ಟೈಮ್ಸ್ ಇಂಜಿನಿಯರಿಂಗ್ ಇನ್ಸ್ಟಿಟ್ಯೂಟ್ ರಾಂಕಿಂಗ್ ಸರ್ವೇ : ಸಹ್ಯಾದ್ರಿ ಕಾಲೇಜಿಗೆ ರಾಷ್ಟ್ರಮಟ್ಟದ 80ನೇ ರ್ಯಾಂಕ್
Update: 2021-07-03 18:17 IST
ಮಂಗಳೂರು, ಜು.3: ಪ್ರತಿಷ್ಠಿತ ಟೈಮ್ಸ್ ಇಂಜಿನಿಯರಿಂಗ್ ಇನ್ಸ್ಟಿಟ್ಯೂಟ್ ರ್ಯಾಂಕಿಂಗ್ ಸರ್ವೇ 2021ರಲ್ಲಿ ಸಹ್ಯಾದ್ರಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಮ್ಯಾನೇಜ್ಮೆಂಟ್ ಭಾರತದ ಟಾಪ್ 100 ಇಂಜಿನಿಯರಿಂಗ್ ಕಾಲೇಜುಗಳಲ್ಲಿ ಸ್ಥಾನ ಪಡೆದಿದೆ.
ಉನ್ನತ ಕಾಲೇಜುಗಳ ಶ್ರೇಯಾಂಕದಲ್ಲಿ ಸಹ್ಯಾದ್ರಿ ಕಾಲೇಜು ರಾಷ್ಟ್ರಮಟ್ಟದ 80ನೇ ರ್ಯಾಂಕ್ ಪಡೆದಿದೆ. ಟಾಪ್ ಉದ್ಯೋಗ ಶ್ರೇಯಾಂಕದಲ್ಲಿ ಸಹ್ಯಾದ್ರಿ ಕಾಲೇಜು ರಾಷ್ಟ್ರಮಟ್ಟದ 50ನೇ ರ್ಯಾಂಕ್ ಪಡೆದಿದೆ.
ಅಂತಿಮ ಶ್ರೇಯಾಂಕಕ್ಕೆ ಬರಲು ಮೂಲ ಸೌಕರ್ಯ, ನಿಯೋಜನೆಗಳು, ಅಧ್ಯಾಪಕರು, ಕೋರ್ಸ್ಗಳು, ಉದ್ಯಮ ಸಂಪರ್ಕ, ಸಂಶೋಧನಾ ಚಟುವಟಿಕೆಗಳು, ಜಾಗತಿಕ ಮಾನ್ಯತೆ ಮುಂತಾದ ವಿಭಿನ್ನ ನಿಯತಾಂಕಗಳನ್ನು ಈ ಸಮೀಕ್ಷೆಯು ಆಧರಿಸಿದೆ.
ಅಟಲ್ ರ್ಯಾಂಕಿಂಗ್ ಆಫ್ ಇನ್ಸ್ಟಿಟ್ಯೂಷನ್ಸ್ ಆನ್ ಇನ್ನೋವೇಶನ್ ಅಚೀವ್ಮೆಂಟ್ಸ್ (ARIIA-2020) ನಲ್ಲಿ ಸಹ್ಯಾದ್ರಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಮ್ಯಾನೇಜ್ಮೆಂಟ್ ರಾಷ್ಟ್ರೀಯ ಮಟ್ಟದಲ್ಲಿ ಟಾಪ್ 25 ಕಾಲೇಜುಗಳಲ್ಲಿ ಸ್ಥಾನ ಪಡೆದಿದೆ. ಭಾರತ ಸರಕಾರದ ಇನ್ನೋವೇಶನ್ ಸೆಲ್, ಶಿಕ್ಷಣ ಸಚಿವಾಲಯ (MoE) ಕಾಲೇಜಿಗೆ 4 ಸ್ಟಾರ್ ರೇಟಿಂಗ್ ನೀಡಿದೆ. ವಾಣಿಜ್ಯೋದ್ಯಮ ಅಭಿವೃದ್ಧಿ ಕಾರ್ಯಕ್ರಮಗಳಲ್ಲಿ ಶ್ರೇಷ್ಠತೆಗಾಗಿ ಸಹ್ಯಾದ್ರಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಮ್ಯಾನೇಜ್ ಮೆಂಟ್ ಟೈಮ್ಸ್ ಬಿಸಿನೆಸ್ ಅವಾರ್ಡ್ 2021ನ್ನು ಗೆದ್ದಿದೆ.
ಕ್ಯಾಂಪಸ್ನೊಳಗೆ ಮೂರು ಆಂತರಿಕ ಕೈಗಾರಿಕೆಗಳು, ಐದು ಸ್ಟಾರ್ಟ್ಅಪ್ಗಳು ಮತ್ತು 11 ಎಲ್ಎಲ್ಪಿಗಳನ್ನು ಹೊಂದಿರುವ ಸಹ್ಯಾದ್ರಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಮತ್ತು ಮ್ಯಾನೇಜ್ಮೆಂಟ್ ವಿದ್ಯಾರ್ಥಿಗಳಿಗೆ ಸ್ಫೂರ್ತಿ ನೀಡುವ ಮೂಲಕ ಉನ್ನತ ಎಂಎನ್ಸಿ ಮತ್ತು ಸರಕಾರಿ ಸಂಸ್ಥೆಗಳಿಗೆ ಸೇವೆ ಸಲ್ಲಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ.
ಸರಕಾರ ಆಯೋಜಿಸಿರುವ ಎಲಿವೇಟ್ ಕಾರ್ಯಕ್ರಮದ ಮೂಲಕ ನಾಲ್ಕು ಸುತ್ತಿನ ಧನಸಹಾಯ ಆಕರ್ಷಿಸುವಲ್ಲಿ ಸಂಸ್ಥೆ ಯಶಸ್ವಿಯಾಗಿದೆ. ಸಹ್ಯಾದ್ರಿ ಕಾಲೇಜಿನ ವಿದ್ಯಾರ್ಥಿಗಳಿಗೆ 40 ಎಲ್ಪಿಎವರೆಗೆ ಹೆಚ್ಚಿನ ಪ್ಯಾಕೇಜ್ ಹೊಂದಿರುವ ಅನೇಕ ಪ್ರಮುಖ ಕಂಪೆನಿಗಳಲ್ಲಿ ಉದ್ಯೋಗ ಸಿಕ್ಕಿದೆ. ಈ ವರ್ಷ 165ಕ್ಕೂ ಹೆಚ್ಚು ಹೆಸರಾಂತ ಕಂಪೆನಿಗಳಿಂದ 710 ಉದ್ಯೋಗದ ಕೊಡುಗೆಗಳು ದೊರೆತಿವೆ ಎಂದು ಸಂಸ್ಥೆಯ ಪ್ರಕಟನೆ ತಿಳಿಸಿದೆ.