ಅನಿಲ ಪೂರೈಸುವಾಗ ರೂಬಲ್ ನಲ್ಲೇ ಪಾವತಿಸಿ: ಯುರೋಪ್ ಗೆ ಪುಟಿನ್ ಷರತ್ತು
Update: 2022-03-24 20:42 IST
ಮಾಸ್ಕೊ, ಮಾ.24: ಯುರೋಪಿಯನ್ ಯೂನಿಯನ್ ಸಹಿತ ರಶ್ಯದ ಮಿತ್ರರಲ್ಲದ ದೇಶಗಳಿಗೆ ರಶ್ಯ ಪೂರೈಸುವ ಅನಿಲ(ಗ್ಯಾಸ್)ಕ್ಕೆ ರೂಬಲ್(ರಶ್ಯದ ಕರೆನ್ಸಿ)ನಲ್ಲೇ ಪಾವತಿಸಬೇಕು ಎಂದು ರಶ್ಯ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಬುಧವಾರ ಹೇಳಿದ್ದಾರೆ.
ಉಕ್ರೇನ್ ಸಂಘರ್ಷ ಆರಂಭವಾದಂದಿನಿಂದಲೂ ತೀವ್ರ ಅಪಮೌಲ್ಯಗೊಂಡಿದ್ದ ರಶ್ಯದ ರೂಬಲ್ ಪುಟಿನ್ ಈ ರೀತಿಯ ಷರತ್ತು ಮುಂದಿರಿಸಿದ ಕೆಲವೇ ಕ್ಷಣಗಳಲ್ಲಿ ಡಾಲರ್ ಮತ್ತು ಯುರೋ ಎದುರು ಚೇತರಿಸಿಕೊಂಡಿತು. ಆದರೆ ಗ್ಯಾಸ್ ದರ ಏರಿಕೆಯಾಗಿದೆ.
ಬುಧವಾರ ಟಿವಿ ವಾಹಿನಿಯಲ್ಲಿ ಪ್ರಸಾರಗೊಂಡ ಸಚಿವ ಸಂಪುಟ ಸಭೆಯಲ್ಲಿ ಮಾತನಾಡಿದ ಪುಟಿನ್, ನಾವು ಸ್ನೇಹಿತರಲ್ಲದ ದೇಶಗಳಿಗೆ ಪೂರೈಸುವ ಗ್ಯಾಸ್ನ ಹಣ ಪಾವತಿಗೆ ಸಂಬಂಧಿಸಿ ಕ್ರಮವೊಂದನ್ನು ಜಾರಿಗೊಳಿಸಲು ನಿರ್ಧರಿಸಲಾಗಿದೆ. ಈ ದೇಶಗಳು ರೂಬಲ್ನಲ್ಲೇ ಹಣ ಪಾವತಿಸಬೇಕು ಎಂದರು. ರಶ್ಯ ಮಾಡಿಕೊಂಡಿರುವ ಒಪ್ಪಂದದ ಪ್ರಕಾರ ಅನಿಲ ಪೂರೈಕೆ ಮುಂದುವರಿಯಲಿದೆ ಎಂದು ಸ್ಪಷ್ಟಪಡಿಸಿದ ಅವರು, ನೂತನ ಪಾವತಿ ವ್ಯವಸ್ಥೆಯನ್ನು ವಾರದೊಳಗೆ ಜಾರಿಗೊಳಿಸುವಂತೆ ಸೆಂಟ್ರಲ್ ಬ್ಯಾಂಕ್ಗೆ ಆದೇಶಿಸಿದರು. ನೂತನ ಪಾವತಿ ವ್ಯವಸ್ಥೆ ಪಾರದರ್ಶಕವಾಗಿರಬೇಕು ಮತ್ತು ರಶ್ಯದ ಸ್ಥಳೀಯ ಮಾರುಕಟ್ಟೆಗೆ ರೂಬಲ್ ಖರೀದಿಸಲು ಸೂಕ್ತವಾಗಿರಬೇಕು ಎಂದು ಅವರು ಸೂಚಿಸಿದ್ದಾರೆ. ಯುರೋಪಿಯನ್ ಯೂನಿಯನ್, ಅಮೆರಿಕ ಮಾರುಕಟ್ಟೆಗೆ ನಮ್ಮ ಸರಕನ್ನು ಒದಗಿಸಿ ಅದರ ಪಾವತಿಯನ್ನು ಯುರೋ, ಡಾಲರ್ಗಳಲ್ಲಿ ಪಡೆಯುವುದರಲ್ಲಿ ಅರ್ಥವಿಲ್ಲ ಎಂದು ಪುಟಿನ್ ಹೇಳಿದ್ದಾರೆ.
ಈ ಮಧ್ಯೆ, ತನ್ನ ಎಲ್ಲಾ ಬಾಹ್ಯ ಒಪ್ಪಂದಗಳಿಗೆ ರೂಬಲ್ನಲ್ಲಿ ಹಣ ಪಾವತಿಸಬೇಕು ಎಂದು ರಶ್ಯದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ರೋಸ್ಕೋಸ್ಮಸ್ ತನ್ನ ಅಂತರಾಷ್ಟ್ರೀಯ ಪಾಲುದಾರರಿಗೆ ಸೂಚಿಸಿದೆ ಎಂದು ರಶ್ಯದ ಸರಕಾರಿ ಸ್ವಾಮ್ಯದ ಸುದ್ಧಿಸಂಸ್ಥೆ ತಾಸ್ ವರದಿ ಮಾಡಿದೆ. ಪುಟಿನ್ ಅವರ ಆಗ್ರಹ ಒಪ್ಪಂದದ ಉಲ್ಲಂಘನೆಯಾಗಿದ್ದು ಈ ವಿಷಯದಲ್ಲಿ ಮುಂದಿನ ಕ್ರಮಗಳ ಬಗ್ಗೆ ಯುರೋಪ್ ನ ಮಿತ್ರರೊಂದಿಗೆ ಚರ್ಚಿಸಲಾಗುವುದು ಎಂದು ಜರ್ಮನಿಯ ಅರ್ಥಸಚಿವ ರೋಬರ್ಟ್ ಹ್ಯಬೆಲ್ ಹೇಳಿದ್ದಾರೆ. ಸಂಘರ್ಷಕ್ಕೂ ಮುನ್ನ ಜರ್ಮನಿಯು ಆಮದು ಮಾಡಿಕೊಳ್ಳುವ ಪ್ರಾಕೃತಿಕ ಅನಿಲದ 55%ದಷ್ಟು ರಶ್ಯದಿಂದ ಆಮದಾಗುತ್ತಿತ್ತು.
ಪುಟಿನ್ ಘೋಷಣೆಯ ಹೊರತಾಗಿಯೂ ರಶ್ಯದ ಅನಿಲಕ್ಕೆ ಯುರೋ ಕರೆನ್ಸಿಯಲ್ಲೇ ಪಾವತಿಸುವುದಾಗಿ ಆಸ್ಟ್ರಿಯಾದ ಒಎಂವಿ ಎನರ್ಜಿ ಸಂಸ್ಥೆ ಹೇಳಿದೆ. ಒಪ್ಪಂದದಲ್ಲಿ ಬೇರೆ ಯಾವ ರೀತಿಯ ಪಾವತಿಯ ಬಗ್ಗೆಯೂ ಉಲ್ಲೇಖವಿಲ್ಲ. ಆದ್ದರಿಂದ ಒಪ್ಪಂದದ ಪ್ರಕಾರವೇ ಪಾವತಿಸುತ್ತೇವೆ ಎಂದು ಸಂಸ್ಥೆಯ ಸಿಇಒ ಆಲ್ಪ್ರೆಡ್ ಸ್ಟರ್ನ್ ಹೇಳಿದ್ದಾರೆ.
ಉಕ್ರೇನ್ ಖಂಡನೆ
ಯುರೋಪಿಯನ್ ಯೂನಿಯನ್ ಮೇಲಿನ ರಶ್ಯದ ಆರ್ಥಿಕ ಯುದ್ಧ ಮತ್ತು ರೂಬಲ್ ಬಲಿಷ್ಟಗೊಳಿಸುವ ಪ್ರಯತ್ನವನ್ನು ಖಂಡಿಸುವುದಾಗಿ ಉಕ್ರೇನ್ ಹೇಳಿದೆ. ರಶ್ಯದ ಮೇಲೆ ತೈಲ ನಿರ್ಬಂಧವನ್ನು ಪಾಶ್ಚಿಮಾತ್ಯ ದೇಶಗಳು ಕಟ್ಟುನಿಟ್ಟಾಗಿ ಜಾರಿಗೆ ತಂದರೆ ಆ ದೇಶದ ಅರ್ಥವ್ಯವಸ್ಥೆ ಸಂಪೂರ್ಣ ಹದಗೆಡಲಿದೆ ಎಂದು ಉಕ್ರೇನ್ನ ಅಧ್ಯಕ್ಷರ ಸಲಹೆಗಾರ ಆಂಡ್ರಿಯ್ ಯೆರ್ಮಾಕ್ ಹೇಳಿದ್ದಾರೆ.
ಈ ವಿಷಯ ಇದೀಗ ಪ್ರಮುಖ ಆರ್ಥಿಕ ಯುದ್ಧವಾಗಿ ಬದಲಾಗಿದೆ ಮತ್ತು ಪಾಶ್ಚಿಮಾತ್ಯ ದೇಶಗಳು ಇದರಲ್ಲಿ ಗೆಲ್ಲಬೇಕಿದೆ ಎಂದವರು ಹೇಳಿದ್ದಾರೆ.