷರು ಮತ್ತು 1716 ಮಹಿಳೆಯರಲ್ಲದೆ 15 ವರ್ಷ ಪ್ರಾಯದೊಳಗಿನ 336 ಮಂದಿಯೂ ಸೇರಿದ್ದಾರೆ.ಏಡ್ಸ್ ಜಗತ್ತಿನ ಪ್ರಮುಖ ರೋಗಗಳಲ್ಲಿ ಒಂದಾಗಿ ಪರಿಗಣಿಸಲ್ಪಟ್ಟಿವೆ. ಇದು ಸಮಾಜದ ಆರೋಗ್ಯ ಮತ್ತು ಅಭಿವೃದ್ಧಿಗೂ ತೊಡಕಾಗಿವೆ. ಜನಸಾಮಾನ್ಯರ ಮಧ್ಯೆ ಏಡ್ಸ್ ಸೋಂಕಿತರ ಬಗ್ಗೆ ಇರುವ ತಪ್ಪುಕಲ್ಪನೆಯನ್ನು ದೂರ ಮಾಡುವ ಲುವಾಗಿ ‘ನಿಮ್ಮ ಎಚ್‌ಐವಿ ಸ್ಥಿತಿಯನ್ನು ತಿಳಿಯಿರಿ’ ಎಂಬ ಧ್ಯೇಯ ವಾಕ್ಯದಡಿ ಈ ಬಾರಿಯ ವಿಶ್ವ ಏಡ್ಸ್ ದಿನ ಆಚರಿಸಲಾಗುತ್ತದೆ. ಅದಕ್ಕಾಗಿ ಐಸಿಟಿಸಿಗಳಲ್ಲಿ ಎಚ್‌ಐವಿ ಬಗ್ಗೆ ಆಪ್ತ ಸಮಾಲೋಚನೆ ಮತ್ತು ಪರೀಕ್ಷೆ ನಡೆಸುವುದು, ತಾಯಿಯಿಂದ ಮಗುವಿಗೆ ಸೋಂಕು ಹರಡುವುದನ್ನು ತಡೆಗಟ್ಟಲು ಎಲ್ಲಾ ಗರ್ಭಿಣಿಯರನ್ನು ಪರೀಕ್ಷೆಗೊಳಪಡಿಸಲಾಗುತ್ತದೆ. ಸೋಂಕಿತರು ಇದ್ದಲ್ಲಿ ಏಆರ್‌ಟಿ ಚಿಕಿತ್ಸೆ ಮತ್ತು ಹೆರಿಗೆಯ ಬಳಿಕ ಮಗುವಿಗೆ ಎಚ್‌ಐವಿ ಸೋಂಕು ಹರಡದಂತೆ 6 ವಾರಗಳ ಕಾಲ ನೆವಿರ್‌ಪಿನ್ ದ್ರಾವಣದೊಂದಿಗೆ 2 ವರ್ಷದವರೆಗೆ ನಿಯಮಿತ ಚಿಕಿತ್ಸೆ ನೀಡಲಾಗುತ್ತದೆ. ಅಲ್ಲದೆ ಆಪ್ತ ಸಮಾಲೋಚಕರ ಮೂಲಕ ಏಆರ್‌ಟಿ ಚಿಕಿತ್ಸೆಯನ್ನೂ ನೀಡಲಾಗುತ್ತದೆ ಎಂದು ಡಾ. ರಾಮಕೃಷ್ಣ ರಾವ್ ನುಡಿದರು.

ಈಗಾಗಲೆ ಹದಿಹರೆಯ ಮತ್ತು ಯುವಜನರಲ್ಲಿ ಎಚ್‌ಐವಿ ಏಡ್ಸ್ ಬಗ್ಗೆ ಜಾಗೃತಿ ಮೂಡಿಸುವ ಸಲುವಾಗಿ ಜಿಲ್ಲೆಯ 93 ಪದವಿ ಕಾಲೇಜುಗಳಲ್ಲಿ ರೆಡ್ ರಿಬ್ಬನ್ ಕ್ಲಬ್‌ಗಳನ್ನು ಸ್ಥಾಪಿಸಲಾಗಿದೆ. ಅಲ್ಲದೆ ಜಿಲ್ಲೆಯ 200 ಪ್ರೌಢಶಾಲೆ ಮತ್ತು 32 ಪದವಿಪೂರ್ವ ಕಾಲೇಜಿನಲ್ಲಿ ಹದಿಹರೆಯದ ಶಿಕ್ಷಣ ಕಾರ್ಯಕ್ರಮ ನಡೆಸಲಾಗಿದೆ ಎಂದರು.

ಡಿ.1: ಜಿಲ್ಲಾ ಮಟ್ಟದ ಏಡ್ಸ್ ದಿನಾಚರಣೆ

ಏಡ್ಸ್ ತಡೆಗಾಗಿ ಡಿ.1ರಂದು ಬೆಳಗ್ಗೆ 10ಕ್ಕೆ ನಗರ ಹೊರವಲಯದ ಕುಡುಪುವಿನ ತೇಜಸ್ವಿನಿ ಕಾಲೇಜು ಆಫ್ ನರ್ಸಿಂಗ್‌ನ ಸಮೀಕ್ಷಾ ಸಭಾಂಗಣದಲ್ಲಿ ಜಿಲ್ಲಾ ಮಟ್ಟದ ವಿಶ್ವ ಏಡ್ಸ್ ದಿನಾಚರಣೆ ಮತ್ತು ಜನಜಾಗೃತಿ ಜಾಥಾ ಕಾರ್ಯಕ್ರಮ ಜರುಗಲಿದೆ. ದ.ಕ.ಜಿಪಂ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೋಡು ಕಾರ್ಯಕ್ರಮಕ್ಕೆ ಚಾಲನೆ ನೀಡಲಿದ್ದು, ತೇಜಸ್ವಿನಿ ಸಮೂಹ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಡಾ. ಶಾಂತಾರಾಮ ಶೆಟ್ಟಿ ಅಧ್ಯಕ್ಷತೆ ವಹಿಸಲಿದ್ದಾರೆ.