ಉಡುಪಿ: ದಿನದಲ್ಲಿ 259 ಮಂದಿಗೆ ಕೋವಿಡ್ ಲಸಿಕೆಯ 2ನೇ ಡೋಸ್
Update: 2021-02-18 21:10 IST
ಉಡುಪಿ, ಫೆ.18: ಜಿಲ್ಲೆಯ 259 ಮಂದಿ ಆರೋಗ್ಯ ಕಾರ್ಯಕರ್ತರಿಗೆ ಗುರುವಾರ ಕೋವಿಡ್ ಲಸಿಕೆಯ ಎರಡನೇ ಡೋಸ್ನ್ನು ನೀಡಲಾಗಿದೆ. ಮೊದಲ ಡೋಸ್ನ್ನು ಪಡೆದ 28 ದಿನಗಳ ಬಳಿಕ ನೀಡಲಾಗುವ ಎರಡನೇ ಡೋಸ್ನ್ನು ಸೋಮವಾರದಿಂದ ಈವರೆಗೆ ಒಟ್ಟು 739 ಮಂದಿ ಪಡೆದಿದ್ದರು ಎಂದು ಆರೋಗ್ಯ ಇಲಾಖೆಯ ಬುಲೆಟಿನ್ ತಿಳಿಸಿದೆ.
ಜಿಲ್ಲೆಯ ವೈದ್ಯರೂ ಸೇರಿದಂತೆ 25,789 ಮಂದಿ ಆರೋಗ್ಯ ಕಾರ್ಯಕರ್ತರಿಗೆ ನೀಡುವ ಮೊದಲ ಹಂತದ ಮೊದಲ ಡೋಸ್ ಲಸಿಕೆಯನ್ನು ಇದುವರೆಗೆ ಒಟ್ಟು 15,414 ಮಂದಿ (ಶೇ.60) ಪಡೆದಿದ್ದಾರೆ. ಇದೀಗ ಎರಡನೇ ಹಂತದಲ್ಲಿ ಜಿಲ್ಲೆಯ 4237 ಮಂದಿ ಮುಂಚೂಣಿ ಕಾರ್ಯಕರ್ತರಿಗೆ ನೀಡಲಾಗುತ್ತಿರುವ ಕೋವಿಡ್ ಲಸಿಕೆಯನ್ನು ಇಂದಿನವರೆಗೆ ಒಟ್ಟು 2,616 (ಶೇ.62) ಮಂದಿ ಪಡೆದುಕೊಂಡಿದ್ದಾರೆ ಎಂದು ಇಲಾಖೆ ತಿಳಿಸಿದೆ.