ಅಫ್ಘಾನ್ ಪಡೆಗಳ ಮೇಲಿನ ದಾಳಿ ಮುಂದುವರಿಕೆ: ತಾಲಿಬಾನ್

ಕಾಬೂಲ್ (ಅಫ್ಘಾನಿಸ್ತಾನ), ಮಾ. 2: ಅಫ್ಘಾನ್ ಭದ್ರತಾ ಪಡೆಗಳ ವಿರುದ್ಧದ ಕಾರ್ಯಾಚರಣೆಯನ್ನು ಮುಂದುವರಿಸುವುದಾಗಿ ತಾಲಿಬಾನ್ ಸೋಮವಾರ ಹೇಳಿದೆ. ಇದರೊಂದಿಗೆ ಅಮೆರಿಕ ಮತ್ತು ತಾಲಿಬಾನ್ ಶಾಂತಿ ಒಪ್ಪಂದವೊಂದಕ್ಕೆ ಸಹಿ ಹಾಕುವ ಮುನ್ನ ಜಾರಿಯಲ್ಲಿದ್ದ ಆಂಶಿಕ ಯುದ್ಧವಿರಾಮ ಕೊನೆಗೊಂಡಂತಾಗಿದೆ.

‘‘ನಾವು ಘೋಷಿಸಿರುವ ಹಿಂಸೆಯಲ್ಲಿನ ಕಡಿತವು ಈಗ ಕೊನೆಗೊಂಡಿದೆ. ಇನ್ನು ನಮ್ಮ ಕಾರ್ಯಾಚರಣೆಯು ಎಂದಿನಂತೆ ಮುಂದುವರಿಯಲಿದೆ’’ ಎಂದು ತಾಲಿಬಾನ್ ವಕ್ತಾರ ಝಬಿಯುಲ್ಲಾ ಮುಜಾಹೀದ್ ಹೇಳಿದ್ದಾನೆ.

‘‘ಅಮೆರಿಕ-ತಾಲಿಬಾನ್ ಒಪ್ಪಂದದ ಪ್ರಕಾರ, ನಮ್ಮ ಮುಜಾಹಿದೀನ್‌ ಗಳು ವಿದೇಶಿ ಪಡೆಗಳ ಮೇಲೆ ದಾಳಿ ನಡೆಸುವುದಿಲ್ಲ. ಆದರೆ, ಕಾಬೂಲ್ ಸರಕಾರದ ಪಡೆಗಳ ವಿರುದ್ಧದ ನಮ್ಮ ಕಾರ್ಯಾಚರಣೆಗಳು ಮುಂದುವರಿಯುತ್ತವೆ’’ ಎಂದು ಅವನು ಹೇಳಿದ್ದಾನೆ.

ಅಮೆರಿಕದ ವಿಶೇಷ ರಾಯಭಾರಿ ಝಲ್ಮಾಯ್ ಖಲೀಲ್‌ ಝಾದ್ ಮತ್ತು ತಾಲಿಬಾನ್‌ನ ರಾಜಕೀಯ ವಿಭಾಗದ ಮುಖ್ಯಸ್ಥ ಮುಲ್ಲಾ ಅಬ್ದುಲ್ ಘನಿ ಬರಾದರ್ ಕತರ್ ರಾಜಧಾನಿ ದೋಹಾದಲ್ಲಿ ಶನಿವಾರ ಶಾಂತಿ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ. ಈ ಒಪ್ಪಂದದ ಪ್ರಕಾರ, ಅಮೆರಿಕವು ಅಫ್ಘಾನಿಸ್ತಾನದಲ್ಲಿರುವ ಎನ್ನ ಎಲ್ಲ ಸೈನಿಕರನ್ನು 14 ತಿಂಗಳೊಳಗೆ ವಾಪಸ್ ಕರೆಸಿಕೊಳ್ಳಬೇಕಾಗಿದೆ.

ಅದೇ ವೇಳೆ, ಅಫ್ಘಾನ್ ಸರಕಾರದೊಡನೆ ಮಾತುಕತೆ ನಡೆಸಬೇಕಾದರೆ 5,000 ತಾಲಿಬಾನ್ ಕೈದಿಗಳನ್ನು ಬಿಡುಗಡೆ ಮಾಡಬೇಕು ಎಂಬ ತಾಲಿಬಾನಿಗಳ ಶರತ್ತನ್ನು ಈಡೇರಿಸಲು ಅಫ್ಘಾನಿಸ್ತಾನದ ಅಧ್ಯಕ್ಷ ಅಶ್ರಫ್ ಘನಿ ರವಿವಾರ ನಿರಾಕರಿಸಿದ್ದಾರೆ. ಅಮೆರಿಕ ಮತ್ತು ತಾಲಿಬಾನ್ ನಡುವೆ ಏರ್ಪಟ್ಟಿರುವ ಶಾಂತಿ ಒಪ್ಪಂದದಲ್ಲಿ ಈ ಬೇಡಿಕೆಯಿದೆ ಎನ್ನಲಾಗಿದೆ.

ಕೈದಿಗಳ ವಿನಿಮಯಕ್ಕೆ ಸಂಬಂಧಿಸಿದ ಪ್ರಶ್ನೆಯೊಂದಕ್ಕೆ ಉತ್ತರಿಸಿದ ಘನಿ, ‘‘ಇದನ್ನು ನಿರ್ಧರಿಸುವ ಅಧಿಕಾರ ವ್ಯಾಪ್ತಿಯನ್ನು ಅಮೆರಿಕ ಹೊಂದಿಲ್ಲ, ಅವರು ಸಂಧಾನ ಏರ್ಪಡಿಸುವವರು ಮಾತ್ರ’’ ಎಂದು ಹೇಳಿದ್ದಾರೆ.