ಉಡುಪಿ ಜಿಲ್ಲಾಸ್ಪತ್ರೆಯಲ್ಲಿ ಸದ್ಯವೇ ‘ವೈರಲ್ ಡಯೋಗ್ನಸ್ಟಿಕ್ ಲ್ಯಾಬ್’

ಉಡುಪಿ, ಜೂ.9: ಕೊರೋನ ಮಹಾ ಸ್ಪೋಟದಿಂದ ರಾಜ್ಯದಲ್ಲೇ ನಂಬರ್ ಸ್ಥಾನಕ್ಕೆ ಏರಿರುವ ಉಡುಪಿ ಜಿಲ್ಲೆಯಲ್ಲಿ ಸುಮಾರು 1.40ಕೋಟಿ ರೂ. ವೆಚ್ಚ ದಲ್ಲಿ ಸರ್ವ ಸುಸಜ್ಜಿತವಾದ ಸರಕಾರಿ ‘ವೈರಲ್ ಡಯೋಗ್ನಸ್ಟಿಕ್ ಲ್ಯಾಬ್’ ಸ್ಥಾಪನೆಗೆ ಎಲ್ಲ ರೀತಿಯ ಸಿದ್ಧತೆಗಳು ನಡೆಯುತ್ತಿವೆ. ಮುಂದೆ ಕೊರೋನ ಪರೀಕ್ಷೆಯನ್ನು ವೇಗದಗತಿಯಲ್ಲಿ ನಡೆಸಲು ಅನುಕೂಲವಾಗಲಿರುವ ಈ ಲ್ಯಾಬ್, ಜೂನ್ ತಿಂಗಳ ಅಂತ್ಯಕ್ಕೆ ಉದ್ಘಾಟನೆಗೊಳ್ಳುವ ಎಲ್ಲಾ ಸಾಧ್ಯತೆಗಳಿವೆ.

ಜಿಲ್ಲಾಸ್ಪತ್ರೆಯಲ್ಲಿ ಗುರುತಿಸಲಾಗಿರುವ ಸುಮಾರು 1700 ಚದರ ಅಡಿ ವಿಸ್ತ್ರೀರ್ಣದ ಕೊಠಡಿಯಲ್ಲಿ ಈ ಲ್ಯಾಬ್‌ನ ಸಿವಿಲ್ ಕಾಮಗಾರಿಯನ್ನು ಉಡುಪಿ ನಿರ್ಮಿತಿ ಕೇಂದ್ರದವರು ನಡೆಸುತಿದ್ದಾರೆ. ಸುಮಾರು 40ಲಕ್ಷ ರೂ. ವೆಚ್ಚದ ಈ ಕಾಮಗಾರಿ ಇಂದು ಪೂರ್ಣಗೊಳ್ಳಲಿದೆ. ಈ ಪ್ರಯೋಗಾಲಯದಲ್ಲಿ ಒಟ್ಟು 12 ಕೊಠಡಿಗಳಿದ್ದು, ಇಲ್ಲಿನ ನೆಲ ಮತ್ತು ಮೇಲ್ಛಾವಣಿಗೆ ಅತ್ಯಾಧುನಿಕ ವಾದ ಮೆಟಿರಿಯಲ್‌ಗಳನ್ನು ಹಾಕಲಾಗಿದೆ.

ವಿದೇಶಿ ಯಂತ್ರೋಪಕರಣಗಳು: ಕೋವಿಡ್ ಪರೀಕ್ಷೆಗೆ ಬೇಕಾದ ಯಂತ್ರಗಳನ್ನು ಈಗಾಗಲೇ ಬೆಂಗಳೂರಿನ ಏಜೆನ್ಸಿ ಕಂಪೆನಿಯಲ್ಲಿ ಆರ್ಡರ್ ಮಾಡಲಾಗಿದೆ. ಕಂಪೆನಿಯ ಮೂಲಕ ಈ ಯಂತ್ರಗಳನ್ನು ಅಮೆರಿಕಾ ಮತ್ತು ಜರ್ಮನಿಯಿಂದ ತರಿಸಿಕೊಳ್ಳಲಾಗುತ್ತಿದೆ. ಈಗಾಗಲೇ ಅಲ್ಲಿಂದ ಬಂದಿರುವ ಈ ಯಂತ್ರ ಗಳು ಚೆನ್ನೈಯ ಸ್ಟೋರ್ ಹೌಸ್‌ನಲ್ಲಿದ್ದು, ಎರಡು ದಿನಗಳಲ್ಲಿ ಉಡುಪಿಗೆ ಬರಲಿವೆ ಎಂದು ಜಿಲ್ಲಾ ಸರ್ಜನ್ ಡಾ.ಮಧುಸೂದನ್ ನಾಯಕ್ ತಿಳಿಸಿದ್ದಾರೆ.

ಆರ್‌ಟಿ ಪಿಸಿಆರ್, ಆರ್‌ಎನ್‌ಎ ಎಕ್ಸಾಕ್ಟರ್ ಹೀಗೆ ಕೆಲವು ಯಂತ್ರಗಳು ಅಮೆರಿಕಾದಿಂದ ಮತ್ತು ಮೈನಸ್ 80, 20 ರೆಫ್ರಿಜರೇಟರ್, ಬಯೋಸೆಪ್ಟಿ ಕ್ಯಾಬಿನೆಟ್, ಅಟೋಕ್ಲೈವ್ ಸೇರಿದಂತೆ ಇನ್ನು ಕೆಲವು ಯಂತ್ರಗಳನ್ನು ಜರ್ಮನಿ ಯಿಂದ ತರಿಸಿಕೊಳ್ಳಲಾಗುತ್ತಿದೆ. ಈ ಯಂತ್ರಗಳಿಗೆ ಸುಮಾರು ಒಂದು ಕೆಟಿ ರೂ.ವರೆಗೆ ವೆಚ್ಚವಾಗುತ್ತದೆ.

ಇತ್ತೀಚೆಗೆ ಆರ್ಡರ್ ಮಾಡಿರುವ ಕಾರಣ ಮತ್ತು ಕಂಪೆನಿಯಲ್ಲಿ ಯಂತ್ರಗಳ ಸ್ಟಾಕ್ ಇಲ್ಲದ ಹಿನ್ನೆಲೆಯಲ್ಲಿ ಇವುಗಳು ಉಡುಪಿ ಬರಲು ವಿಳಂಬವಾಗಿದೆ ಎಂಬುದು ಅಧಿಕಾರಿಗಳ ಸಬೂಬು. ಮುಂದೆ ಬೆಂಗಳೂರಿನ ನಿಮ್ಹಾನ್ಸ್ ಆಸ್ಪತ್ರೆ ಪ್ರಮಾಣಪತ್ರ ನೀಡಿದ ಬಳಿಕ ಈ ಲ್ಯಾಬ್ ಕಾರ್ಯಾರಂಭ ಮಾಡಲಿದೆ.

ಸಿಬ್ಬಂದಿಗಳಿಗೆ ತರಬೇತಿ:  ಈ ಲ್ಯಾಬ್‌ಗೆ ಅಗತ್ಯ ಇರುವ ನಾಲ್ಕು ಸಿಬ್ಬಂದಿಗಳಿಗೆ ಮಂಗಳೂರಿನ ವೆನ್ಲಾಕ್ ಆಸ್ಪತ್ರೆಯಲ್ಲಿ ಈಗಾಗಲೇ ತರಬೇತಿ ನೀಡಲಾಗಿದ್ದು, ಇನ್ನು ಇಬ್ಬರನ್ನು ತರಬೇತಿಗಾಗಿ ಕಳುಹಿಸಲಾಗಿದೆ. ಮುಂದೆ ಬೆಂಗಳೂರಿನ ನಿಮ್ಹಾನ್ ಆಸ್ಪತ್ರೆಯಲ್ಲಿ ಇವರಿಗೆಲ್ಲ ಒಂದು ದಿನದ ತರಬೇತಿ ನೀಡಲಾಗುತ್ತದೆ.

ಈಗಾಗಲೇ ಜಿಲ್ಲಾಸ್ಪತ್ರೆಯ ಇಬ್ಬರು ಖಾಯಂ ಸಿಬ್ಬಂದಿ ವೆನ್ಲಾಕ್‌ನಲ್ಲಿ ತರಬೇತಿ ಪಡೆದುಕೊಂಡಿದ್ದಾರೆ. ಅದೇ ರೀತಿ ಒಬ್ಬರು ಎನ್‌ಎಚ್‌ಎಂ ಸಿಬ್ಬಂದಿ ಮತ್ತು ಮೂವರು ಹೊರಗುತ್ತಿಗೆಯ ಸಿಬ್ಬಂದಿಗಳಿಗೆ ತರಬೇತಿಯನ್ನು ನೀಡ ಲಾಗಿದೆ. ಮುಂದೆ ಎರಡನೇ ಹಂತದಲ್ಲಿ ಇನ್ನೊಂದು ತಂಡವನ್ನು ತರಬೇತಿಗೆ ಕಳುಹಿಸಿಕೊಡಲಾಗುವುದು.

ಈ ಲ್ಯಾಬ್‌ನಲ್ಲಿ ಒಂದು ಪಾಳಿಯಲ್ಲಿ ಒಬ್ಬರು ಮೈಕ್ರೋ ಬಯೋಲಜಿಸ್ಟ್, ನಾಲ್ಕು ಲ್ಯಾಬ್ ಟೆಕ್ಟಿನಿಶಿಯನ್, ಒಬ್ಬರು ಡೇಟ್ ಎಂಟ್ರಿ ಆಪರೇಟರ್, ಒಬ್ಬರು ಗ್ರೂಪ್ ಡಿ ನೌಕರರು ಸೇರಿದಂತೆ ಒಟ್ಟು ಏಳು ಮಂದಿ ಕರ್ತವ್ಯ ನಿರ್ವಹಿಸಲಿದ್ದಾರೆ. ಮುಂದೆ ಅಗತ್ಯಕ್ಕೆ ತಕ್ಕಂತೆ ಪಾಳಿಯನ್ನು ಹೆಚ್ಚಿಸಿ ಇಲ್ಲಿ ಕೆಲಸ ಮಾಡಲಾಗುತ್ತದೆ ಎಂದು ಡಾ.ಮಧುಸೂದನ್ ನಾಯಕ್ ತಿಳಿಸಿದ್ದಾರೆ.

ಎಲ್ಲ ಕಾಯಿಲೆಗಳ ಪರೀಕ್ಷೆಗೆ ಅನುಕೂಲ

ಕೋವಿಡ್-19 ಪರೀಕ್ಷೆಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಸ್ಥಾಪಿಸಲಾದ ಈ ಲ್ಯಾಬ್‌ನಲ್ಲಿ ಮುಂದೆ ಕೆಎಫ್‌ಡಿ (ಮಂಗನಕಾಯಿಲೆ), ಡೆಂಗ್ಯೂ, ಎಚ್1 ಎನ್1ನಂತಹ ವೈರಲ್ ಕಾಯಿಲೆಯ ಪರೀಕ್ಷೆ ಕೂಡ ಮಾಡಬಹುದಾಗಿದೆ. ಪ್ರಸ್ತುತ ಸರಕಾರಿ ಆಸ್ಪತ್ರೆಯ ರೋಗಿಗಳ ಈ ಎಲ್ಲ ಪರೀಕ್ಷೆಯನ್ನು ಮಣಿಪಾಲ ಕೆಎಂಸಿ ಆಸ್ಪತ್ರೆಯಲ್ಲಿ ನಡೆಸಲಾಗುತ್ತಿದೆ.

ಕೋವಿಡ್-19 ಪರೀಕ್ಷೆಗಾಗಿ ಖಾಸಗಿ ಆಸ್ಪತ್ರೆಗಳ ಪ್ರಯೋಗಾಲಯಕ್ಕೆ ಸರಕಾರ 2250ರೂ. ದರವನ್ನು ನಿಗದಿಪಡಿಸಿದೆ. ಮುಂದೆ ಜಿಲ್ಲಾಸ್ಪತ್ರೆಯ ಸರ್ವ ಸುಸಜ್ಜಿತ ಲ್ಯಾಬ್‌ನಿಂದ ಸರಕಾರಕ್ಕೆ ಬಹಳಷ್ಟು ಪ್ರಯೋಜನ ಆಗಲಿದೆ. ಈ ಲ್ಯಾಬ್ ನಿರ್ಮಾಣಕ್ಕೆ ಬೇಕಾದ ಹಣವನ್ನು ಜಿಲ್ಲಾಡಳಿ ಎಸ್‌ಡಿಆರ್ ನಿಧಿ ನಿಂದ ಒದಗಿಸುತ್ತಿದೆ.