ದ.ಕ. ಜಿಲ್ಲೆಯಲ್ಲಿ ಬಾಲಕಿ ಸಹಿತ 33 ಮಂದಿಗೆ ಕೊರೋನ ಪಾಸಿಟಿವ್
Update: 2020-06-26 21:10 IST
ಮಂಗಳೂರು, ಜೂ. 26: ದ.ಕ. ಜಿಲ್ಲೆಯಲ್ಲಿ ಶುಕ್ರವಾರ ಮತ್ತೆ ಕೊರೋನ ಸ್ಪೋಟ ಸಂಭವಿಸಿದ್ದು, ಜಿಲ್ಲೆಯಲ್ಲಿ ಇಂದು 33 ಪಾಸಿಟಿವ್ ಪ್ರಕರಣ ಪತ್ತೆಯಾಗಿವೆ. ಜಿಲ್ಲೆಯಲ್ಲಿ ಇದುವರೆಗಿನ ಒಟ್ಟು ಸೋಂಕಿತರ ಸಂಖ್ಯೆ 527ಕ್ಕೆ ಏರಿಕೆಯಾಗಿದೆ.
ಸೋಂಕಿತರ ಪೈಕಿ 15 ಮಂದಿ ಸೌದಿ ಅರೇಬಿಯಾ, ದಮಾಮ್, ಕತರ್ನಿಂದ ಆಗಮಿಸಿದವರಾದರೆ, 10 ಮಂದಿಯು ಸೋಂಕಿತರ ಪ್ರಾಥಮಿಕ ಸಂಪರ್ಕದಲ್ಲಿದ್ದವರು. ಐಎಲ್ಐ ಪ್ರಕರಣದಲ್ಲಿ ಸ್ಥಳೀಯ ನಾಲ್ವರು, ಎಸ್ಎಆರ್ಐ ಪ್ರಕರಣದಲ್ಲಿ ಇಬ್ಬರು, ಅಂಡರ್ ಇನ್ವೆಸ್ಟಿಗೇಶನ್, ಅಂತರ್ ಜಿಲ್ಲಾ ಪ್ರಯಾಣ ಪ್ರಕರಣದಲ್ಲಿ ತಲಾ ಓರ್ವರನ್ನು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ನೀಡಲಾಗುತ್ತಿದೆ.
ಜೂ.19, 21, 22ರಂದು ಸೌದಿ ಅರೇಬಿಯಾ, ದಮಾಮ್, ಕತರ್ನಿಂದ ಆಗಮಿಸಿದ್ದವರ ಪೈಕಿ 15 ಮಂದಿಯಲ್ಲಿ ಸೋಂಕು ಇರುವುದು ಖಚಿತವಾಗಿದೆ. ಈ ಪೈಕಿ ಏಳು ಮಂದಿ ಮಹಿಳೆಯರು, ಉಳಿದವರು ಪುರುಷರು. ಗಲ್ಫ್ನಿಂದ ಬಂದ ನಾಲ್ವರು ವೃದ್ಧರಲ್ಲಿ ಸೋಂಕು ಇರುವುದು ಆತಂಕ ಹೆಚ್ಚಿಸಿದೆ.
ಪಿ-8005ರ ಪ್ರಾಥಮಿಕ ಸಂಪರ್ಕದಲ್ಲಿದ್ದ 22 ವರ್ಷದ ಯುವಕ, ಪಿ-8004ರ ಸಂಪರ್ಕಿತ 55 ವರ್ಷದ ಹೆಂಗಸು, ಪಿ-9735ರ ಸಂಪರ್ಕಿತ 30 ಹಾಗೂ 35 ವರ್ಷದ ಮಹಿಳೆಯರು, ಪಿ-10275ರ ಸಂಪರ್ಕಿತ 55 ವರ್ಷದ ವ್ಯಕ್ತಿ, ಪಿ-9739ರ ಸಂಪರ್ಕಿತ 20 ವರ್ಷದ ಯುವಕ, ಪಿ-8006ರ ಸಂಪರ್ಕಿತ 54 ವರ್ಷದ ಮಹಿಳೆ, ಪಿ-9735ರ ಸಂಪರ್ಕದಲ್ಲಿದ್ದ 11 ವರ್ಷದ ಬಾಲಕಿ ಸಹಿತ 52 ಹಾಗೂ 36 ವರ್ಷದ ಮಹಿಳೆಯರಲ್ಲಿ ಸೋಂಕು ಇರುವುದು ದೃಢವಾಗಿದೆ.
ಮಂಗಳೂರಿನ 51, 30 ಹಾಗೂ 25 ವರ್ಷದ ಪುರುಷರು ಹಾಗೂ ಪುತ್ತೂರಿನ 26 ವರ್ಷದ ಯುವಕನನ್ನು ಐಎಲ್ಐ ಪ್ರಕರಣಕ್ಕೆ ಸೇರ್ಪಡೆ ಮಾಡಲಾಗಿದೆ. 62 ವರ್ಷದ ವೃದ್ಧೆಯನ್ನು ಅಂಡರ್ ಇನ್ವೆಸ್ಟಿಗೇಶನ್, ಅಂತರ್ ಜಿಲ್ಲಾ ಪ್ರಯಾಣ ಬೆಳೆಸಿದ್ದ 56 ವರ್ಷದ ವ್ಯಕ್ತಿ, 25 ವರ್ಷದ ಹೆಂಗಸು ಹಾಗೂ 38 ವರ್ಷದ ವ್ಯಕ್ತಿಯನ್ನು ಎಸ್ಎಆರ್ಐ ಪ್ರಕರಣಕ್ಕೆ ಸೇರ್ಪಡೆಯಾಗಿದ್ದಾರೆ. ಎಲ್ಲ ಸೋಂಕಿತರನ್ನು ವೆನ್ಲಾಕ್ ಕೋವಿಡ್ ಆಸ್ಪತ್ರೆಗೆ ದಾಖಲಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಸಿಂಧೂ ಬಿ. ರೂಪೇಶ್ ತಿಳಿಸಿದ್ದಾರೆ.
34 ಮಂದಿ ಗುಣಮುಖ: ಸಮಾಧಾನಕರ ಬೆಳವಣಿಗೆಯಲ್ಲಿ ಶುಕ್ರವಾರ ಮೂವರು ಮಕ್ಕಳು ಸಹಿತ 34 ಮಂದಿ ಕೋವಿಡ್ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿ ಮನೆಗೆ ಮರಳಿದ್ದಾರೆ. ಇದರೊಂದಿಗೆ 378 ಮಂದಿ ಇದುವರೆಗೆ ಸೋಂಕು ಮುಕ್ತರಾದಂತಾಗಿದೆ. ಈಗ ಚಿಕಿತ್ಸೆಯಲ್ಲಿರುವ ಬಹುತೇಕ ಮಂದಿಯ ಆರೋಗ್ಯ ಸ್ಥಿತಿ ಸ್ಥಿರವಾಗಿದೆ.
49 ವರ್ಷದ ವ್ಯಕ್ತಿಯು ಡಯಾಬಿಟಿಸ್ ಮತ್ತು ನ್ಯುಮೋನಿಯದಿಂದ ಬಳಲುತ್ತಿದ್ದು, ಇವರನ್ನು ಐಸಿಯುನಲ್ಲಿ ದಾಖಲಿಸಿ, ಎಚ್ಎಫ್ಎನ್ಸಿ ಮೂಲಕ ಆಮ್ಲಜನಕ ನೀಡಲಾಗುತ್ತಿದೆ. 57 ವರ್ಷದ ಹೆಂಗಸನ್ನು ಲಿವರ್ ಕಾಯಿಲೆ, ಡಯಾಬಿಟಿಸ್, ಹೃದಯರೋಗ ಹಾಗೂ ನ್ಯುಮೋನಿಯ ದಿಂದ ಬಳಲುತ್ತಿದ್ದಾರೆ. ಇನ್ನು 78 ವರ್ಷದ ವೃದ್ಧನನ್ನು ಡಯಾಬಿಟಿಸ್, ಅಧಿಕ ರಕ್ತದೊತ್ತಡ, ಪಾರ್ಕಿನ್ಸನ್ ಕಾಯಿಲೆ ಮತ್ತು ನ್ಯುಮೋನಿಯ ದಿಂದ ಬಳಲುತ್ತಿದ್ದಾರೆ. 59 ವರ್ಷದ ವೃದ್ಧ ಹೃದ್ರೋಗ, ನ್ಯುಮೋನಿಯ ಬಳಲುತ್ತಿದ್ದು, ಐಸಿಯುನಲ್ಲಿ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.
ಶುಕ್ರವಾರ ಒಟ್ಟು 303 ವರದಿಗಳು ಪ್ರಯೋಗಾಲಯದಿಂದ ಬಂದಿದ್ದು, ಅವುಗಳಲ್ಲಿ 33 ಪಾಸಿಟಿವ್ ಆಗಿದ್ದರೆ, ಉಳಿದೆಲ್ಲವೂ ನೆಗೆಟಿವ್ ಆಗಿವೆ. ಹೊಸದಾಗಿ 280 ಮಂದಿಯ ಸ್ಯಾಂಪಲ್ನ್ನು ಪರೀಕ್ಷೆಗೆ ಕಳುಹಿಸಿಕೊಡಲಾಗಿದೆ. ಒಟ್ಟು 202 ಮಂದಿಯ ವರದಿ ಇನ್ನಷ್ಟೇ ಬರಲು ಬಾಕಿಯಿದೆ ಎಂದು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ.