ಬೀಜಾಡಿ ಕಡಲತೀರದಲ್ಲಿ ಕಡಲಾಮೆಯ ಮೊಟ್ಟೆಗಳು ಪತ್ತೆ

ಕುಂದಾಪುರ, ಫೆ.4: ಬೀಜಾಡಿ ಕಡಲ ತೀರದಲ್ಲಿ ಕಡಲಾಮೆಯ ನೂರಕ್ಕೂ ಅಧಿಕ ಮೊಟ್ಟೆಗಳು ಫೆ.3ರಂದು ಪತ್ತೆಯಾಗಿದೆ.

ರಾತ್ರಿ ವೇಳೆ ತೀರಕ್ಕೆ ಬಂದ ಆಲಿವ್ ರಿಡ್ಲೇ ಪ್ರಬೇಧದ ಕಡಲಾಮೆಯು ಮರಳಿನಲ್ಲಿ ಗುಂಡಿ ತೋಡಿ ಸುಮಾರು 80-120 ಮೊಟ್ಟೆಗಳನ್ನು ಇಟ್ಟಿರುವು ದನ್ನು ಸ್ಥಳೀಯರು ಗಮನಿಸಿದರು. ಈ ಬಗ್ಗೆ ಕಡಲಾಮೆಯ ಸಂರಕ್ಷಣೆಯಲ್ಲಿ ತೊಡಗಿಸಿಕೊಂಡಿರುವ ಎಫ್ಎಸ್‌ಎಲ್ ತಂಡಕ್ಕೆ ಮಾಹಿತಿ ನೀಡಿದರು.

ಅದೇ ರೀತಿ ಎಫ್‌ಎಸ್‌ಎಲ್‌ನವರು ಕುಂದಾಪುರ ವಲಯ ಅರಣ್ಯ ಇಲಾಖೆಯ ಅಧಿಕಾರಿಗಳ ಗಮನಕ್ಕೆ ತಂದರು. ಅದರಂತೆ ಎಫ್‌ಎಸ್‌ಎಲ್ ಮತ್ತು ಅರಣ್ಯಾಧಿಕಾರಿಗಳು ಸ್ಥಳಕ್ಕೆ ಆಗಮಿಸಿ ಮೊಟ್ಟೆಗಳನ್ನು ರಕ್ಷಿಸಿದ್ದಾರೆ. ಅದಕ್ಕೆ ಸಮಸ್ಯೆಯಾಗದಂತೆ ತಡೆಬೇಲಿಯನ್ನು ರಚಿಸಿದ್ದಾರೆ. ಕಳೆದ ತಿಂಗಳು ಕೋಡಿ ಕಡಲ ತೀರದಲ್ಲಿ ಎರಡು ಕಡೆ ಕಡಲಾಮೆಯ ಮೊಟ್ಟೆಗಳು ದೊರೆತಿದ್ದವು.