1 ಲಕ್ಷ ರೂ.ಗೆ ಮಗಳನ್ನೇ ಮಾರಾಟ ಮಾಡಿದ ತಾಯಿ!

 ಹೊಸದಿಲ್ಲಿ, ಸೆ.16: ಕಳೆದ ವಾರ ದಿಲ್ಲಿಯಲ್ಲಿ ವ್ಯಾಪಾರಿಯೊಬ್ಬನಿಗೆ ಒಂದು ಲಕ್ಷ ರೂ.ಗೆ ತಾಯಿಯಿಂದಲೇ ಮಾರಲ್ಪಟ್ಟಿದ್ದ 15ರ ಹರೆಯದ ಬಾಲಕಿಯನ್ನು ದಿಲ್ಲಿ ಮಹಿಳಾ ಆಯೋಗ ರಕ್ಷಿಸಿದೆ.
ತನ್ನ ತಾಯಿ ಕಳೆದ ತಿಂಗಳು ನನ್ನ ಒಂದು ವರ್ಷದ ತಮ್ಮನನ್ನು ಮಾರಾಟ ಮಾಡಿದ್ದಾಳೆ ಎಂದು ಬಾಲಕಿ ಆರೋಪಿಸಿದ್ದಾಳೆ.
ಕಳೆದ ವಾರ ಬದಾರ್ಪುರದಲ್ಲಿರುವ ತನ್ನ ಸಂಬಂಧಿಯ ಮನೆಗೆ ಹೋಗುವುದಾಗಿ ತನ್ನ ಮಗಳನ್ನು ಕರೆದೊಯ್ದಿದ್ದ ದಿಲ್ಲಿಯ ಮಹಿಳೆ ಬದಾರ್ಪುರದ ಬದಲಿಗೆ ನಿಝಾಮುದ್ದೀನ್‌ನ ಹೊಟೇಲ್‌ಗೆ ಕರೆದೊಯ್ದಿದ್ದಳು. ನನಗೆ ಬೇರೆಡೆ ಹೋಗುವುದಕ್ಕಿದೆ. ನಿನ್ನನ್ನು ವ್ಯಕ್ತಿಯೊಬ್ಬ ನಿನ್ನ ಮನೆಗೆ ಕರೆದೊಯ್ಯತ್ತಾನೆ ಎಂದು ದಿಲ್ಲಿ ಮಹಿಳೆ ತನ್ನ ಮಗಳಿಗೆ ತಿಳಿಸಿ ಸ್ಥಳದಿಂದ ಕಾಲ್ಕಿತ್ತಿದ್ದಳು. ಆ ವ್ಯಕ್ತಿ ಬಾಲಕಿಯನ್ನು ಆಕೆಯ ಮನೆಗೆ ಕರೆದೊಯ್ಯುವ ತನ್ನ ಮನೆಗೆ ಕರೆದೊಯ್ದಿದ್ದ. ಅಲ್ಲಿದ್ದ ಕೆಲವು ಮಹಿಳೆಯರು ಬಾಲಕಿಗೆ ಮದುವೆ ಉಡುಪು ಧರಿಸುವಂತೆ ಹೇಳಿದ್ದರು. ನಿನ್ನನ್ನು ನಿನ್ನ ತಾಯಿ 1 ಲಕ್ಷ ರೂ.ಗೆ ಮಾರಾಟ ಮಾಡಿದ್ದಾಗಿಯೂ ತಿಳಿಸಿದರು. ವಿಷಯ ತಿಳಿದು ಗಾಬರಿಗೊಂಡ ಬಾಲಕಿ ಆ ವ್ಯಕ್ತಿಯಿಂದ ತಪ್ಪಿಕೊಂಡು ಹೊರ ಬಂದಿದ್ದಾಳೆ. ಬವಾನಕ್ಕೆ ತೆರಳಿದ ಬಾಲಕಿ ಸಹಾಯಕ್ಕಾಗಿ ನೆರೆ ಮನೆಯವರ ಮೊರೆ ಹೋಗಿದ್ದು, ಅವರು ದಿಲ್ಲಿಯ ಮಹಿಳಾ ಆಯೋಗಕ್ಕೆ ವಿಷಯ ತಿಳಿಸಿದ್ದು, ಅವರು ಬಾಲಕಿಯನ್ನು ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದರು.
 ಬಾಲಕಿ ತನ್ನ ತಾಯಿ, ಮಲ ತಂದೆ ಹಾಗೂ ನಾಲ್ವರು ಒಡಹುಟ್ಟಿದವರೊಂದಿಗೆ ವಾಸಿಸುತ್ತಿದ್ದಳು. ತನ್ನ ತಾಯಿ ಸಾಲದಲ್ಲಿ ಮುಳುಗಿದ್ದು, ಹೀಗಾಗಿ ತಮ್ಮನ್ನು ಮಾರಾಟ ಮಾಡಿದ್ದಾಗಿ ಪೊಲೀಸರಿಗೆ ಬಾಲಕಿ ತಿಳಿಸಿದ್ದಾಳೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಈತನಕ ಯಾರನ್ನೂ ಬಂಧಿಸಿಲ್ಲ. ಬಾಲಕಿಯನ್ನು ಆಶ್ರಯಧಾಮಕ್ಕೆ ಕಳುಹಿಸಿಕೊಟ್ಟಿದ್ದಾರೆ.