ಉಡುಪಿ: ಸೋಂಕು ಪರೀಕ್ಷೆಗೆ ಮತ್ತೆ 14 ಮಂದಿಯ ಸ್ಯಾಂಪಲ್

ಉಡುಪಿ : ಶಂಕಿತ ನೋವೆಲ್ ಕೊರೋನ ವೈರಸ್ (ಕೋವಿಡ್-19) ಸೋಂಕಿನ ಪರೀಕ್ಷೆಗಾಗಿ ಶುಕ್ರವಾರ 14 ಮಂದಿಯ ಸ್ಯಾಂಪಲ್‌ನ್ನು ಮಂಗಳೂರಿನ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ.

ಇವುಗಳಲ್ಲಿ ಶಂಕಿತ ಕೋವಿಡ್-19ರ ಸಂಪರ್ಕಕ್ಕೆ ಬಂದ ಇಬ್ಬರು, ತೀವ್ರ ರೀತಿಯ ಉಸಿರಾಟದ ತೊಂದರೆಗಾಗಿ ನಾಲ್ವರು, ಶೀತಜ್ವರದ ರೀತಿಯ ಅಸೌಖ್ಯಕ್ಕಾಗಿ ಐವರು ಹಾಗೂ ಟಿಜೆ ಹಾಟ್‌ಸ್ಪಾಟ್‌ನಿಂದ ಬಂದ ಮೂವರ ಸ್ಯಾಂಪಲ್‌ಗಳು ಸೇರಿವೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ಸುಧೀರ್‌ಚಂದ್ರ ಸೂಡ ತಿಳಿಸಿದ್ದಾರೆ.

ಅಲ್ಲದೇ ಇಂದು ಒಟ್ಟು ಐವರು ಆಸ್ಪತ್ರೆಗಳ ಐಸೋಲೇಷನ್ ವಾರ್ಡಿಗೆ ದಾಖಲಾಗಿದ್ದಾರೆ. ಇವರಲ್ಲಿ ಇಬ್ಬರು ಪುರುಷರು ಕೋವಿಡ್ ಶಂಕಿತರಾಗಿದ್ದರೆ, ಒಬ್ಬರು ಶೀತಜ್ವರಕ್ಕಾಗಿ ಹಾಗೂ ತಲಾ ಒಬ್ಬ ಪುರುಷ ಮತ್ತು ಮಹಿಳೆ ಉಸಿರಾಟದ ತೊಂದರೆಗಳಿಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ ಎಂದು ಅವರು ಹೇಳಿದರು.

ನಿನ್ನೆಯವರೆಗೆ ಬಾಕಿ ಉಳಿದಿದ್ದ 33 ಮಂದಿಯಲ್ಲಿ ಯಾರೊಬ್ಬರ ಸ್ಯಾಂಪಲ್ ಗಳ ವರದಿಯೂ ಇಂದು ಬಂದಿಲ್ಲ. ಹೀಗಾಗಿ ನಿನ್ನೆಯ 33 ಮಂದಿಯೊಂದಿಗೆ ಇಂದು ಕಳುಹಿಸಿದ 14 ಮಂದಿಯದು ಸೇರಿದಂತೆ ಒಟ್ಟು 47 ಮಂದಿಯ ಮಾದರಿಗಳ ವರದಿ ಬರಬೇಕಾಗಿದೆ. ಜಿಲ್ಲೆಯಿಂದ ಇದುವರೆಗೆ ಈವರೆಗೆ ಕಳುಹಿಸಿದ ಒಟ್ಟು 335 ಮಂದಿಯ ಸ್ಯಾಂಪಲ್‌ಗಳಲ್ಲಿ 288 ಮಂದಿಯ ವರದಿ ಮಾತ್ರ ಬಂದಿವೆ. ಇವುಗಳಲ್ಲಿ 285 ನೆಗೆಟಿವ್ ಆಗಿದ್ದರೆ, ಮೂವರದ್ದು ವಾತ್ರ ಪಾಸಿಟಿವ್ ಎಂದವರು ತಿಳಿಸಿದರು.

ಜಿಲ್ಲೆಯಲ್ಲಿ ಶುಕ್ರವಾರ ಉಸಿರಾಟದ ತೊಂದರೆ, ಪ್ರಯಾಣದಿಂದ ಬಂದವರು ಹಾಗೂ ಕೋವಿಡ್ ಶಂಕಿತರ ಸಂಪರ್ಕಕ್ಕೆ ಬಂದವರು ಸೇರಿ ಒಟ್ಟು 17 ಮಂದಿ ತಪಾಸಣೆಗಾಗಿ ನೋಂದಣಿಗೊಂಡಿದ್ದಾರೆ. ಈ ಮೂಲಕ ಇದುವರೆಗೆ ಜಿಲ್ಲೆಯಲ್ಲಿ ಒಟ್ಟು 2089 ಮಂದಿ ತಪಾಸಣೆಗಾಗಿ ನೋಂದಣಿ ಮಾಡಿಕೊಂಡಂತಾಗಿದೆ. ಇವರಲ್ಲಿ 772 (ಇಂದು 123) ಮಂದಿ 28 ದಿನಗಳ ನಿಗಾ ಪೂರೈಸಿದ್ದರೆ, 1821 (5) ಮಂದಿ 14 ದಿನಗಳ ನಿಗಾ ವನ್ನು ಪೂರ್ಣಗೊಳಿಸಿದ್ದಾರೆ. ಒಟ್ಟು 174 ಮಂದಿ ಇನ್ನೂ ಹೋಮ್ ಕ್ವಾರಂಟೈನ್ ಹಾಗೂ 56 ಮಂದಿ ಆಸ್ಪತ್ರೆ ಕ್ವಾರಂಟೈನ್‌ನಲ್ಲಿದ್ದಾರೆ. ಇಂದು ಒಬ್ಬ ಮಾತ್ರ ಆಸ್ಪತ್ರೆಯಿಂದ ಬಿಡುಗಡೆ ಗೊಂಡಿದ್ದಾರೆ ಎಂದು ಡಾ. ಸುಧೀರ್‌ಚಂದ್ರ ಸೂಡ ತಿಳಿಸಿದರು.

ಇಂದು ಬರಬೇಕಿದ್ದ ಜಿಲ್ಲೆಯಲ್ಲಿ ಮೊದಲನೇ ಕೊರೋನ ವೈರಸ್ ಸೋಂಕಿತ ಮಣಿಪಾಲದ 34 ವರ್ಷ ಪ್ರಾಯದ ಯುವಕನ ಎರಡನೇ ಸ್ಯಾಂಪಲ್‌ನ ವರದಿ ಇಂದು ಸಹ ಬಂದಿಲ್ಲ. ವರದಿಯನ್ನು ನಾಳೆ ಕಳುಹಿಸುವುದಾಗಿ ತಿಳಿಸಿದ್ದಾರೆ. ಈತನ ಮೊದಲ ಸ್ಯಾಂಪಲ್ ವರದಿ ನೆಗೆಟಿವ್ ಆಗಿ ಬಂದಿದೆ. ಎರಡನೇ ಮಾದರಿ ವರದಿಯೂ ನೆಗೆಟಿವ್ ಆದರೆ ಅವರನ್ನು ಆಸ್ಪತ್ರೆಯಿಂದ ಬಿಡುಗಡೆ ಗೊಳಿಸಲಾಗುವುದು ಎಂದು ಡಿಎಚ್‌ಓ ತಿಳಿಸಿದರು.

ಇಂದು ಕಳುಹಿಸಬೇಕಿದ್ದ ಮತ್ತಿಬ್ಬರು ಸೋಂಕಿತರ ಗಂಟಲು ದ್ರವದ ಮಾದರಿಯನ್ನು ನಾಳೆ ಬೆಳಗ್ಗೆ ಮಂಗಳೂರು ಕಳುಹಿಸಲಾಗುವುದು ಎಂದೂ ಅವರು ಹೇಳಿದರು.