ಅತಂತ್ರ ಫಲಿತಾಂಶ ಬಂದಿರುವ ಬ್ಲಾಕ್ ಪಂ, ಗ್ರಾಪಂನಲ್ಲಿ ಯಾರಾಗ್ತಾರೆ ಕಿಂಗ್ ಮೇಕರ್?

ಕಾಸರಗೋಡು, ಡಿ.18: ಇತ್ತೀಚೆಗೆ ನಡೆದ ಸ್ಥಳೀಯಾಡಳಿತ ಸಂಸ್ಥೆ ಚುನಾವಣೆಯಲ್ಲಿ ಮಂಜೇಶ್ವರ ಬ್ಲಾಕ್ ಪಂಚಾಯತ್ ಸೇರಿದಂತೆ ಕಾಸರಗೋಡು ಜಿಲ್ಲೆಯ ಹಲವು ಗ್ರಾಮ ಪಂಚಾಯತ್ ಗಳಲ್ಲಿ ಅತಂತ್ರ ಫಲಿತಾಂಶ ದಾಖಲಾಗಿರುವುದರಿಂದ ಅಧಿಕಾರದ ಗದ್ದುಗೆ ಯಾರಿಗೆ ಸಿಗಲಿದೆ ಎಂಬ ಕುತೂಹಲ ಜನರಲ್ಲಿದೆ.

ಬೆರಳೆಣಿಕೆಯ ಸ್ಥಾನಗಳನ್ನು ಗೆದ್ದಿರುವ ಪಕ್ಷಗಳ ಬೆಂಬಲಿಗ ಅಭ್ಯರ್ಥಿಗಳು ಕಿಂಗ್ ಮೇಕರ್ ಗಳು ಆಗುವ ಸಂಭವ ಕಂಡುಬರುತ್ತಿದೆ. ಬಹುಮತಕ್ಕೆ ಒಂದೆರಡು ಸ್ಥಾನಗಳ ಕೊರತೆ ಎದುರಿಸುತ್ತಿರುವ ಪಕ್ಷಗಳು ಅಧಿಕಾರಕ್ಕೇರಲು ಸೈದ್ಧಾಂತಿಕವಾಗಿ ವಿಭಿನ್ನ ನಿಲುವು ಹೊಂದಿರುವ ಪಕ್ಷಗಳ ಬೆಂಬಲ ಯಾಚಿಸಬೇಕಾದ ಅನಿವಾರ್ಯಕ್ಕೆ ಸಿಲುಕಿವೆ.

ಮಂಜೇಶ್ವರ ಬ್ಲಾಕ್ ಪಂಚಾಯತ್:

ಮಂಜೇಶ್ವರ ಬ್ಲಾಕ್ ಪಂಚಾಯತ್ ನಲ್ಲಿ ಅತಂತ್ರ ಫಲಿತಾಂಶ ಬಂದಿರುವುದರಿಂದ ಯುಡಿಎಫ್ ಗೆ ಅಧಿಕಾರಕ್ಕೇರಲು ಸಿಪಿಎಂ ಅಥವಾ ಎಸ್ ಡಿಪಿಐ ಬೆಂಬಲ ಅನಿವಾರ್ಯವಾಗಿದೆ.

ಇಲ್ಲಿ ಯುಡಿಎಫ್ ಮತ್ತು ಬಿಜೆಪಿ ತಲಾ ಆರು ಸ್ಥಾನಗಳನ್ನು ಜಯಿಸಿವೆ. 15 ಸದಸ್ಯ ಬಲದಲ್ಲಿ ಬಹುಮತಕ್ಕೆ ಎಂಟು ಸ್ಥಾನಗಳು ಅಗತ್ಯವಾಗಿದೆ. ಎಲ್ ಡಿಎಫ್ 2 ಮತ್ತು ಎಸ್ ಡಿಪಿಐ ಒಂದು ಸ್ಥಾನವನ್ನು ಪಡೆದುಕೊಂಡಿದೆ. ಆದರೆ ಈ ಎರಡೂ ಪಕ್ಷಗಳು ಬಿಜೆಪಿಗೆ ಬೆಂಬಲ ನೀಡುವ ಸಾಧ್ಯತೆ ಕಡಿಮೆ ಎನ್ನಲಾಗುತ್ತಿದೆ. ಹಾಗಾದಲ್ಲಿ ಯುಡಿಎಫ್ ಗೆ ಅಧಿಕಾರ ಉಳಿಸಿಕೊಳ್ಳಲು ಈ ಎರಡೂ ಪಕ್ಷಗಳ ಬೆಂಬಲ ಅಗತ್ಯವಾಗಿದೆ. ಒಂದುವೇಳೆ ಈ ಎರಡೂ ಪಕ್ಷಗಳು ಯುಡಿಎಫ್ ಅಥವಾ ಬಿಜೆಪಿಗೆ ಬೆಂಬಲ ನೀಡದಿದ್ದಲ್ಲಿ ಅದೃಷ್ಟ ಚೀಟಿ ಎತ್ತುವ ಮೂಲಕ ನೂತನ ಆಡಳಿತವನ್ನು ಆಯ್ಕೆ ಮಾಡಬೇಕಾದ ಅನಿವಾರ್ಯ ಸ್ಥಿತಿ ಉಂಟಾಗಲಿದೆ.

ಪೈವಳಿಕೆ ಹಾಗೂ ಕುಂಬಳೆ ಗ್ರಾಪಂ:

ಪೈವಳಿಕೆ ಗ್ರಾಪಂನಲ್ಲಿ ಎಲ್ ಡಿಎಫ್ ಮತ್ತು ಬಿಜೆಪಿಗೆ ತಲಾ 8 ಸ್ಥಾನಗಳು ಲಭಿಸಿವೆ. ಇಲ್ಲಿ ಅಧಿಕಾರಕ್ಕೆ ಏರಲು 10 ಸ್ಥಾನಗಳ ಅಗತ್ಯ ಇದೆ. ಮೂರು ಸ್ಥಾನಗಳನ್ನು ಜಯಿಸಿರುವ ಯುಡಿಎಫ್ ಕಿಂಗ್ ಮೇಕರ್ ಆಗುವ ಸಾಧ್ಯತೆ ಇದೆ. ಆದರೆ ಯುಡಿಎಫ್ ಬೆಂಬಲ ನೀಡದಿದ್ದಲ್ಲಿ ಅದೃಷ್ಟ ಚೀಟಿ ಎತ್ತುವ ಮೂಲಕ ನೂತನ  ಆಡಳಿತ ಸಮಿತಿಯನ್ನು ಆಯ್ಕೆ ಮಾಡಲಾಗುತ್ತದೆ.

ಕುಂಬಳೆ ಗ್ರಾಮ ಪಂಚಾಯತ್ ನಲ್ಲಿ ಯು ಡಿ ಎಫ್ ಮತ್ತು ಬಿಜೆಪಿ ತಲಾ 9 ಸ್ಥಾನಗಳಲ್ಲಿ ಗೆಲುವು ದಾಖಲಿಸಿದೆ. ಇಲ್ಲಿ ಎರಡೂ ಪಕ್ಷಗಳಿಗೂ ಪಕ್ಷೇತರರ ಬೆಂಬಲ ಅಗತ್ಯವಾಗಿದೆ. ಪಕ್ಷೇತರರು ನಾಲ್ಕು ಸ್ಥಾನಗಳನ್ನು ಪಡೆದಿದ್ದಾರೆ. ಆದ್ದರಿಂದ ಯಾರು ಅಧಿಕಾರದ ಗದ್ದುಗೆ ಏರುತ್ತಾರೆ ಎಂಬ ಕುತೂಹಲ ಮನೆ ಮಾಡಿದೆ.

ಬದಿಯಡ್ಕ ಗ್ರಾಮ ಪಂಚಾಯತ್ ನಲ್ಲಿ ಯುಡಿಎಫ್ ಮತ್ತು ಬಿಜೆಪಿ ತಲಾ 8 ಸ್ಥಾನಗಳನ್ನು ಪಡೆದಿದ್ದು, ಅಧಿಕಾರಕ್ಕೆ ಬರಲು ಪಕ್ಷೇತರನ ಬೆಂಬಲ ಅನಿವಾರ್ಯವಾಗಿದೆ. ಇಲ್ಲಿ ಒಂದು ಸ್ಥಾನದಲ್ಲಿ ಪಕ್ಷೇತರ ಅಭ್ಯರ್ಥಿ ಗೆಲುವು ಸಾಧಿಸಿದ್ದಾರೆ.

ಮೀಂಜ ಗ್ರಾಮ ಪಂಚಾಯತ್ ನಲ್ಲಿ ಯಾರಿಗೂ ಬಹುಮತ  ಲಭಿಸಿಲ್ಲ. ಬಿಜೆಪಿ 6, ಎಲ್ ಡಿಎಫ್ 5, ಯುಡಿಎಫ್ 3 ಹಾಗೂ ಪಕ್ಷೇತರ 1 ಸ್ಥಾನ ಪಡೆದಿದ್ದು, ಬಿಜೆಪಿಗೆ ಪಕ್ಷೇತರ ಅಥವಾ ಎಲ್ ಡಿಎಫ್ ಗೆ ಯುಡಿಎಫ್ ಬೆಂಬಲ ನೀಡಲಿದ್ದಲ್ಲಿ ಮಾತ್ರ ಅಧಿಕಾರ ನಡೆಸಬಹುದಾಗಿದೆ.

ವರ್ಕಾಡಿಯಲ್ಲಿ ಯುಡಿಎಫ್ 4, ಎಲ್ ಡಿಎಫ್ ಮತ್ತು ಬಿಜೆಪಿ ತಲಾ 4 ಸ್ಥಾನಗಳನ್ನು ಹೊಂದಿದ್ದು, ಇಬ್ಬರು ಪಕ್ಷೇತರರ ಬೆಂಬಲ ಬಿಜೆಪಿ ಅಥವಾ ಎಲ್ ಡಿ ಎಫ್ ಗೆ ಅಗತ್ಯ ಇದೆ.