ರಶ್ಯ, ಚೀನಾಗಳ ಲಸಿಕೆಗಳಲ್ಲಿ ದೋಷ: ಪರಿಣತರು

ಟೊರಾಂಟೊ/ಶಿಕಾಗೊ, ಆ. 31: ರಶ್ಯ ಮತ್ತು ಚೀನಾಗಳಲ್ಲಿ ಅಭಿವೃದ್ಧಿಪಡಿಸಲಾಗಿರುವ ಕೋವಿಡ್-19 ಲಸಿಕೆಗಳು ಸಂಭಾವ್ಯ ನ್ಯೂನತೆಗಳನ್ನು ಹೊಂದಿವೆ. ತುಂಬಾ ಮಂದಿಯಲ್ಲಿ ಕಾಣಿಸಿಕೊಂಡಿರುವ ಸಾಮಾನ್ಯ ನೆಗಡಿ ವೈರಸನ್ನು ಆಧರಿಸಿ ಈ ಲಸಿಕೆಗಳನ್ನು ಅಭಿವೃದ್ಧಿಪಡಿಸಲಾಗಿದೆ, ಹಾಗಾಗಿ ಅವುಗಳ ಪರಿಣಾಮ ಸೀಮಿತವಾಗಿರುವ ಸಾಧ್ಯತೆಯಿದೆ ಎಂದು ಕೆಲವು ಪರಿಣತರು ಅಭಿಪ್ರಾಯಪಟ್ಟಿದ್ದಾರೆ.

ಚೀನಾದಲ್ಲಿ ಸೇನಾ ಬಳಕೆಗಾಗಿ ಅಂಗೀಕರಿಸಲಾಗಿರುವ ಕ್ಯಾನ್‌ಸಿನೊ ಬಯಾಲಜಿಕ್ಸ್ ಲಸಿಕೆಯು ಅಡಿನೊವೈರಸ್ ಟೈಪ್ 5 ಅಥವಾ ‘ಎಡಿ5’ರ ಸುಧಾರಿತ ರೂಪವಾಗಿದೆ. ಬೃಹತ್ ಪ್ರಮಾಣದ ಪರೀಕ್ಷೆಗಳನ್ನು ಪೂರ್ಣಗೊಳಿಸುವ ಮೊದಲೇ, ಹಲವಾರು ದೇಶಗಳಿಂದ ತುರ್ತು ಅನುಮೋದನೆಗಳನ್ನು ಪಡೆದುಕೊಳ್ಳುವುದಕ್ಕಾಗಿ ಕಂಪೆನಿಯು ಮಾತುಕತೆಯಲ್ಲಿದೆ ಎಂದು ‘ವಾಲ್ ಸ್ಟ್ರೀಟ್ ಜರ್ನಲ್’ ಕಳೆದ ವಾರ ವರದಿ ಮಾಡಿದೆ.

ಈ ತಿಂಗಳ ಆದಿ ಭಾಗದಲ್ಲಿ ರಶ್ಯದಲ್ಲಿ ಅಂಗೀಕಾರ ಪಡೆದಿರುವ ಹಾಗೂ ಮಾಸ್ಕೋದ ಗಮಲೇಯ ಇನ್‌ಸ್ಟಿಟ್ಯೂಟ್ ಅಭಿವೃದ್ಧಿಪಡಿಸಿರುವ ಲಸಿಕೆಯೂ ವ್ಯಾಪಕ ಪರೀಕ್ಷೆಗೆ ಒಳಪಟ್ಟಿಲ್ಲ ಹಾಗೂ ಅದನ್ನೂ ‘ಎಡಿ5’ ಲಸಿಕೆಯನ್ನು ಆಧರಿಸಿಯೇ ಅಭಿವೃದ್ಧಿಪಡಿಸಲಾಗಿದೆ ಎಂದು ಜಾನ್ಸ್ ಹಾಪ್‌ಕಿನ್ಸ್ ವಿಶ್ವವಿದ್ಯಾನಿಲಯದಲ್ಲಿ ಲಸಿಕೆ ಸಂಶೋಧಕಿಯಾಗಿರುವ ಆನಾ ಡರ್ಬಿನ್ ಹೇಳಿದ್ದಾರೆ.