ಉರ್ವ ಮಾರುಕಟ್ಟೆ ಬಳಿ ಒಳಾಂಗಣ ಕ್ರೀಡಾಂಗಣ ನಿರ್ಮಾಣ

ಮಂಗಳೂರು : ನಗರದ ಉರ್ವ ಮಾರುಕಟ್ಟೆ ಸಮೀಪದ ಮಾರಿಗುಡಿ ಬಳಿ 1.13 ಎಕರೆ ಪ್ರದೇಶದಲ್ಲಿ ಸ್ಮಾರ್ಟ್ ಸಿಟಿ ವತಿಯಿಂದ ಸುಸಜ್ಜಿತ ಒಳಾಂಗಣ ಕ್ರೀಡಾಂಗಣ ನಿರ್ಮಾಣ ಕಾಮಗಾರಿ ಭರದಿಂದ ನಡೆಯುತ್ತಿದೆ.

ಒಂದು ಬೇಸ್‌ಮೆಂಟ್‌ನೊಂದಿಗೆ ಜಿ+4 ಮಾದರಿಯಲ್ಲಿ ಕ್ರೀಡಾಂಗಣ ನಿರ್ಮಾಣವಾಗಲಿದೆ. ಕಬಡ್ಡಿ ಮತ್ತು ಬ್ಯಾಡ್ಮಿಂಟನ್ ಆಟಗಳನ್ನು ಗಮನ ದಲ್ಲಿರಿಸಿಕೊಂಡು ಅತ್ಯಾಧುನಿಕ ಶೈಲಿಯಲ್ಲಿ ಸ್ಟೇಡಿಯಂ ಸಿದ್ಧವಾಗಲಿದ್ದು, ಸುಮಾರು 20.54 ಕೋ.ರೂ. ಅನುದಾನ ಮೀಸಲಿರಿಸಲಾಗಿದೆ. ಗುತ್ತಿಗೆದಾರರಿಗೆ 18 ತಿಂಗಳಲ್ಲಿ ಕಾಮಗಾರಿ ಮುಗಿಸಲು ಗಡುವು ನೀಡಲಾಗಿದೆ.

ಕಟ್ಟಡದ ನೆಲ ಅಂತಸ್ತಿನಲ್ಲಿ ಪ್ರವೇಶಾಂಗಣ, ಕಬಡ್ಡಿ ಅಂಕಣ, ಸ್ಟೋರ್‌ರೂಂ, ಆಡಳಿತ ಕಚೇರಿ, ವಾಣಿಜ್ಯ ಮಳಿಗೆಗಳ ಸಹಿತ 2,385.97 ಚ.ಮೀ. ವಿಸ್ತೀರ್ಣದಲ್ಲಿ ಕ್ರೀಡಾಂಗಣ ನಿರ್ಮಾಣವಾಗಲಿದೆ. ಮೊದಲ ಮಹಡಿಯಲ್ಲಿ ಪ್ರೇಕ್ಷಕರ ಗ್ಯಾಲರಿ, ವಿಐಪಿ ಲಾಂಜ್ ಇರಲಿದ್ದು, 1,121 ಚ.ಮೀ. ವಿಸ್ತೀರ್ಣ ಹೊಂದಿದೆ. ಎರಡನೇ ಮಹಡಿಯು 820.12 ಚ.ಮೀ.ನಲ್ಲಿ ಒಳಾಂಗಣ ಆಟಗಳಿಗೆ ಸ್ಥಳ, ಜಿಮ್ನಾಶಿಯಂ, ಪ್ಯಾಸೇಜ್ ಒಳಗೊಂಡಿದೆ. ಮೂರನೇ ಮಹಡಿಯಲ್ಲಿ ಸ್ಟೇಡಿಯಂ ಪ್ರದೇಶ, ಮೆಡಿಕಲ್ ರೂಮ್, ಫಿಸಿಯೋಥೆರಪಿ, ಸ್ಟೋರ್‌ರೂಮ್, ಬಟ್ಟೆ ಬದಲಾಯಿಸುವ ಕೊಠಡಿ ಸಹಿತ 1,739.68 ಚ.ಮೀ. ವಿಸ್ತೀರ್ಣದಲ್ಲಿ ನಿರ್ಮಾಣವಾಗಲಿದೆ. ನಾಲ್ಕನೇ ಮಹಡಿಯಲ್ಲಿ ಪ್ರೇಕ್ಷಕರ ಗ್ಯಾಲರಿ, ಡಾರ್ಮಿಟರಿ, ಶೌಚಗೃಹಗಳು ಇರಲಿವೆ.

ಅದಲ್ಲದೆ ಕಬಡ್ಡಿ-ಬ್ಯಾಡ್ಮಿಂಟನ್ ಕೋರ್ಟ್, ಸಿಂಥೆಟಿಕ್ ಮ್ಯಾಟ್, ಕ್ರೀಡಾಪಟುಗಳಿಗೆ ಸಕಲ ವ್ಯವಸ್ಥೆ, ಪ್ರೇಕ್ಷಕರಿಗೆ ಕುಳಿತು ವೀಕ್ಷಿಸಲು ಗ್ಯಾಲರಿ, ಅಸೋಸಿಯೇಶನ್‌ಗಳಿಗೆ ಕಚೇರಿ, ಕೆಫೆಟೇರಿಯಾ, ವಾಣಿಜ್ಯ ವ್ಯವಹಾರ ಮಳಿಗೆಗಳು ಹಾಗೂ 103 ಕಾರುಗಳ ಪಾರ್ಕಿಂಗ್ ವ್ಯವಸ್ಥೆಯೂ ಇರಲಿದೆ.

ರಾಷ್ಟ್ರ-ಅಂತರ್‌ರಾಷ್ಟ್ರೀಯ ಮಟ್ಟದ ಸ್ಪರ್ಧೆಗಳನ್ನು ಆಯೋಜಿಸಲು ಸಹಕಾರಿಯಾಗುವಂತೆ ಸುಸಜ್ಜಿತ ಒಳಾಂಗಣ ಕ್ರೀಡಾಂಗಣವನ್ನು ಸ್ಮಾರ್ಟ್‌ಸಿಟಿ ವತಿಯಿಂದ ನಿರ್ಮಿಸಲಾಗುತ್ತಿದೆ. ಕಬಡ್ಡಿ ಹಾಗೂ ಬ್ಯಾಡ್ಮಿಂಟನ್ ಆಟಗಳಿಗೆ ಬೇಕಾದ ಎಲ್ಲ ಸೌಲಭ್ಯವನ್ನು ಕ್ರೀಡಾಂಗಣ ಒಳಗೊಳ್ಳಲಿದೆ.

ವೇದವ್ಯಾಸ ಕಾಮತ್,

ಶಾಸಕ, ಮಂಗಳೂರು ದಕ್ಷಿಣ ಕ್ಷೇತ್ರ