ಕ್ಷಿಪಣಿ ದಾಳಿ ಎಚ್ಚರಿಕೆ ವ್ಯವಸ್ಥೆ ನಿರ್ಮಿಸಲು ಚೀನಾಕ್ಕೆ ನೆರವು: ರಶ್ಯ
Update: 2019-10-04 17:36 GMT
ಮಾಸ್ಕೊ, ಅ. 4: ಕ್ಷಿಪಣಿ ದಾಳಿ ಎಚ್ಚರಿಕೆ ವ್ಯವಸ್ಥೆಯೊಂದನ್ನು ನಿರ್ಮಿಸಲು ರಶ್ಯವು ಚೀನಾಕ್ಕೆ ನೆರವು ನೀಡಲಿದೆ ಎಂದು ರಶ್ಯ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಗುರುವಾರ ಹೇಳಿದರು. ಈ ವ್ಯವಸ್ಥೆಯನ್ನು ಸದ್ಯ ರಶ್ಯ ಮತ್ತು ಅಮೆರಿಕಗಳು ಮಾತ್ರ ಹೊಂದಿವೆ.
‘‘ಇದೊಂದು ಮಹತ್ವದ ವಿಷಯವಾಗಿದೆ. ಇದು ಪೀಪಲ್ಸ್ ರಿಪಬ್ಲಿಕ್ ಆಫ್ ಚೀನಾದ ರಕ್ಷಣಾ ಸಾಮರ್ಥ್ಯಗಳನ್ನು ಗಣನೀಯವಾಗಿ ಹೆಚ್ಚಿಸಲಿದೆ’’ ಎಂದು ರಶ್ಯದ ರಿಸಾರ್ಟ್ ಪಟ್ಟಣ ಸೋಚಿಯಲ್ಲಿ ನಡೆದ ಅಂತರ್ರಾಷ್ಟ್ರೀಯ ರಾಜಕೀಯ ಸಮ್ಮೇಳನದಲ್ಲಿ ಅವರು ಹೇಳಿದರು.