ಉಡುಪಿ: ಬುಧವಾರ 5046 ಮಂದಿಗೆ ಕೊರೋನ ಲಸಿಕೆ

ಉಡುಪಿ, ಮಾ.31: ಹೆಚ್ಚುತ್ತಿರುವ ಕೊರೋನ ಎರಡನೇ ಅಲೆಯ ಭೀತಿಯ ನಡುವೆ ಸಾಂಕ್ರಾಮಿಕ ರೋಗಕ್ಕೆ ಲಭ್ಯವಿರುವ ಲಸಿಕೆಯನ್ನು ಬುಧವಾರ ಒಟ್ಟು 5046 ಮಂದಿ ಸ್ವೀಕರಿಸಿದ್ದಾರೆ. ಇವರಲ್ಲಿ 4812 ಮಂದಿ ಮೊದಲ ಡೋಸ್‌ನ್ನೂ 234 ಮಂದಿ ಎರಡನೇ ಡೋಸ್‌ನ್ನೂ ಸ್ವೀಕರಿಸಿದ್ದಾರೆ ಎಂದು ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ.ಸುಧೀರ್‌ಚಂದ್ರ ಸೂಡ ತಿಳಿಸಿದ್ದಾರೆ.

ದಿನದಲ್ಲಿ 60 ಮೇಲ್ಪಟ್ಟ 3477 ಮಂದಿ ಹಿರಿಯ ನಾಗರಿಕರೊಂದಿಗೆ, 45ರಿಂದ 59 ವರ್ಷದೊಳಗಿನ ಬೇರೆ ಬೇರೆ ರೋಗದಿಂದ ನರಳುವ 1089 ಮಂದಿ ಈ ಲಸಿಕೆಯ ಮೊದಲ ಡೋಸ್‌ನ್ನು ಸ್ವೀಕರಿಸಿದ್ದಾರೆ. ಈ ಮೂಲಕ ಜಿಲ್ಲೆಯಲ್ಲಿ ಈವರೆಗೆ ಒಟ್ಟು 55,029 ಮಂದಿ ಹಿರಿಯ ನಾಗರಿಕರು ಹಾಗೂ 10,358 ಮಂದಿ 45-59 ವಯೋಮಾನದವರು ಮೊದಲ ಡೋಸ್‌ನ್ನು ಪಡೆದಿದ್ದಾರೆ. ಅಲ್ಲದೇ ಇಂದು 112 ಮಂದಿ ಹಿರಿಯ ನಾಗರಿಕರು ಹಾಗೂ 5 ಮಂದಿ 45-59 ವರ್ಷದೊಳಗಿನವರು ಎರಡನೇ ಡೋಸ್‌ನ್ನು ಪಡೆದಿದ್ದಾರೆ ಎಂದರು.

ಜಿಲ್ಲೆಯಲ್ಲಿ ಒಟ್ಟು 23,889 ಮಂದಿ ಆರೋಗ್ಯ ಕಾರ್ಯಕರ್ತರಲ್ಲಿ ಇಂದು 178 ಮಂದಿ ಮೊದಲ ಡೋಸ್‌ನ್ನು (ಒಟ್ಟು 21,806) ಪಡೆದರೆ, 49 ಮಂದಿ ಎರಡನೇ ಡೋಸ್‌ನ್ನು (15,914)ಸ್ವೀಕರಿಸಿದ್ದಾರೆ. ಅದೇ ರೀತಿ ಜಿಲ್ಲೆಯ ಒಟ್ಟು 4283 ಮಂದಿ ಮುಂಚೂಣಿ ಕಾರ್ಯಕರ್ತರ ಪೈಕಿ ಇಂದು 68 ಮಂದಿ ಮೊದಲ ಡೋಸ್ ಪಡೆದಿದ್ದು, ಒಟ್ಟಾರೆಯಾಗಿ ಇವರ ಸಂಖ್ಯೆ 4042 ಆಗಿದೆ. ಅಲ್ಲದೇ 68 ಮಂದಿ ಎರಡನೇ ಡೋಸ್ ಪಡೆದಿದ್ದು ಇವರ ಒಟ್ಟು ಸಂಖ್ಯೆ 2336 ಆಗಿದೆ.